VOV4.K’ho- Dong kờl cau geh màng mờ dà lơgar in là broă lơh dờng màng ngan tơngŏ nùs nhơm “Hùc dà kah tô dà” bơh Đảng, Dà lơgar dê gơwèt mờ ală cau neh tă pơgồp dà kơlhề, phi să ai broă lơh kăc màng in. Kờp bơh tŭ Củ tịc Hồ Chí Minh ai ngai 27/07 là Ngai Cau ling sồt să- Cau ling chơ̆t màng, 75 nam do, ală kơrnoăt boh lam, broă lơh dong kờl cau geh màng mờ dà lơgar geh lam lơh tơl làm, ờ mìng tơngŏ bơta dong kờl uă ngan bơh Đảng mờ Dà lơgar dê gơwèt mờ cau geh màng mờ dà lơgar mờ gam pơgồp bơnah kwơmàng tàm broă sền gàr ờdo ờdă rài kis mpồl bơtiàn mờ bơtàu tơnguh kơ̆ kơl jăp jŏ jòng dà lơgar dê.

Mờ ală broă lơh dong kờl cau geh màng mờ dà lơgar ngai sơlơ geh lơh sir gơs mờ geh ală anih lơh broă cíñ trị tus bal lam lơh dùl ròt bal, broă lơh sền gàr cau geh màng mờ dà lơgar tam gơl pràn kơldang, lơh gơlik srơh kah rơngal wơl tơm wơl dà kơlhề jrô ơnàng làm uă, sùm sùm bơh kâp dà lơgar tus ală ƀòn lơgar. Tus tŭ do, jơh gùt lơgar neh pà gĭt geh rlau 9 tơlak 200 rbô nă cau geh màng mờ dà lơgar, tàm hơ̆ geh rlau 1 tơlak 300 rbô nă cau geh màng mờ dà lơgar geh dờp bơta dong kờl pah nhai. Pah nam bơsong priă dong kờl dùl dơ̆ ai bơh 6 tus 8 rbô nă cau in, lam rlau 580 rbô nă cau geh màng mờ dà lơgar lòt kham sơm kòp ờs mờng jăt tơngai mờ dong kờl bơto bơtê ai pơgăp 40 rbô nă cau in. Khà dipal dong kờl, dong kờl tai cau geh màng mờ dà lơgar in geh lơh tơnguh dipal mờ tŭ tơngai tam gơl tơnguh khà priă nhai êt ngan pal geh.

Mpồl cau ala măt cau geh màng mờ dà lơgar lòt còp càr lơgar Hà Nội

Jăt Nghị địñ sồ 75, ngai 24/07/2021 bơh Cíñ phủ dê cih khà dờp bơta dong kờl, dong kờl tai mờ ală priă dong kờl cau geh màng mờ dà lơgar in neh tam gơl tơnguh bàr pe khà dong kờl, dong kờl tai ai ală cau cíñ sac in mờ priă tă gơguh tai pơgăp 800 tơmàn đong nàng tam gơl bơtơl pơgăp 10 broă lơh pa ai cau geh màng mờ dà lơgar in mờ cau pròc mhàm cau geh màng mờ dà lơgar in, bè: Dong kờl duh khuai cau ling chơ̆t màng geh lơh tơnguh tai bơh 500 rbô đong tàm dùl nă cau ling chơ̆t màng tàm dùl nam gơguh tus 1 tơlak 400 rbô đong dùl nă cau ling chơ̆t màng tàm dùl nam; priă dong kờl kham sơm kòp tàm hìu bơnhă geh lơh tơnguh bơh 1 tơlak 110 rbô đong tus 1 tơlak 461 rbô 600 đong dùl nă cau dùl nam; priă kham sơm kòp tơrgùm bal kung geh lơh tơnguh bơh 2 tơlak 200 rbô đong tus 2 tơlak 923 rbô 200 đong dùl nă cau tàm dùl nam...Ồng Châu Văn Đa, Kwang ătbồ Cơldŭ lơh broă Cau geh màng mờ dà lơgar gơwèt Sở Lao động, Thương ƀiñ mờ Xã hội càr Trà Vinh, đơs: Lơh jăt broă dong kờl cau geh màng mờ dà lơgar in den càr Trà Vinh tŭ do gam ătbồ mờr 65 rbô nă cau geh màng mờ dà lơgar, tàm hơ̆ rlau 19 rbô nă cau ling chơ̆t màng, mờ cau ling sồt să cau ling kòp tê jê să là rlau 11 rbô nă cau mờ ală cau ndai. Tŭ do, Trà Vinh gam tơm priă dong kờl ai mờr 12 rbô nă cau in, tă tơm priă dong kờl pah nhai jăt ală broă dong kờl gơwèt mờ cau geh màng mờ dà lơgar in. Tŭ do, jăt jơnau cih bơh kơrnoăt boh lam dê, Sở Lao động, Thương ƀiñ mờ Xã hội càr jàu priă ai ală tiah in tă tơm bơh ngai 01 tus ngai 10 pah nhai mờ dơ̆ bàr broă tă tơm geh pơyua bơh ƀưu điện tơm mờ tơm jơh lài mờ ngai 10 pah nhai.

Mò Hồ Thị Châu Loan, Phó Kwang ătbồ Sở Lao động, Thương ƀiñ mờ Xã hội càr Nghệ An pà gĭt: càr tŭ do geh rlau 68 rbô nă cau geh màng mờ dà lơgar, gam ơm dơ̆ 3 tàm jơh gùt lơgar. Pah nhai, kes priă dà lơgar tă tơm priă dong kờl ai cau geh màng mờ dà lơgar in là rlau 136 tơmàn đong. Mò Hồ Thị Châu Loan, đơs: Pah nam, di ngai 27/07, càr kung ai lơh jăt ală broă lơh nàng bơyai lơh ală broă lơh kah kir sơnrai Ngai Cau ling sồt să, Cau ling chơ̆t màng tàm ù tiah jơh gùt càr geh lơh ngan ngồn, geh kwơ ngan mơkung yŭ rơyùm ngan. Bulah là càr gam uă kal ke, mờ cau geh màng mờ dà lơgar uă, mơya bol añ kung sùm lơh ngan nàng lơh jăt niam ală broă dong kờl ai cau geh màng mờ dà lơgar in, lơh geh wil tơl di tŭ. Kah kir sơnrai 75 nam Ngai Cau ling sồt să, Cau ling chơ̆t màng den bơdìh mờ broă lơh sùm ờs mờng pah nam, den nam do, càr gam geh broă lơh, hơ̆ là bol añ bơyai lơh pơrjum tìp măt, jờng rơ cau geh màng mờ dà lơgar pơnrơ ngan tàm ù tiah càr dê.

Bơdìh mờ ală broă dong kờl bơh Đảng, Dà lơgar dê, bơta tơrgùm tê bal bơh mpồl bơtiàn dê mờ hìu bơnhă cau geh màng mờ dà lơgar kung geh sền gròi mờ geh uă broă lơh ngan ngồn. Mìng kờp is bơh nam 2011, srơh “Kis gĭt jơnau gĭt adat” jơh gùt lơgar neh dờp geh mờr 5 rbô 600 tơmàn đong, lơh pa mờr 39 rbô nơm hìu bơta nđàc, lơh niam wơl mờr 25 rbô nơm hìu bơta nđàc mờ kờp jơh priă tă lơh là mờr 13 rbô tơmàn đong; jơh gùt lơgar geh rlau 4 rbô 100 nă Mè Việt Nam khin cha jak chài gam kis geh ală mpồl dờp ròng siam sền gàr tus jơh rài kis. Tus lồi nam 2020 geh mờr 99% hìu bơnhă cau geh màng mờ dà lơgar geh rài kis ndrờm bal halà jơnhoa rlau mờ rài kis bal bơh làng bol tàm tiah ơm kis dê; 98,7% xã, sơnah ƀòn, thị trấn lơh niam broă lơh cau ling sồt să, cau ling chơ̆t màng, cau geh màng mờ dà lơgar; lơh ngan bơh sơnrờp lơh gơs broă dong kờl hìu ơm gơwèt mờ cau geh màng mờ dà lơgar mờ ờ gam hìu cau geh màng mờ dà lơgar là hìu rƀah.

Ồng Nguyễn Bá Hoan, Thứ trưởng Ƀộ Lao động, Thương ƀiñ mờ Xã hội tìp măt cau geh màng mờ dà lơgar

Ồng Nguyễn Bá Hoan, Thứ trưởng Ƀộ Lao động, Thương ƀiñ mờ Xã hội pà gĭt: Tơngai pa do, broă lơh mpồl bơtiàn lơh bal gơwèt mờ broă ròng siam sền gàr, kham sơm kòp cau geh màng mờ dà lơgar in kung geh lơh niam sơl. Broă hòi jà ală mpồl lơh broă mpồl bơtiàn, ală cau geh nùs nhơm niam sền gròi rài kis cau geh màng mờ dà lơgar in, ròng siam sền gàr Mè Việt Nam khin cha jak chài, hơ̆ sồng sền gàr tiah ơm rlô bĭc bơh cau ling khin cha jak chài chơ̆t màng dê, lơh ală hìu duh khuai cau ling chơ̆t màng...tàm bàr pe tiah geh lơh mờ bơta sền gròi dong kờl bơh ală kâp gơnoar ătbồ mờ ală cau geh nùs nhơm niam, mpồl lơh sa kă bro mờ ală cau dùl nă să is dê. Di tàm dơ̆ tơngkah kir sơnrai 75 nam, ală kâp gơnoar ătbồ neh sền gròi, tă git nđờ rhiang tơmàn đong bơh kes priă kâp dà lơgar, kes priă kâp ƀòn lơgar hơ̆ sồng hòi jà tă pơgồp tai bơh ală priă jền ndai bơh mặt trận dà lơgar Việt Nam, ală mpồl, ală cau lơh sa kă bro nàng sền gàr, ròng siam, kham sơm kòp ai cau geh màng mờ dà lơgar in mờ añ pin dờn là broă lơh do pơn jăt tai geh sền gròi mờ geh lơh pràn tàm tơngai tus.

            Cau cih VOV1- Cau mblàng Lơ Mu K’Yến