VOV4.K’ho- Ală ngai mờr sa tềp bơhiàn Ñâm Zần 2022, tŭ tơl nă cau rơcang rê tàm hìu bơ tòm tơrgùm wă rò sa tềp bal mờ hìu bơnhă là tŭ ală kwang bàng, cau ling sền gàr tiah nhàr dà lơgar càr Gia Lai đơs bal, mpồl ling sền gàr tiah nhàr dà lơgar Ia O đơs is pal ơm wơl tàm tiah nhàr dà lơgar nàng lam lơh niam kơnòl dơ̆ lĕ bal atbồ, sền gàr tiah nhàr dà lơgar mờ rơcang sơndră kòp Kovid-19. Bal mờ hơ̆, mpồl ling kung pơgồp bal mờ kấp ủy, gơnoar atbồ, ală mpồl, gah broă lơh, ală tiah gròi sền ai làng bol tiah nhàr dà lơgar in wă rò dùl nam pa chờ hờp, ram mhŭ.

Gùng gròi sền tiah nhàr dà lơgar Ia O, xã Ia O, kơnhoàl Ia Grai, càr Gia Lai ală ngai mờr sa tềp bơhiàn bềng lìu ƀô thồm bơh bơkàu điều dê tàm tơngai lì bơkàu. Bal mờ ală cau ling sền gàr tiah nhàr dà lơgar tàm gơl gùng gròi sền kơrluk kơrlăk, rơ kuet rơ ke bal mờ thul kơmbuh bơh ù pơrhê bazan, bol hi tus njrong tiah nhàr dà lơgar sồ 25 bơh Pôs ling sền gàr tiah nhàr dà lơgar Ia O atbồ. Njrong tiah nhàr dà lơgar ơm kơ̆ kơljap tàm tiah nhàr dà lơgar dờng ơning ơnàng, gùt dar là dà dờng Pô Kô. Đại úy Nguyễn Đức Võ, kwang bàng geh ai bơh Mpồl đơng lam ling klàng kơnhoàl Ia Grai tus Pôs ling sền gàr tiah nhàr dà lơgar Ia O yal, do là sa tềp sơn rờp bi ơm ngài hìu nàng wă rò sơnam pa tàm tiah nhàr dà lơgar bal mờ mpồl ling sền gàr tiah nhàr dà lơgar: “Bơh ală ngai añ ơm kis ndo, bơta git gơp đah 2 gah niam ngan. Bè broă lơh sền gàr tiah nhàr dà lơgar kung bè rơcang sơndră kòp Kovid-19 tàm tiah nhàr dà lơgar do. Bol hi bal mờ jơh ală cau ling sền gàr tiah nhàr dà lơgar pơgồp bal niam ngan, kờp jơh bal tàm rài kis kung niam ngan sơl. Lài mờ tŭ geh sồr tus ndo, să tờm añ kung đal git nùs nhơm kơ̆ kơljap, sa tềp do geh ơm wơl tàm tiah nhàr dà lơgar nàng rơcang sơndră bơta dô pồ gan tiah nhàr dà lơgar tìs mờ adat boh lam, kung bè lòt gròi sền, ơm gak nàng sền gàr tiah nhàr dà lơgar. Lơh niam broă lơh dong kờl nàng bol hi iang nùs mờ hìu bơnhă kung iang nùs sơl.”

Ală kwang bàng, cau ling pôs ling sền gàr tiah nhàr dà lơgar Ia O gròi sền tàm tiah nhàr dà lơgar

Lam lơh broă atbồ tiah nhàr dà lơgar mờ rơcang sơndră kòp Kovid-19, sa tềp nam do, ờ mìng mpồl ling sền gàr tiah nhàr dà lơgar, mờ mpồl ling gròi sền tiah nhàr dà lơgar gam geh tai jơh bal mờ ală kwang bàng geh ai tus bơh mpồl ling klàng mờ mpồl griăt ƀòn. Trung tá Vũ Văn An, Trung đội phó Đội Vũ trang, drơng broă tàm anih gròi sền sồ 1 – atbồ, sền gàr tiah nhàr dà lơgar mờ rơcang sơndră kòp Kovid-19, gơ wèt pôs ling sền gàr tiah nhàr dà lơgar Ia O pà git, tài kòp Kovid-19 gơlik geh kal ke den tàng uă nhai do, Pôs ling sền gàr tiah nhàr dà lơgar Ia O sùm gàr bè ờs nền nòn ngan ală mpồl gròi sền jat kềng tiah nhàr dà lơgar. Kwang bàng, cau ling tàm ala gơp ơm gak ngai măng, ờ mìng gàr niam broă lơh rơcang sơndră kòp Kovid-19 mờ gam gàr kơ̆ gơnoar tờm lơngap lơngai tiah nhàr dà lơgar, sền gàr lơngap lơngai tàm ƀòn lơgar: “Broă lơh tàm tơngai lồi nam bơh bol hi dê den kwang đơng lam bồ mpồl ling neh pơlam lơh jat tus tơl nă kwang bàng, cau ling nàng sền gàr lơngap lơngai tàm tiah nhàr dà lơgar đơs bal mờ tàm tiah gròi sền sền bol añ drơng lơh đơs is. Oh mi bol hi đal git 100% kwang bàng, cau ling iang nùs, lơh gơs kơnòl broă, gàr niam tơl bơta lơngap lơngai, ờdo ờdă tàm tiah nhàr dà lơgar. Mblàng yal, hòi jà làng bol lơh jat nền nòn gùng dà, broă lơh bơh Đảng, adat boh lam bơh dà lơgar dê, lơh niam broă lơh rơcang sơndră kòp tàm tiah nhàr dà lơgar.”

Tàm nam 2021, pôs ling sền gàr tiah nhàr dà lơgar Ia O neh tă pơgồp rlau 100 ngai lơh broă dong làng bol lơh sa suơn sre, lơh niam wơl gùng lòt tàm ƀòn.. Tàm dơ̆ sa tềp wă rò nam pa, mờ uă bơta dong kờl, kwang bàng bơh pôs ling dê hòi jà dong kờl git nđờ rhiăng bơnah phan pà ai ală hìu bơnhă kal ke jơi bơtiàn kòn cau dùl êt nă cau tàm ală ƀòn, cau geh màng mờ kac màng. Đơs bè nùs nhơm bơh ală cau ling pôs ling sền gàr tiah nhàr dà lơgar Ia O dê lời ai làng bol in, ồng Nay Pháp, atbồ ƀòn Tăng pà git: “Ù tiah xã dê là tiah nhàr dà lơgar, oh mi ling sền gàr tiah nhàr dà lơgar dong kờl làng bol uă ngan, dờp ròng ală oh dềt, ală cau ờ sô, lơh hìu nùs nhơm pà ai cau rƀah, cau geh màng mờ kac màng in, ală oh mi ling sền gàr tiah nhàr dà lơgar dong kờl priă jền, ai làng bol tus bal tă pơgồp ngai lơh broă. Ală anih ơm gak bơh ling sền gàr tiah nhàr dà lơgar dê gam ơm gak nàng rơcang sơndră kòp, ngan là 2, 3 nhai lài mờ tŭ tàm xã geh kòp, ală cau ling tam pà cau lơh broă dong kờl jơh nùs ngan, tus tŭ do, kòp neh gơtùi kơryan. Ưn ngài ngan ală oh mi cau ling dong xã do in kơryan kòp bơtờp. Mut tus nam pa, kơp kờñ ală cau ling sền gàr tiah nhàr dà lơgar tơnguh, pơn jat tai dong kờl làng bol, dong kờl xã in”.

Ală kwang bàng, cau ling pôs ling sền gàr tiah nhàr dà lơgar Ia O lòt sền njrong tiah nhàr dà lơgar

Thiếu tá Nguyễn Thanh Hà, Phó kwang atbồ pôs ling sền gàr tiah nhàr dà lơgar Ia O pà git, sa tềp do, 100% ling tàm ală mpồl anih gròi sền ờ rê sa tềp tàm hìu. Dờp kơnờm ơm wơl gròi sền tàm sa tềp, jơh ală ndrờm đal git nùs nhơm geh kơnòl jơnhua ngan rlau jơh, ơm gak tàm tiah nhàr dà lơgar ngai kung bè măng: “Tàm tơngai lài mờ tŭ, tàm tŭ mờ tơnơ̆ tŭ sa tềp bơhiàn, gơ wèt mờ kwang bàng pôs ling sền gàr tiah nhàr dà lơgar Ia O, bol hi sùm pơlam lơh jat ală jơnau đơng lam bơh Gah đơng lam ling klàng dê tàm broă rơcang sơndră, kơryan ală bơta cau tìs, ngan là tàm tơngai lài mờ sa tềp. Bol hi sùm đơng lam ală mpồl lơh broă mờng chài git loh broă gơlik geh tàm dơlam mờ bơdìh gùng nhàr dà lơgar nàng geh broă lơh di tŭ sơndră mờ ală bơta cau tìs gơlik geh tàm tiah nhàr dà lơgar. Mpồl đơng lam pôs đồng bol hi sùm đơng lam mpồl lơh broă kấp hơ đơm pơgồp bal mờ gơnoar atbồ tàm ƀòn lơgar tàm broă rơcang sơndră kòp. Bơdìh hơ̆ tai, bol hi kờp jơh ală hìu bơnhă rƀah mờ ndrờm bè cau rƀah nàng bol hi geh ală bơnah phan pà dong kờl tàm dơ̆ sa tềp Ñâm Zần 2022.”

Dùl nam pa tai neh tus tàm tiah nhàr dà lơgar, mơya ală cau ling pôs ling sền gàr tiah nhàr dà lơgar Ia O neh lời wơl nùs nhơm is să tờm dê, kung gam gàr kơ̆ ngkơr phàu nàng ƀòn lơgar in geh wă rò sa tềp ring lơngai.

Cau mblàng K’Duẩn