VOV4.K’ho- Drim ngai 13/4, tàm ƀòn dờng Kon Tum, Tổng Kông ty Tân Cảng Sài Gòn (Quân củng ling dà lềng) pơgồp bal mờ Ƀan Tuyên giáo Tỉñ ủy Kon Tum bơyai lơh jàu Kơrnuat ròng siam cau tờm pròc mhàm cau ling chơt màng, cau geh màng mờ kac màng mờ jàu priă dong kờl bơsram Sòl àng bơta kơp kờñ nam 2022 ai kơnòm bơsram geh rài kis kal ke sơrlèt gan kal ke brồ guh tàm bơsram sră.

Tàm dơ̆ bơyai lơh, Tổng Kông ty Tân Cảng Sài Gòn neh jàu Kơrnuat dờp ròng siam 10 nă cau tờm pròc mhàm cau ling chơt màng mờ hìu bơnhă geh màng mờ kac màng tàm 4 kơnhoàl bơh càr Kon Tum dê, geh: Kon Plông, Kon Rẫy, Đăk Glei mờ Đăk Hà. Jat hơ̆, pah nhai Tổng Kông ty Tân Cảng Sài Gòn geh dong kờl, lùp còp ală hìu bơnhă di ngai chờ, ngai sa tềp mờ khà priă pah nam ai dùl hìu bơnhă in mờr 22 tơlak đông mờ tơngai dờp ròng siam sơn đờm bơh nhai 4 nam 2022.

Di dơ̆ do, Tổng Kông ty Tân Cảng Sài Gòn kung dong kờl lơh 5 nơm hìu nùs nhơm tàm 2 kơnhoàl Sa Thầy mờ Kon Plông, tơl hìu kờp priă 80 tơlak đông geh tă lơh bơh Kes priă mpồl bơtiàn lơh broă niam bơh Tổng Kông ty dê; Jàu priă dong kờl bơsram Sòl àng bơta kơp kờñ nam 2022 ai 10 nă kơnòm bơsram tàm càr Kon Tum geh rài kis kal ke, sơrlèt gan kal ke brồ guh tàm bơsram sră, tơl bơnah kờp priă 4 tơlak đông.

Cau mblàng K’Duẩn