VOV4.K’ho - Drim òr (17/02), Thủ tướng ồng Phạm Minh Chính neh tus Pơrjum tơn jơh ing broă lơh dà lơgar tơmù hoàc huơr bơh bồm mền tơnơ̆ mờ rài tam lơh tàm lơgar Việt Nam tơngai bơh nam 2010 tus 2020 mờ wèt tus kơnòl tơngai bơh nam 2021 tus 2025.

  Thủ tướng ồng Phạm Minh Chính tus pơrjum tơn jơh ing broă tơmù hoàc huơr ƀồm mền tơnơ̆ mờ rài tam lơh

Tơnơ̆ mờ 10 nam lơh jăt broă lơh do, broă tơmù hoàc huơr tơnơ̆ mờ rài tam lơh đơs bal, tàm hơ̆ geh broă tơmù hoàc huơr bơh ƀồm mền neh geh lơh geh cồng nha mờ geh uă cồng nha kwơ màng. Kờp jơh khà priă lơh jăt tàm 10 nam là rơlao 12 rơbô tơmàn đong, tàm hơ̆, kes priă tàm lơgar rơlao 10 rơbô tơmàn đong mờ priă dong kờl ờ tơm wơl bơh lơgar bơdìh rơlao 2 rơbô tơmàn đong. Uă broă lơh tờm drơng tàm broă tơnguh bơtàu lơh sa, mpồl bơtiàn dà lơgar geh lơh tàm uă tiah neh geh rồ kloh ƀồm mền, phan bơrtoh. Rơlao 5 rơbô nă cau gơtìp ƀồm mền mờ ală cau gơtìp aniai ndai neh geh dong kờl broă lơh sơnơm, bơto broă lơh, ai broă lơh, dong kờl phan ròng, phan tam nàng tơnguh bơtàu lơh sa mờ khà rơlao 50 tơmàn đong.

Cau mblàng Ndong Brawl