VOV4.K’ho - Dờp bal jơnau hòi jà bơh Ủy ƀan Mặt trận Dà lơgar Việt Nam ƀòn dờng Hà Nội, anih lơh broă Thàñ ủy Hà Nội neh bơyai lơh lam sồr tă pơgồp kes priă “Tài dà lềng, bồt dà lềng Việt Nam” nam 2022.

Mờ nùs nhơm bal mờ kơnòl tài dà lềng, bồt dà lềng dà lơgar, tơl nă kwang bàng, kông cứk, viên cứk, cau lơh broă tàm ală anih lơh broă tă dong kờl ờ uă ngan 1 ngai priă nhai. Kờp jơh khà priă lài ngan neh tă geh là rơlao 130 tơlăk đong. Lài mờ hơ̆, ngai 01 nhai 3, Ƀan Thường trực Ủy ƀan Mặt trận Dà lơgar Việt Nam ƀòn dờng Hà Nội neh tơlik jơnau hòi jà dong kờl kes priă “Tài dà lềng, bồt dà lềng Việt Nam” nam 2022 pơyoa tus ală anih lơh broă, mpồl lơh broă, mpồl lơh sa kă bro bal mờ làng bol Càr lơgar. Broă lơh do kờñ tơnguh bơta pràn, nùs nhơm tam klăc bal gùt jơi bơtiàn kòn cau; pơn jăt tai tơlik nùs nhơm niam, kơnòl bơh kwang bàng, cau ling bal mờ ală làng bol Càr lơgar mờ dà lềng, bồt dà lềng Việt Nam mờ geh tai priă nàng dong kờl lơh ală broă lơh geh kwơ, pơgồp bal tàm broă tơnguh uă rài kis phan bơna, nùs nhơm bơh ling klàng bal mờ làng bol tàm ală tiah dà lềng, bồt dà lềng dà lơgar dê.

Cau mblàng Ndong Brawl