VOV4.K’ho- Pa do, tàm Hìu lơh broă Quôk hội, Ủy ƀan Thường vụ Quôk hội bơyai lơh Pơrjum lam lơh Broă lơh jat sền bơh Quôk hội dê nam 2023, tàm tơrbŏ pờ tơlik tơn tàm internet mờ 49 mpồl kwang bàng Quôk hội ală càr, ƀòn dờng. Củ tịc Quôk hội ồng Vương Đình Huệ, Phó Củ tịc Quôk hội ồng Trần Quang Phương neh đơng lam pơrjum.

Đơs tàm pơrjum, ală kwang bàng đơs, tàm tơngai lài, broă lơh jat sền bơh Quôk hội dê neh geh sơlơ tơnguh rlau tai mờ geh bơta tam gơl pa, ngai sơlơ tơnguh cồng nha, lơh geh uă cồng nha kuơmàng, geh cau tĕ khà mờ làng bol đơs niam ngan. 

Pơrjum lam lơh Broă lơh jat sền bơh Quôk hội dê nam 2023

Nàng tơnguh cồng nha bơh broă lơh jat sền dê, jat Phó Củ tịc Hội đồng Ñân zân ƀòn dờng Hồ Chí Minh ồng Nguyễn Văn Dũng đơs, pal sơlơ tơnguh broă lơh jat sền là bơta tờm ngan: “Bơt bơtàu broă lơh jat sền di mờ bơta geh ngan, gàr niam bơta ring bal đah ală broă lơh jat sền. Tàm jơnau yal cồng nha jat sền, nghị quyết bè jat sền pal geh ală broă lơh ai tơlik loh làng, geh tŭ tơngai, kơnòl broă lam lơh ngan ngồn bơh ală anih lơh broă, mpồl lơh broă, cau dùl nă să geh gơ rềng dê. Pal geh broă lơh jat sền tơngume bè bơcri priă dà lơgar, broă lơh ai wơl, tơm priă ai ù”.

Nàng lam lơh geh cồng nha broă lơh jat sền bơh Quôk hội, Ủy ƀan Thường vụ Quôk hội dê vnam 2023, Củ tịc Quôk hội ồng Vương Đình Huệ sồr, ală anih lơh broă bơh Quôk hội dê, anih lơh broă geh gơnoar git nền broă tơnguh cồng nha broă lơh jat sền là dùl tơngume kuơmàng, broă tờm ngan tàm broă tam gơl pa mpồl kwang bàng mờ broă lơh bơh Quôk hội Việt Nam dê jat nùs nhơm, gùng dà bơh Đảng dê bè bơt bơtàu dà lơgar gơnoar adat boh lam xã hội cũ nghĩa làng bol dê, tài làng bol, bơh làng bol.

Sơlơ tơnguh rlau tai bơta jat sền bơh Quôk hội dê tàm rơcang sơndră sa kuề sa kuà, broă ờ niam, pơhì pơhà; gròi sền tus tơngume rơcang sơndră sa kuề sa kuà, broă ờ niam, pơhì pơhà đal git do là kơnòl broă sùm, kuơmàng mờ geh lơh tơl làm, loh làng, geh tơngume tờm; broă lơh tờm; tơrgùm tàm ală gah ƀuơn gơlik geh broă ờ niam, mpồl bơtiàn sền gròi bè sa kuề sa kuà, broă ờ niam, bè gơ plơ̆ gơ ruc nùs nhơm cíñ trị, niam chài, rài kis.

Củ tịc Quôk hội ồng Vương Đình Huệ jat sền rơndap broă lơh gùng rơndeh ntoat rat Bến Lức- Long Thành

Củ tịc Quôk hội ồng Vương Đình Huệ sồr, lơh sir kơrnuat pơgồp bal đah Quôk hội mờ ală mpồl lơh broă đảng, Mặt trận dà lơgar Việt Nam, ală mpồl lơh broă cíñ trị- mpồl bơtiàn tàm broă lơh jat sền bơh tơl anih lơh broă dê, lơh gơlik bơta tàm pơgồp bal sơlơ tơnguh cồng nha, bơta niam gròi sền gơnoar broă; mhar kờp sền, tơn jơh, sền sơ wì mờ kơlôi sơnơng  jơnau sồr tam gơl, bơ tơl 2, 3 jơnau cih bơh adat boh lam dê bè broă lơh jat sền. Lam lơh niam broă ai sră pin dờn gơ wèt mờ ală gơnoar broă bơh Quôk hội pồ, ring bal.

Củ tịc Quôk hội đơs nền, tam gơl pa, tơnguh bơta niam, cồng nha broă lơh jat sền là bơta neh, gam gehQuôk hội, Ủy ƀan Thường vụ Quôk hội lam lơh mờ ai tơnggŏ bơh ală tam gơl tàm bồ tơngoh kơlôi sơnơng mờ broă lam lơh nàng kờñ pơgồp bơnah tơnguh bơta niam, cồng nha bơh mpồl kwang bàng duh broă dà lơgar: “Jat sền pal jat nùs nhơm lơh ngan bơt bơtàu: đah “bơt bơtàu” mờ “rơcang sơndră” den bơt bơtàu kung gam là kuơmàng, jŏ jòng; rơcang sơndră là jơh nùs, kràñ cê, jal mhar; pal ngui niam ală broă lơh niam, krơh cau niam, broă niam; sền sơ wì ring bal, song dơpă nàng pơn jat tai lơh sir kơrnuat, ală adat boh lam, pơn jat tai tơnguh cồng nha broă lam lơh jat, pơgồp bơnah tàm bơtàu tơnguh lơh sa- mpồl bơtiàn mờ bơt bơtàu dà lơgar. Bơt bơtàu adat boh lam là nàng lơh gơlik mờ bơtàu tơnguh, broă lơh jat sền kung bè hơ̆ sơl”.

Củ tịc Quôk hội đơs nền, Quôk hội sùm tam gơl is, den tàng, tơl anih lơh broă bơh Quôk hội dê pal lơh niam broă jat sền is, tơl kwang bàng Quôk hội pal gròi sền is broă lơh bơh să tờm he dê tàm tŭ lam lơh jat kơnòl broă, gơnap gơnoar tềng đap cau tĕ khà nàng ngan ngồn “lơh gơs dùl tŭ tơngai pa bềng bơta kơp kơnờm niam bơnĕ tàm broă lơh Quôk hội” bè bơta kơp kơnờm bơh Tổng Ƀí thư ồng Nguyễn Phú Trọng dê đơs nền tàm dơ̆ mut pơrjum dơ̆ 1, Quôk hội khoă 15.

Tơnơ̆ pơrjum, Củ tịc Quôk hội ồng Vương Đình Huệ mờ mpồl kwang bàng bơh dà lơgar dê neh lòt sền, jat sền broă lam lơh jat ală Nghị quyết bơh Quôk hội dê gơ wèt mờ rơndap broă lơh bơcri priă lơh gùng rơndeh ntoat rat Bến Lức- Long Thành mờ ƀlàng rơndeh par Long Thành. Nàng lơh gơs di tŭ tơngai neh ai tơlik, gơ wèt mờ kwang đơng lam bồ càr Đồng Nai, Củ tịc Quôk hội ồng Vương Đình Huệ sồr, càr Đồng Nai pal tơrgùm uă ngan rlau jơh, bơsong jơh broă lơh ai ù, jàu ai cau bơcri priă in, lơh sră ngui ù; pơn jat tai sền gròi bơcri priă lơh sir ală broă lơh phan bơna kuơmàng drơng làng bol, sền gròi tus bơto bơtê broă lơh nàng làng bol in geh bơta ƀuơn tàm broă jòi broă lơh, dong làng bol geh rài kis ndrờm halà jơnhua rlau mờ tiah ơm yau.

Cau mblàng K’Duẩn