VOV4.K’ho- Bulah gơtìp gơrềng bơh kòp dờng Kovid-19 mơya pal đơs ngan là pang rùp ƀòn lơgar tiah kơh bơnơm, tiah jơnhoa, tiah làng bol jơi bơtiàn kòn cau dùl êt nă cau gam geh tai ală bơta àng sơrdah pa. Cồng nha lơh geh do là geh bơh bơta pràn bơh bơta tam klăc bal dê bơh tơl nă cau dê tàm hìu bơnhă dờng ală jơi bơtiàn Việt Nam, geh bơh bơta sền gròi bơcri priă bơh Đảng mờ Dà lơgar dê, bơta tàm sơm băt tê bal bơh uă mpồl cau mờ cau dùl nă să is dê.

Bơh tŭ sơnđờm kŭp tê lơh jăt Broă lơh Jơnau kờñ dà lơgar bơ̆t bơtàu ƀòn lơgar pa, rài kis bơh tơl hìu bơnhă làng bol ƀòn Kon Hnông Pêng dê tàm xã Đăk Hring, kơnhoàl Đăk Tô, càr Kon Tum neh geh ală tam gơl uă ngan. Hìu đam rơndăp tăp sèng sàng goh, oh kòn geh mè bèp sền gròi tàm broă bơsram sră. Tàm ƀòn mìng gam ală hìu cau dờng sơnam, cau ơm kis is dùl nă să ờ geh pràn lơh broă gơwèt hìu bơnhă rƀah gam wơl ndrờm là tơl ngui tơl sa mờ pas sơm. Tàm tŭ măt ală hìu bơnhă lơh geh priă jền bơh 100 tơlak tus gĭt nđờ rhiang tơlak đong, bè bi A Phinh, A Cần, A Plo, A Ir...sơlơ jòng, den mat hìu bơnhă rƀah gam ngai sơlơ lơyah wơl. Đơs bè broă bơ̆t bơtàu ƀòn lơgar pa bơh làng bol ƀòn Kon Hnông Pêng dê, ồng Nguyễn Văn Dũng, Ƀí thư Đảng ủy xã Đăk Hring, kơnhoàl Đăk Hà, đơs nền: Gơnoar broă mờ kơnòl bơh làng bol ƀòn lơgar dê tàm do neh geh lơh niam, ngan là gơnoar broă bơh kwang bàng Ƀí thư Ci ƀộ neh đơng lam, sồr Mpồl ătbồ thôn hơ̆ sồng ală mpồl cau tàm hòi jà làng bol tus bal tă pơgồp bơ̆t bơtàu ală broă lơh pơgồp bơnah bơ̆t bơtàu ƀòn lơgar pa bơh xã dê. Bơdìh hơ̆ tai, ală hìu bơnhă kung neh gĭt wă geh broă bơ̆t bơtàu ƀòn lơgar pa mờ mpồl cau tờm là làng bol. Làng bol kung neh dùl nùs bal tus bal tă pơgồp ngai lơh broă mờ bơta pràn lơh broă bơ̆t bơtàu ƀòn lơgar pa.

Lơh jăt Broă lơh Jơnau kờñ dà lơgar bè bơ̆t bơtàu ƀòn lơgar pa, bơh nam 2011 tus tŭ do, làng bol ƀòn Dơk Rơng, xã Glar, kơnhoàl Đăk Đoa, càr Gia Lai neh geh ală tă pơgồp uă ngan. Tàm hơ̆, hòi jà làng bol tă pơgồp bơh kes priă bal bơh ƀòn dê nàng lơh hìu pơrjum ƀòn kung bè lơh ală gùng lòt tàm ƀòn mờ ală broă lơh geh kwơ ndai. Cồng nha do dong xã geh dờp là lơh geh tơl khà ƀòn lơgar pa. Cồng nha do geh bơta tă pơgồp uă ngan bơh làng bol ƀòn Dơk Rơng dê. Ồng Bùi Quang Thoại, Phó Củ tịc Ủy ƀan Ñân zân xã Glar, kơnhoàl Đăk Đoa, càr Gia Lai pà gĭt: Tơnơ̆ tŭ sền swì, lùp sền nền, thôn Dơk Rơng kung neh geh Ủy ƀan Ñân zân kơnhoàl dờp là thôn geh tơl khà ƀòn lơgar pa. Kwơmàng làng bol tàm thôn neh tă pơgồp bè ngai lơh broă, priă jền, pà ù mờ làng bol lòt rê bươn ƀoài ngan. Làng bol neh gĭt geh bơta kwơmàng tàm broă bơ̆t bơtàu ƀòn lơgar pa, lơh ai muh mat ƀòn lơgar in ngai sơlơ tam gơl pa, rài kis làng bol dê ngai sơlơ bơtàu tơnguh rlau.

Bal mờ làng bol Tây Nguyên, làng bol kis tàm tiah kơh bơnơm, tiah kơnhoa, tiah sar lơgar ngài tàm làm gùt ù tiah dà lơgar he dê neh sùm pin dờn mờ tơrgùm bal pràn dùl nùs bal lơh jăt ală jơnau sồr, gùng dà, broă lơh bơh Dà lơgar tus ƀòn lơgar, geh bal tàm ală tŭ kal ke, bè tŭ gơtìp kòp dờng Kovid-19 lơh bơtờp uă ngan. Mờ ală bơta lơi sền gŏ ngai do ai tai bol he in bơta pin dờn tai tàm tơrñang kơ̆ kơl jăp ngan bơh bơta tam klăc dê. Ƀí thư Đảng dà lơgar, Củ tịc Ủy ƀan Mặt trận dà lơgar Việt Nam ồng Đỗ Văn Chiến, neh đơs: Nùs nhơm tam klăc dờng jơi bơtiàn dong ai dà lơgar he in sơrlèt gan jơh ală bơta kal ke, bơta lòng. Bơta lòng pa do gơwèt mờ kòp dờng Kovid-19 là dùl cơng tàng tơngŏ ngan ngồn ngan. Tàm pơgăp tŭ tơngai lơyah ngan, cồng nha lơh geh pal sền dờng màng ngan. Neh geh gĭt nđờ tơlak kơldung phan Tam klăc dờng, kơldung phan ờdo ờdă rài kis, gĭt nđờ jơ̆t rbô tấn phan sa, puăc ka biăp plai chi mờ gĭt nđờ rbô tấn măy mok geh jun pơndiang tus tàm ƀòn dờng Hồ Chí Minh mờ ală càr tiah đah jum dà lơgar nàng tam pà bal bơta kờñ gơboh mờ tam pà bal ală kal ke, bòl glar bơh làng bol dê. Ală rùp hin, ală nùs nhơm niam bơnĕ ngan neh lơh ngoh rơngăc nùs nhơm cau dê. Gơtùi đơs nền, tam lơh jai pha mờ kòp bơtờp pa do là tam lơh jai pha bơh làng bol dê, là bơta pràn bơh mpồl tam klăc dờng jơh gùt jơi bơtiàn dê.

Thủ tướng Cíñ phủ neh geh kơrnoăt kĭ Broă lơh jơnau kờñ dà lơgar tơrmù rƀah kơ̆ kơl jăp jŏ jòng tơngai bơh nam 2021- 2025. Lài hơ̆, 2 Broă lơh jơnau kờñ dà lơgar: Bơtàu tơnguh lơh sa- mpồl bơtiàn tiah làng bol jơi bơtiàn kòn cau dùl êt nă cau mờ tiah kơh bơnơm; mờ Bơ̆t bơtàu ƀòn lơgar pa, kung neh geh Thủ tướng Cíñ phủ kĭ nàng lam lơh jăt sơl. Dùl bơnah priă jền dờng ngan bơh kes priă dà lơgar dê geh lời ai 3 broă lơh kwơmàng do in jăt tơl tŭ tơngai, mờ dùl jơnau kờñ: Tơrmù khà hìu bơnhă rƀah gơmù tus khà lơyah ngan rlau jơh, tơrmù rơhời bơta ờ ring bal đah tiah kơh bơnơm mờ tiah ring, làng bol geh dờp ngui ală cồng nha bơtàu tơnguh bơh dà lơgar dê.

Ală tềl sơñio chờ hờp ai bơta bơtàu tơnguh tơl ală bơta tàm tiah kơh bơnơm mờ tiah jơi bơtiàn kòn cau dùl êt nă cau tàm tơngai tus in. Bồ sơnam pa ai bol he in sơlơ gơn kơnờm tai, là tam klăc bal- dùl nùs bal- ngan ngồn, tiah jơi bơtiàn kòn cau dùl êt nă cau rơ̆p geh uă sơnam pa chờ hờp!

            Cau cih Thanh Tâm- Cau mblàng Lơ Mu K’Yến