VOV4.K’ho- Càr Kon Tum geh gùng nhàr dà lơgar jòng rlau 292 kơi sồ, rềp mờ 2 lơgar Lào, Campuchia. Bal mờ kơnòl sền gàr kơ̆ kơljap gơnoar tờm, bơt bơtàu gùng nhàr dà lơgar ring lơngai, lơh bơyô, pah tŭ sa tềp tus, sơnam pa tus, kwang bàng, cau ling sền gàr tiah nhàr dà lơgar càr Kon Tum gam bơyai lơh uă broă lơh gròi sền sa tềp ai làng bol in, bềng lìu nùs nhơm rềp mềr ling klàng làng bol tàm tiah nhàr dà lơgar.

Hìu bơnhă bi Y Thêu, kòn cau Jeh Triêng ơm tàm ƀòn Đăk Ga, xã tiah nhàr dà lơgar Đăk Plô, kơnhoàl Đăk Glei, càr Kon Tum là dùl tàm 12 hìu bơnhă làng bol geh rài kis uă kal ke. Tài uă jơnau mờ rài kis bơh 5 nă cau tàm hìu bơnhă dê sùm tàm bơta siơ̆u siar. Mờr sa tềp, bơta kơp kờñ dờng ngan rlau jơh bơh hìu bơnhă dê là geh tơl phe sa, ờ khin sơnơng tus mbar klơm mờ bañ kèu den sơlơ ờ kơlôi tus tai. Bơta chờ hờp tus mờ hìu bơnhă bi Y Thêu tŭ kwang bàng, cau ling sền gàr tiah nhàr dà lơgar pôs đồng Đăk Blô tus tàm hìu lùp còp bè rài kis, pà phan dong hìu bơnhă geh tơl phan ngui sa tềp. Bal mờ hơ̆, kwang bàng, cau ling sền gàr tiah nhàr dà lơgar gam jà hìu bơnhă bi tus bal Ngai chờ klơm mbar tơlir mờ geh pà bañ cèng rê sa tềp. Bi Y Thêu đơs: “Hìu bơnhă añ kal ke ngan, kơp wă rò sa tềp, wă rò nam pa mơya ờ geh phan lơi nàng wă rò sa tềp. Añ kung ưn ngài ngan neh geh jàu pà phan tus tàm tê tơn. Nam pa tus añ kung chờ hờp ngan geh blơi dùl êt bañ kèu nàng wă rò sa tềp bal mờ hìu bơnhă, chờ hờp bal mờ hìu bơnhă.”

Ờ lời hìu bơnhă làng bol lơi gơtìp siơ̆u siar, ờ tơl ngui tơl sa tàm sa tềp là bơta lơh ngan bơh kwang bàng, cau ling 2 pôs ling sền gàr tiah nhàr dà lơgar Đăk Blô mờ Sông Thanh dê lơh pôs tàm xã Đăk Plô, kơnhoàl Đăk Glei. Bal mờ broă rơndap lơh gròi sền sa tềp ai làng bol in bơh Đảng ủy, Ủy ƀan Ñân zân xã Đăk Plô dê, 2 pôs ling sền gàr tiah nhàr dà lơgar kung bơt bơtàu broă rơndap lơh, pơgồp bal mờ Đảng ủy, gơnoar atbồ tàm ƀòn lơgar bơyai lơh uă broă lơh chờ hờp sa tềp, wă rò sơnam pa ai làng bol xã tiah nhàr dà lơgar in, pơn rơ ngan là broă lơh “Sơnam pa tiah nhàr dà lơgar ram nùs làng bol tàm ƀòn” mờ “Ngai chờ klơm mbar kơnâm”.

Kwang bàng, cau ling sền gàr tiah nhàr dà lơgar càr Kon Tum bal mờ làng bol klơm mbar kơnâm tàm Ngai chờ Klơm mbar kơnâm

Mò Y Thanh, Củ tịc Ủy ƀân Ñân zân kơnhoàl Đăk Glei pà git, kơnhoàl geh 3 xã tiah nhàr dà lơgar rềp mờ lơgar Lào, geh: Đăk Plô, Đăk Nhoong mờ Đăk Long. Kơnờm ală broă lơh bơh mpồl ling sền gàr tiah nhàr dà lơgar lam lơh, làng bol tiah nhàr dà lơgar geh tai uă bơta chờ hờp nàng wă rò sa tềp, chờ hờp sơnam pa: “Ală cau ling sền gàr tiah nhàr dà lơgar tàm ală pôs đồng bal mờ làng bol tàm tiah nhàr dà lơgar tàm dơ̆ do geh chờ hờp sơnam pa, wă rò sa tềp. Làng bol geh dờp ală phan pà bơh ală cau ling dê bal mờ ală Mpồl kwang bàng bơh Gah đơng lam, hơ̆ sồng kwang đơng lam ling sền gàr tiah nhàr dà lơgar dê tai, den làng bol chờ hờp ngan. Bơh hơ̆ lơh gơlik nùs nhơm rềp mềr đah cau ling sền gàr tiah nhàr dà lơgar mờ làng bol tàm tiah nhàr dà lơgar. Làng bol gơtùi geh sa tềp chờ hờp, ram mhŭ, gơboh gơbài.”

Nàng bơta chờ hờp sa tềp tus mờ jơh tơl nă làng bol tàm tiah nhàr dà lơgar, sa tềp bơhiàn Ñâm Zần nam do, gah đơng lam mpồl ling sền gàr tiah nhàr dà lơgar càr Kon Tum tam pà kes priă, pà 300 kĭ phe mbar ai tơl pôs ling sền gàr tiah nhàr dà lơgar in jat kềng gah gùng nhàr dà lơgar mờ 2 lơgar Lào, Campuchia nàng lam lơh Ngai chờ klơm mbar kơnâm tơlir. Kwang bàng, cau ling ală pôs đồng kung tam pà bơta dong kờl he dê nàng blơi 2, 3 bơta phan sa ngui sa pal geh nàng lùp còp, dong kờl di tŭ ai ală hìu bơnhă geh rài kis kal ke in, ờ lời ală hìu bơnhă do ờ geh sa tềp. Bơdìh hơ̆ tai, broă lơh “Sơnam pa tiah nhàr dà lơgar ram nùs làng bol tàm ƀòn” geh bơyai lơh tàm jơh 13 xã tiah nhàr dà lơgar bơh 4 kơnhoàl Đăk Glei, Ngọc Hồi, Sa Thầy mờ Ia H’Drai mờ ală broă lơh ngan ngồn neh pơgồp bơnah tơnguh tai bơta chờ hờp, tơnguh tai bơta rềp mềr nùs nhơm ling klàng làng bol tàm tiah nhàr dà lơgar. Đại tá Lê Minh Chính, Cíñ ủy Mpồl ling sền gàr tiah nhàr dà lơgar càr Kon Tum pà git: “Tàm broă lơh do, bơyai lơh uă ngan broă lơh, ờ mìng là broă lơh lùp còp, pà phan ai ală hìu bơnhă geh sră dong kờl bơh dà lơgar, hìu bơnhă rƀah in mờ gam bơyai lơh ală broă lơh dong kờl broă lơh sa mờ phan bơna ai ală hìu bơnhă geh rài kis kal ke in. Mờ kung bơyai lơh ală broă lơh niam chài, đơs crih tamya, ală bơta nhơl ñŏ bơh yau nàng làng bol in geh dùl nùs nhơm wă rò sơnam pa chờ hờp bal mờ nùs nhơm jơh tơl nă cau ndrờm geh dờp wil tơl dùl sa tềp, ờ cau lơi gơtìp lời wơl hờ ngkời.”

Đại tá Lê Minh Chính, Cíñ ủy Mpồl ling sền gàr tiah nhàr dà lơgar càr Kon Tum pà phan sa tềp ai gơnoar atbồ mờ làng bol xã Đăk Plô, kơnhoàl Đăk Glei

Bal mờ bơta chờ hờp wă rò sa tềp bơhiàn Ñâm Zần 2022, tàm jơh gùt gơl gùng tiah nhàr dà lơgar jòng rlau 292 kơi sồ rềp mờ 2 lơgar Lào, Campuchia, làng bol tàm 99 thôn, ƀòn gơ wèt 13 xã bơh 4 kơnhoàl dê tàm càr Kon Tum gam geh uă bơta chờ hờp nàng pin dờn mut tus nam pa. Tus tŭ do neh geh 4 tàm 13 xã tiah nhàr dà lơgar bơh càr Kon Tum dê tơl khà ƀòn lơgar pa. Rài kis bơh rlau 16 rbô 200 hìu bơnhă làng bol dê bal mờ 25 jơi bơtiàn kòn cau oh mi ơm kis bal ngai sơlơ geh tam gơl, bơtàu tơnguh, khà hìu bơnhă rƀah gơmù mhar. Sa tềp bơhiàn jơi bơtiàn dê là tŭ nàng kwang bàng, cau ling sền gàr tiah nhàr dà lơgar càr Kon Tum bal mờ gơnoar atbồ, làng bol sơlơ tơrbŏ kơ̆ rlau tai nùs nhơm tam klac bal, pơgồp bal bơta pràn, dùl nùs bal sền gàr kơ̆ kơljap gơnoar tờm ù tiah, bơta lơngap lơngai tiah nhàr dà lơgar mờ bơtàu tơnguh lơh sa mpồl bơtiàn, bơtàu tơnguh rài kis làng bol tàm tiah nhàr dà lơgar bơh dà lơgar dê.

Cau mblàng K’Duẩn