Tàm ală mpồl ling rcang lài tam lơh, Đoàn viên Ơruh pơnu geh tus mờr 80% khà kờp ling klàng, lơh jat ală kơnòl broă ling klàng, sền gàr dà lơgar tơn mờ tờm ngan. 5 nam do, 100% kwang bàng, đoàn viên ơruh pơnu lơh sir kơnòl broă pơlam tàp rcang lài tam lơh, bơto bơtê, lơh broă sa... Do kung là mpồl ling sùm geh mat tàm ală tiah bòl glar kal ke, tiah ngòt rơngơ̆t nàng dong kờl làng bol sơndră wơl mờ trồ tiah lơh aniai, kòp aniai, jòi dong kờl rềs àr đơs nền nùs nhơm gĭt wă geh kơnòl drơng broă Dà lơgar, drơng broă làng bol in. Pơgồp bơnah dềt rơhền tàm cồng nha hơ̆, Thượng úy Phan Văn Linh, cau ala mat Quân đoàn 1 pà gĭt: Bơ̆t bơtàu nùs nhơm kơ̆ dơn cíñ trị kơ̆ kơljap, nùs nhơm kờñ gơboh dà lơgar, bơta pin dờn tàm bơta chài ling klàng Việt Nam dê, tàm bơta pràn jak, bơta chài ngui măy mok, bơta chài ngui phàu crong phan tam lơh gam geh tŭ do dê. Ngui niam bơta ngăc ngar, bơceh pa, pơnđơl pràn lơh is, pơlam tàp is, gơ dờp mhar mờ bơta geh ngan, bơta pràn tam lơh ngăc ngar, geh bơta gĭt wă lam lơh jăt adat boh lam, di pal mờ jơnau sồr kơnòl broă tàm tơl ală bơta.

 Bơdìh hơ̆, srơh bơceh lơh cau kơnòm să mờ broă lơh pà khà jờng rơnàng kơnòm să bơceh lơh in sền gŏ gĭt nđờ rơhiang rơbô jơnau kơlôi sơnơng geh kwơ, dong kờl ai ală bơta jak chài cau chài  kơnòm să bơh gùt mpồl ling klàng dê. Gĭt nđờ rơbô broă lơh bơceh lơh tơnơ̆ tŭ lơh geh khà jờng pơn jat tai geh ală cau bơceh lơh, mpồl cau bơceh lơh neh lơh sir, tơmŭt crăp tàm ứng dụng làm uă lơh kwơ ai dà lơgar in pah nam gĭt nđờ rơhiang tơmàn đong.

Chờ hờp lơh geh khà jờng rơnàng kơnòm să bơceh lơh, Trung tá Hoàng Văn Tiến, Khoa Hàng Không vũ trụ, Học viện Kỹ thuật Ling klàng đơs: Bol añ chờ hờp ngan geh cèng bơta kờñ, bồ tơngoh jak bơh he dê nàng lơh gơlik geh ală phan bơna pa ngan, drơng broă jơnau kờñ lơh pa ngan mpồl ling klàng.

Tềng đap ală kơnòl broă pa geh ai tơlik kơn jơ̆ kơn jŭt ngan mơya kung dờng màng ngan gơwèt mờ rơnàng kơnòm să jơh gùt mpồl ling klàng dê tàm tơngai tus, Pơrjum dờng Đoàn ơruh pơnu Mpồl Ling klàng dơ̆ do neh sền gĭt jơnau kờñ uă rlau mờ 10 broă jàu lơh tàm tơngai lơh broă bơh 2022-2027. Mơkung đơs loh 3 broă lơh bơtàu tơnguh mhar. Hơ̆ là: Bơtàu tơnguh mhar bè broă lơh bơto bơtê bồ tơngoh kăc màng; Bơtàu tơnguh mhar bè broă lơh pơlam tàp, rcang lài tam lơh, bơto bơtê, kơlôi sơnơng khoa họk, bơsram dà Mỹ, dà kòn cau, lơh tờm ngui kông nghệ lơh niam wơl mờ lơh gơlik bàr pe bơta phàu crong pa ngan, ngui cồng nha kông nghệ thông tin, bơceh lơh tàm tàm gơl sồ; Bơtàu tơnguh mhar bè broă lơh bơt bơtàu rài kis cíñ quy, rài kis niam chài, tơnguh uă bơta gĭt wă lơh jat adat boh lam, lơh glài mờ sền gàr lơngap lơngai.

Broă lơh Đoàn mờ srơh ơruh pơnu neh, gam mờ kung gam là tơngume kwơ màng tàm Nghị quyết đơng lam broă rơndap lơh broă lơh Đảng, broă lơh Cíñ trị bơh tơl mpồl ling dê, bè tă pơgồp bal jơnau đơs bơh Trung tướng Trần Hoài Trung, Cíñ ủy Quân khu 7 dê: Kấp ủy, cíñ trị, cíñ trị viên, cau đơng lam, anih lơh broă cíñ trị ală kấp neh đơng lam, sồr lơh tơn, lơh geh ală bơta ƀuơn ngan rlau jơh ai broă lơh Đoàn mờ srơh ơruh pơnu in bơtàu tơnguh, pơgồp bơnah nàng mpồl ling phàu crong Quân khu dê lơh sir tơl làm ală kơnòl broă geh jàu. Gĭt wă loh làng bè broă lơh, gơnoar broă, bơta kwơ màng bơh broă lơh Đoàn mờ srơh ơruh pơnu dê, mờ ndrờm geh dùl nùs bal lơh khat dùl kơnòl broă lơi kờñ lơh sir sơrbăc mhar mờ niam bơnĕ pal geh kwang đơng lam bồ, pal geh cau đơng lam mờ pal geh srơh, tàm hơ̆ srơh ơruh pơnu là kwơ màng ngan rlau jơh.

Ală jơnau kờñ bơh rơnàng kơnòm să Mpồl Ling klàng làng bol dê geh pơgồp bơnah bơt bơtàu Mpồl Ling klàng niam, pràn, lơh geh bơnàng jă kơ̆ kơljap nàng nam 2030 Mpồl Ling klàng lơh tus lơh pa ngan sơlơ tơnguh bơta pràn sền gàr Dà lơgar bơh gờñ, bơh ngài, gam geh dong kòl mờ geh bơta gơn kơnờm. Phó ƀí thư Quân ủy Dà lơgar, Ƀộ trưởng Ƀộ Quôk phòng Đại tướng ồng Phan Văn Giang đơs loh tàm dơ̆ pơrjum dờng do: Quân ủy Dà lơgar, Kwang đơng lam bồ Ƀộ Quôk phòng ơn jơh bơta pin dờn tàm rơnàng kơnòm să jơh gùt mpồl ling klàng dê, mơkung sùm sền gròi mờ lơh ală bơta ƀuơn ngan rlau jơh nàng ală cau tàm mpồl ling klàng tă pơgồp dà kơlhề tàm broă bơt bơtàu Mpồl ling klàng làng bol Việt Nam kăc màng, cíñ quy, sơr băc mhar, hời rơ hời lơh pa ngan, bơt bơtàu mờ sền gàr kơ̆ kơljap dà lơgar Việt nam xã hội củ nghĩa. Sồr ală cau tàm mpồl ling klàng pơn jat tai pơn đơl pràn lơh ngan nàng di pal mờ bơta pin dờn mờ bơta kơ̆p kờñ bơh Quân ủy Dà lơgar, Ƀộ Quôk phòng dê.

VOV/ Cau mblàng K’Hạnh