VOV4.K’ho - Kờp jơh khà priă pà phan satềp bal mờ phe, drơng rài kis ală cau geh sră dong kờl bơh dà lơgar, cau lơh broă di satềp Ñâm Zần là rơlao 9 rơbô 280 tơmàn đong ai rơlao 57 tơlăk 81 rơbô nă cau in.

Tàm satềp Ñâm Zần, ală càr, ƀòn dờng neh lơh jăt broă jun phan pà di tŭ bơh Củ tịc lơgar ai rơlao 1 tơlăk 56 rơbô nă cau geh màng mờ dà lơgar in. Bơdìh mờ phan pà bơh ală anih lơh broă Dà lơgar, ală càr, ƀòn dờng neh rơcang tă priă bơh tơl càr, ƀòn dờng dê bal mờ khà priă lam sồr tă nàng pà phan ai ală cau geh sră dong kờl, cau geh màng mờ dà lơgar in. broă dong kờl drơng satềp ai cau rơƀah, cau geh broă dong kờl bơh mpồl bơtiàn bal mờ cau lơh broă di tàm satềp geh ală càr, ƀòn dờng sền gròi ngan. Ală càr, ƀòn dờng kung neh bơyai lơh còp să, pà phan ai ală mpồl ling lơh kơnòl tàm tiah nhàr dà lơgar in di tàm satềp, ală cau kòp jroă, cau gam sơm kòp Kovid-19 in.

Cau mblàng Ndong Brawl