VOV4.K’ho- Mìu càl rơbŭt dờng sồ 04 neh lơh ală gùng che ồs đèng tàm ù tiah càr Quảng Nam dê gơtìp ờ diơng kơn jơ̆ ngan, ờ geh đèng tàm uă tiah. Tơnơ̆ tŭ dờp geh jơnau sồr bơh Tổng Kông ty Ồs đèng tiah tàm gùl lơgar, Kông ty Ồs đèng Dăk Nông neh lơh 2 mpồl lam lài tus dong kờl càr Quảng Nam lơh niam wơl gùng che ồs đèng.

PC Dăk Nông lơh niam wơl gùng che ồs đèng tàm Núi Thành, Quảng Nam

Jat hơ̆, gĭt nđờ jơ̆t nă kwang bàng, kông ñân bal mờ tơl làm rơndeh rơndồ, phan ngui lơh broă, phan bơna, măy mŏk lơngap lơngai, broă lơh dong kờl.... neh tus kơnhoàl Núi Thành, càr Quảng Nam bơsong jơnau gơ lời wơl tơnơ̆ mìu càl rơbŭt dờng.

PC Dăk Nông lơh niam wơl gùng che ồs đèng tàm Núi Thành, Quảng Nam

 Tàm tiah do, gơ lơh bè jơh ală gùng che ồs đèng hạ thế gơtìp càl pồt gơ pừ, uă jrong đèng pă pừ, gùng che đèng tăc, ngơr bam tàm dà... Ală kông ñân neh mhar lòt sền ù tiah, geh gùng dà broă lơh bơsong, tàm pà gơ gơs ală mpồl lơh ală broă lơh gàr niam bơta lơngap lơngai, mhar ngan rlau jơh. Kông ñân PC Dăk Nông ờ rơngòt lơh broă tàm trồ mìu, trồ tơngai duh lơh broă sùm gan tŭ tơngai nàng pơgồp bơnah gờñ lơh niam wơl, pờ gùng đèng wơl ai làng bol càr Quảng Nam in.

Kông ñân Ồs đèng Dăk Lăk gam sơn tơ̆p jrong đèng tàm kơnhoàl Tiên Phước, Quảng Nam

Bàr mpồl lam lài bơh Kông ty điện lực Dăk Lăk bal mờ geh tơl phan lơh broă kung neh lòt gùng nàng tus dong kờl càr Quảng Nam lơh niam wơl gùng che ồs đèng neh gơtìp ờ niam tơnơ̆ mờ mìu càl dờng sồ 04. Ală kwang bàng, cau lơh broă neh bơyai lơh gơs uă mpồl lơh broă nàng tus bal tơmù bơta ờ niam tàm ală kơnhoàl Tiên Phước, Phú Ninh mờ ƀòn dờng Tam Kỳ, càr Quảng Nam.

Kông ñân Ồs đèng Dăk Lăk gam sơn tơ̆p jrong đèng tàm kơnhoàl Tiên Phước, Quảng Nam

Tàm tiah gơtìp, ală cau lơh broă neh sơrlèt mờ ală kal ke bè ù tiah, trồ tiah, lơh jăt broă tơntào wơl ñjrong ồs đèng neh gơtìp pă, gơpừ, duĭ wơl che ồs đèng gơtìp tăc, lơh niam wơl ală anih biến áp... lơh ngan lơh gơs ală kơnòl geh jào mhar ngan.

VOV Tây Nguyên- Cau mblàng Ndong Brawl mờ K’Hạnh