VOV4.K’ho- Jăt Jơnau yal “Rƀah uă bơta Việt Nam nam 2021” digơlan geh tai 10 tơlak nă cau geh dờp bơta dong kờl bơh ală broă lơh dong kờl bơh dà lơgar dê mờ broă lơh jơnau kờñ bơh Cíñ phủ dê bè sền gàr dong kờl mpồl bơtiàn mờ tơrmù rƀah tàm tơngai bơh nam 2021- 2025. Bal mờ jơnau kờñ tơn jơh jơgloh tơrmù rƀah, ngan là tàm ală tiah sar lơgar ngài, bơh nam 2020, Cíñ phủ neh geh dùl Broă lơh Jơnau kờñ Dà lơgar dê lời is ai tiah làng bol jơi bơtiàn kòn cau dùl êt nă cau mờ tiah kơh bơnơm in. Bơh 2 nam pơgồp bal đah 10 anih lơh broă, ƀộ, ngàñ, gĭt nđờ jơ̆t tiah tàm gùt lơgar, broă lơh neh lơh ală broă lơh kwơmàng nàng lơh jăt jơnau kờñ “Ờ lời cau lơi gơtìp sơrbì lời ơm wơl hờ ngkời”.

Bơh là dùl hìu bơnhă jơgloh rƀah sùm, hìu bơnhă bi Lò Thị Da ơm tàm xã Quang Chiểu, kơnhoàl Mường Lát neh geh dong kờl sơntìl chi tam, phan ròng bơh Broă lơh tơrmù rƀah bơh tiah do dê. Tơnơ̆ 5 nam lơh jăt, tus tŭ do, hìu bơnhă bi neh geh kờp jơh phan puan jơng mờ phan bàr nơm jơng gơguh tus gĭt nđờ rhiang nơm, bal mờ sươn chi sa plai, pah nam gơ ain priă jền gĭt nđờ tơlak đong, gơ gơs là hìu bơnhă tơl ngui tơl sa ngan bơh ƀòn dê. Bi Lò Thị Da, yal: Kơnờm geh bơta dong kờl bơh tiah do dê den tàng añ ờ huan đau kơlôi rơcăng ir bè priă bơcri lơh sa, mìng ròng phan, tam phan, kung ƀươn ƀoài sơl tài bơh añ ờ geh priă bơcri lơh sa mơya geh dong kờl sơntìl chi tam, phan ròng. Bè bơta chài den kung geh dong kờl bơh sră pơ àr, kwang bàng bơto pơlam bơta chài nàng he in lơh jăt.

Rwah hìu bơnhă lơh tơrlòng lài pơnrơ jak lơh krơh mờ rề ơnàng lơh uă là dùl tàm ală broă mờ càr Thanh Hoá dê lam lơh jăt Broă lơh Jơnau kờñ dà lơgar lời is ai tiah làng bol jơi bơtiàn kòn cau dùl êt nă cau mờ tiah kơh bơnơm in. Ồng Hà Văn Thủy, Phó Ƀí thư Duh broă sùm Huyện ủy Quan Hoá, pà gĭt: Pal tam gơl bơta kơlôi sơnơng, broă lơh tàm tŭ lơh jăt broă lơh, rơndăp broă lơh; tơrgùm mblàng yal, hòi jà lam sồr, lơh krơh kwang bàng, đảng viên, sơrbì bồ tơngoh kơlôi sơnơng kơ̆p kơldìng wơl tàm Dà lơgar. Ồng Hà Văn Thủy, đơs: Lài do, dong kờl ai gời, pà gời mơya jơnau kờñ tŭ do là làng bol pal lòt bal mờ broă lơh rơndăp broă lơh, rwah ală cau tơl jơnau sồr, tơl bơta. Tŭ do, bơta ai nàng dong kờl tơn tơrmù tơrgùm bơcri priă dong kờl bơtàu tơnguh kơnhoàl ù tiah, bơtàu tơnguh lơh sa- mpồl bơtiàn, ai tơl bơta bơtàu tơnguh lơh sa kơ̆ kơl jăp.

Dà K’nàng là xã bơh sơnrờp bơh kơnhoàl Dam Rong, càr Lâm Đồng dê geh dờp xã klàs bơh rƀah

Broă lơh Jơnau kờñ dà lơgar dê lời ai tiah làng bol jơi bơtiàn kòn cau dùl êt nă cau neh geh Quôk hội ring bal tàm Kơrnoăt sồ 120 ngai 19/06/2020. Gùng dà tam pà priă bơcri lơh neh geh Ủy ƀan Thường vụ Quôk hội kĭ tàm ngai 22/05/2022. Do là Broă lơh dờng ngan, dơ̆ sơnrờp Đảng, Cíñ phủ lời priă jền mờ bơta sền gròi dờng màng ngan, đòm pơn jăt bơta bơtàu tơnguh broă lơh dong kờl jơi bơtiàn kòn cau tàm tơngai lài do dê. Jăt Ƀộ trưởng ătbồ Ủy ƀan Jơi bơtiàn kòn cau Quôk hội dê đơs, den do là Broă lơh dờng màng ngan bal mờ broă lơh dờng: Tơrgùm tàm ù tiah 13 rbô 222 thôn kal ke ir gơwèt 3 rbô 434 xã bơh 51 càr tiah làng bol jơi bơtiàn kòn cau dùl êt nă cau dê. Do là ală tiah làng bol jơi bơtiàn kòn cau geh rài kis lơh sa- mpồl bơtiàn kal ke ngan rlau jơh gùt lơgar, gơ ơm tàm 3 tiah kwơmàng là Tiah ring đah jum măt tơngai mŭt dà lơgar, Tây Nguyên mờ Tiah đah tô mat tơngai mut dà lơgar dê. Ngan den tàng bè hơ̆, broă tơrgùm kờp khà sồ, cribơyai mờ ală tiah nàng sền swì wil tơl, cih tàm jơnau yal gơtùi lơh jăt ngan ngồn tơnơ̆ tŭ geh Kơrnoăt bơh Quôk hội dê là broă lơh pal roh uă ngan tŭ tơngai. Ƀộ trưởng, ătbồ Ủy ƀan Jơi bơtiàn kòn cau Quôk hội dê ồng Hầu A Lềnh, pà gĭt: Bè broă pơgồp bal mờ ală ƀộ, ngàñ, mìng is Broă lơh do geh 10 ƀộ, ngàñ tus bal lam lơh jăt. Do là dùl Broă lơh dờng ngan geh 10 rơndăp broă lơh, 14 rơndăp broă lơh dềt bơnah, 36 kơnòl broă. Hơ̆ là 36 broă lơh dong kờl bơh dà lơgar dê, geh bơtòm tơrgùm bal bơh ală broă lơh dong kờl bơh dà lơgar gam geh tơngai lam lơh. Den tàng bè hơ̆, broă bơtòm tơrgùm bal tàm do nàng lơh gơs dùl ròt ală sră nggal bơto pơlam lam lơh jăt Broă lơh là broă lơh roh uă ngan dà kơlhề, tŭ jiơ mờ nền nòn ngan. Tài bơh do là dơ̆ sơnrờp Đảng mờ Dà lơgar lời dùl bơnah priă is den tàng ờ ai gơnoar lơh dùl bă ờ jơh nùs, ờ rơcăng ngăc; kờñ pal geh bơta kờp sền wih kờp sền wơl.

Ƀộ trưởng, ătbồ Ủy ƀan Jơi bơtiàn kòn cau Quôk hội dê ồng Hầu A Lềnh

Bulah kes priă gam uă kal ke mơya Quôk hội, Cíñ phủ neh tơnguh priă jền bơcri lơh ai tơrmù rƀah in tus bàr dơ̆ pơndrờm mờ tơngai lài, sùm sồr lơh nàng kờñ lơh jăt wil tơl broă lơh dong kờl bơta dà lơgar dê tơrmù rƀah, lơh ngan lơh jăt Broă lơh Jơnau kờñ dà lơgar dê bè tơrmù rƀah kơ̆ kơl jăp jŏ jòng jăt gùng dà tơl làm, uă bơta mờ ờ huan gơbàn rƀah wơl; ai tơl bơta ai cau rƀah, hìu rƀah in ƀươn ƀoài  geh dờp ală drơng broă mpồl bơtiàn kờñ pal geh, ngan là tàm ală tiah ƀòn lơgar, tiah kơh bơnơm, tiah bồt bơlào, pơgồp bơnah lơh jăt jơnau kờñ gơguh lơh sa, sền gàr lơngăp lơngai rài kis mpồl bơtiàn, lơh sir jơnau kờñ tơrmù khà hìu rƀah.

Bơnah priă sền gàr lơngăp lơngai rài kis mpồl bơtiàn mờr 62 rbô tơmàn đong bơsong jơnau gơlời wơl bơh kòp dờng Kovid-19 dê, gĭt nđờ tấn phe dong kờl mhar mờ gĭt nđờ rbô tơmàn đong bơh priă ai bơh priă rơcăng lài kes priă dà lơgar dê nàng dong kờl làng bol tiah tàm gùl lơgar bơsong jơnau gơlời wơl “dà kŏ tàm rơndăp tàm rơndồl, mìu càl rbŭt dờng sùm” là broă lơh ngan dờng ngan, di tŭ nàng làng bol in geh dờp gơnoar kis, gơnoar geh kham sơm kòp, gơnoar jòi broă lơh broă sa. Ờ bơta lơi krơi, hơ̆ là ală broă lơh ngan tài gơnoar kòn bơnus bơh Đảng mờ Dà lơgar Việt Nam dê.

            Cau cih Trần Sỹ Đức (VOV1)- Cau mblàng Lơ Mu K’Yến