VOV4.K’ho- Rlau 94 rơbô nă cau tàm mpồl cau jơngo mat tàm jơh gùt lơgar neh geh dong kờl càn priă bơtàu tơnguh lơh sa, kă bro. Do là jơnau yal geh đơs tàm dơ̆ Pơrjum tơn jơh 30 nam Broă lơh càn priă bơh Kes priă dà lơgar bè broă lơh tơngai lơh broă bơh nam 1992-2022, geh bơyai lơh tàm ƀòn dờng Đà Nẵng drim ngai 07/09. Tơngai pa do, bơh Kes priă dà lơgar bơsong broă lơh mờ Ngân hàng Cíñ sác Xã hội, ală kấp Mpồl cau jơngo mat Việt Nam neh sền sơ wì, dong rlau 94 rơbô nă cau jơngo mat in càn mờr 52 tơmàn đong bơtàu tơnguh lơh sa, ròng phan, tam phan, kă bro rah rài...

Lơh geh broă lơh ai mờr 70 nă cau lơh broă tàm hơ̆ geh 50 nă là cau jơngo mat mờ ală cau kuĕt kơlte ndai

Ồng Phạm Viết Thu, Củ tịc Mpồl cau jơngo mat Dà lơgar Việt Nam pà gĭt: uă cau jơngo mat càn priă ngui di mờ jơnau kờñ geh cồng nha, hìu bơnhă pas đau, hìu bơnhă pas gơs gơguh, hìu bơnhă rƀah gơmù loh làng. Bơdìh mờ dong kờl càn priă, Mpồl cau jơngo mat Việt Nam pơgồp bal mờ Ủy ƀan Mặt trận ală kấp lơh pa mờ lơh niam wơl mờr 2 rơbô nơm hìu ơm nùs nhơm, dong cau jơngo mat geh rài kis bè ờs.

 Cau mblàng K’Hạnh