VOV4.K’ho- Nam bơsram 2022- 2023 là dơ̆ 3 jơh gùt gah bơto bơtê mờ bơsram lam lơh broă lơh bơto bơsram phổ thông pa, jat broă rơndap lơh ai tơlik geh lam lơh gơ wèt mờ ơdŭ 3, ơdŭ 7 mờ ơdŭ 10. Tàm kâp 1, gơ wèt mờ kâp 3, dà Mỹ mờ Tin họk gơ gơs là môn pal bơsram. Bulah bè hơ̆, ờ tơl cơldŭ bơsram, phan bơna, măi mok mờ pơgru gam là bơta kòl yan gơ wèt mờ uă hìu bơsram tŭ lam lơh tàm nam bơsram do. Bè hơ̆ den tàng, bal mờ broă rơcang lài phan bơna, broă rơcang lài mpồl cau pơgru pal geh lơh bè lơi nàng lam lơh broă lơh bơto bơsram phổ thông pa geh cồng nha.

Broă lơh bơto bơsram phổ thông pa gơ wèt mờ ơdŭ 3 geh uă bơta tam gơl pơndrờm mờ broă lơh gam ngui tŭ do, hơ̆ là bơto bơsram pal geh 2 môn dà Mỹ mờ Tin họk; geh tai broă lơh sền git ngan ngồn mờ kông nghệ. Jat uă cau pơgru đơs, broă bơyai lơh bơto bơsram, ai kơnòm bơsram in bơsram dà Mỹ mờ Tin họk là bơta dipal mờ jơnau kờñ bơh tŭ tơngai dê, dong bơtàu tơnguh tơl làm pàn jak kơnòm bơsram dê. Bulah bè hơ̆, bơh gùng dà lam lơh ngan ngồn gam gơtìp uă kal ke, ngan là tàm ală tiah ƀòn lơgar, tiah kơh bơnơm, tiah sar lơgar ngài tài bơh ờ mìng ờ tơl phan bơna mờ gam ờ tơl măi mok nàng bơto mon Tin họk. Pơgru Vì Văn Tụt, lơh broă tàm hìu bơsram kâp 1 Chiềng Cang, kơnhoàl Sông Mã, càr Sơn La đơs bơta geh ngan: “Trồ mìu den ală oh gơtìp ñhat dà, trồ tơngai den ală oh pal kong tơngai duh ờ gơtùi jơm king trồ tơngai, trồ mìu, jơh bal kơ ƀàng, cơ gĕ kung ờ kơ̆ nàng ai ală oh in nggui sơl, kung gơ rềng tus broă lơh bơto bơsram bol hi dê. Kờñ ngui kông nghệ thông tin tàm broă bơto bơsram mơya gơ wèt mờ cơldŭ bơsram ing den ală cau pơgru gơtìp uă ngan kal ke”.

Bal mờ ờ tơl phan bơna, măi mok bơto mon Tin họk den broă ờ tơl pơgru bơto môn do mờ môn dà Mỹ kung lơh ală hìu bơsram kâp 1 gơtìp kal ke. Tŭ do, pơgru Tin họk uă ngan geh bơto bơtê nàng bơto ai kâp 2 mờ kâp 3 in. Mơya jat jơnau sồr, pơgru Tin họk geh bơto tơn môn Kông nghệ mờ khà tiết bơsram gơguh uă rlau 2 dơ̆ pơndrờm mờ tŭ do, mơya ngan ngồn ờ di cau pơgru môn Tin học lơi kung geh bơto bơtê, pơlam bè tơngume do. Pơgru Cảnh Thị Hải Yến, pơgru môn Tin Họk, hìu bơsram kâp 1 Liên Hà, kơnhoàl Đan Phượng, ƀòn dờng Hà Nội ờ suk: “Hìu bơsram kâp 1 Liên Hà mìng geh añ là pơgru bơto môn Tin họk, ngan kung là geh 1 êt bơta kơn jơ̆ tài khà jơnau git wă pal bơto geh gơguh uă mờ geh jơh bal môn Kông nghệ den kung pal jòi git tai. Jat bè broă lơh pa den Tin họk geh bơsram 1 tiết tàm 1 poh mờ Kông nghệ den 1 tiết tàm 1 poh, là kờp jơh 42 tiết den kơn jơ̆ ir gơ wèt mờ añ, den tàng añ kung kâp kờñ Phòng Giáo zụk mờr tus bơ tơl tai pơgru nàng tam pà bal broă lơh bơto bơtê mờ añ”.

Jat jơnau kờp dŭ lài tus nam 2025, tŭ broă lơh bơto bơsram phổ thông pa geh lam lơh tàm jơh ală ơdŭ bơsram den geh pal bơto tai rlau 24 rbô nă cau pơgru tàm 3 môn bơsram pa là dà Mỹ, Tin họk mờ Kông nghệ kâp 1. Ală khà do ai gŏ loh làng ngan bơta rơ mơp ndơl bơh ală tiah dê tàm broă rơ wah cau pơgru. Ală tiah do pà git, broă ờ tơl cau pơgru tŭ lam lơh broă lơh bơto bơsram phổ thông nam 2018 là jơnau ờ pa, den tàng neh bơt bơtàu uă broă lơh bơsong, bè: sồr cau pơgru lòt bơsram văn ƀằng 2, bơto bơtê jat jơnau kờñ. Tềng đap mat, nàng bơsong kal ke tàm broă ờ tơl cau pơgru bơto ală môn Tin họk, dà Mỹ, ală tiah ndrờm pơlam ală hìu bơsram kâp 1 bơt bơtàu broă rơndap lơh bơto bơsram hìu bơsram nàng lam lơh bơto 2 môn do ngac ngar, do mờ bơta geh ngan, mờ kung rơndap tŭ jơ bơsram nàng lam lơh broă rơndap lơh cau pơgru bơto tàm uă hìu bơsram... Ồng Phạm Đức Thắng, Kwang atbồ Phòng Giáo zụk mờ Đào tạo kơnhoàl Ba Bể, càr Bắc Kạn pà git: “Cau pơgru tŭ do bơto ală môn gam ờ tơl, pơn yơu bè dà Mỹ, do là bơta geh bal, ờ mìng is tàm kơnhoàl Ba Bể mờ jơh ală kơnhoàl tàm càr. Bè bơta ờ tơl cau pơgru bơto dà Mỹ tŭ do den đah Phòng Giáo zụk kung neh ai tơlik jơnau đơs kơnhoàl in bơsong mờ broă bơto tàm uă hìu bơsram. Hơ̆ là cau pơgru tàm hìu bơsram do bơto ờ hềt tơl tiết den gơtùi bơto tai tàm hìu bơsram ndai”.

Tŭ do, ală Sở Giáo zụk mờ Đào tạo kung ai tơlik jơnau đơs ai Ủy ƀan Ñân zân kâp càr, ƀòn dờng đơng lam ală tiah lam lơh broă lơh rơ wah cau pơgru, kĭ sră pơrgon lơh broă, sră pơrgon bơto bơtê gơ wèt mờ pơgru dà Mỹ, Tin họk. Mờ kung gàr tơl cau pơgru geh bơto pơlam bè broă lơh môn bơsram, bơto pơlam ngui sră măi lài mờ tŭ geh sồr bơto bơtê. Loh làng, broă lơh bơto bơsram phổ thông pa dong kơnòm bơsram git dà Mỹ mờ Tin họk nàng dờng pràn tơl làm pràn jak. Ngan ngồn lam lơh bơto 2 môn bơsram do tàm ală hìu bơsram kâp 1 ai gŏ kờñ pal geh bơta pơgồp bal geh cồng nha rlau tai bơh gah bơto bơtê mờ bơsram mờ ală càr, ƀòn dờng dê tàm broă rơcang lài cau pơgru mờ phan bơna, măi mok lơh jat jơnau sồr.

Cau mblàng K’Duẩn