VOV4.K’ho- Poh lài, Củ tịc Quôk hội ồng Vương Đình Huệ neh đơng lam pơrjum pờ tơlik tơn tàm internet lam lơh broă lơh Hội đồng Ñân zân ală càr, ƀòn dờng tiah đah tô dà lơgar nam 2022. Ala mat kwang đơng lam bồ ală càr, ƀòn dờng, ƀộ, gah broă lơh mờ rlau 200 nă kwang bàng bơh 25 càr, ƀòn dờng tus bal pơrjum. Jơnau sồr geh ai tơlik tàm nam 2022 là pơn jat tai tơnguh cồng nha lơh broă bơh Hội đồng Ñân zân ală kấp dê.

Tàm pơrjum, ală jơnau đơs bơh ală kwang bàng dê neh cribơyai ală mờng chài, cồng nha broă lơh gơnap gơnoar kuơmàng bơh Hội đồng Ñân zân dê bè broă lơh gròi sền, tìp mat cau tĕ khà, lơh nền ală broă kuơmàng bơh ƀòn lơgar dê; mờ kung ai tơlik ală jơnau sồr, ală jơnau dan nàng tơnguh jơnhua rlau tai cồng nha lơh broă bơh Hội đồng Ñân zân dê. Mò Phùng Thị Hồng Hà, Phó Củ tịc Thường trựk Hội đồng Ñân zân ƀòn dờng Hà Nội geh jơnau dan: “Dan Ủy ƀan Thường vụ Quôk hội đơng lam, ai tơlik ală jơnau sồr bè cế tài tơnơ̆ sền gròi, cih bè kơnòl broă bơh cau atbồ mpồl geh sền gròi dê tàm broă lơh jat ală jơnau pơn dut sền gròi bơh Hội đồng Ñân zân ƀòn dờng, quận, kơnhoàl, thị xã dê, kuơmàng là tàm broă gròi sền broă lơh bơh Ủy ƀan Ñân zân, Củ tịc Ủy ƀan Ñân zân sơnah ƀòn tàm ală quận, thị xã; nàng gàr Củ tịc Ủy ban Ñân zân sơnah ƀòn lơh jat di kơnòl broă, gơnap gơnoar geh jàu; pleh bơta sền ờ sơp tàm tŭ lơh broă tŭ ờ geh Hội đồng Ñân zân sền gròi”.

Gùt anih pơrjum

Ồng Sùng A Hồ, Thường trựk Hội đồng Ñân zân càr Lai Châu đơs là, tàm bơta geh ngan lơh broă bơh Hội đồng Ñân zân dê, geh uă broă kuơmàng halà jal mhar, gơlik geh đah 2 dơ̆ pơrjum gơ rềng tus broă lam lơh kơnòl broă bơtàu tơnguh lơh sa- mpồl bơtiàn, sền gàr dà lơgar- sền gàr lơngap lơngai tàm càr pal lơh nền mơ. Tàm tŭ hơ̆, jat jơnau cih bơh ală adat boh lam mờ ală sră nggal pơlam lơh jat jơnau cih adat boh lam dê, kơnòl do gơ wèt gơnap gơnoar lơh nền bơh Hội đồng Ñân zân dê, den pal kơp tus pơrjum bơh Hội đồng Ñân zân càr dê den hơ̆ sồng sền sơ wì, lơh nền. Ồng Sùng A Hồ geh jơnau đơs: “Quôk hội, Cíñ phủ pal kơlôi sơnơng ai tơlik sră nggal cih loh gơnap gơnoar bơh Thường trựk Hội đồng Ñân zân càr dê gơ rềng tus broă sền sơ wì, lơh nền ală broă gơlik geh đah 2 dơ̆ pơrjum Hội đồng Ñân zân. Kờp sền, cih mùl màl rlau ală tơngume kuơmàng pal geh bơta tam pà gơnoar halà jàu gơnoar ala mat ai Thường trựk Hội đồng Ñân zân in sền sơ wì, lơh nền đah 2 dơ̆ pơrjum, ngan là ală tơngume gơ rềng tus gùng dà bơcri priă, atbồ ù tiah, ală broă jal mhar gơlik geh; cih mùl màl broă lơh, rơndap sap sèng lam lơh kơnòl broă geh Hội đồng Ñân zân jàu bơsong đah 2 dơ̆ pơrjum mờ kơnòl bơh Thường trựk Hội đồng Ñân zân dê tŭ lơh nền ală broă hơ̆”.

Đơs tơn jơh pơrjum, Củ tịc Quôk hội ồng Vương Đình Huệ tơngkah, pơn jat tai pơlam lơh jat, git loh gơnap gơnoar, kơnòl broă bơh Hội đồng Ñân zân, Thường trựk Hội đồng Ñân zân, ală Ƀan Hội đồng Ñân zân, mpồl kwang bàng Hội đồng Ñân zân mờ kwang bàng Hội đồng Ñân zân dê jat jơnau cih bơh Adat tam gơl, bơtơl 2, 3 bơta bơh Adat rơndap broă Cíñ phủ mờ Adat rơndap broă gơnoar atbồ kấp hơđơm, ngan là gơ wèt mờ ală kwang bàng pa tus bal dơ̆ sơn rờp là kwang bàng Hội đồng Ñân zân: “Pơn jat tai kờp sền, bơt bơtàu halà lơh sir mờ lam lơh jat rơndap broă pơn jat tai tam gơl pa, tơnguh cồng nha pơrjum Hội đồng Ñân zân, broă lơh tìp mat tĕ tĕ khà, lùp mờ hơ jơnau lùp nàng lam lơh niam ngan rlau jơh kơnòl broă, gơnap gơnoar bơh Hội đồng Ñân zân càr, ƀòn dờng dê jơh bal bè rơndap broă mờ gàr niam lơh jat Sơnua boh lam mờ adat boh lam; bơt bơtàu gơnoar atbồ broă lơh cau lơh broă, ai sră đùh pin dờn gơnoar broă, đùh sră pin dờn gơnoar broă; lơh nền ală broă kuơmàng tàm ală gah mờ sền gròi broă lơh jat Sơnua boh lam mờ adat boh lam tàm kấp hơ đơm. Broă tam gơl pa, tơnguh pràn jak, cồng nha lơh broă bơh Hội đồng Ñân zân dê pal lơh jat broă lam lơh jat Nghị quyết pơrjum dờng Đảng gùt lơgar mờ pơrjum dờng Đảng ƀộ càr, ƀòn dờng. Pal ơn mờ sền kwang bàng Hội đồng Ñân zân là tờm, bơta niam mờ broă lơh bơh kwang bàng Hội đồng Ñân zân dê lơh nền tus bơta niam, cồng nha bơh broă lơh Hội đồng Ñân zân dê đơs bal. Tơl broă lơh nền gơ rềng tus kấp hơ đơm jat gơnap gơnoar pal ai làng bol, mpồl lơh sa kă bro lơh tờm, ơn bơta kuơ dà lơgar, jơi bơtiàn dê lài ngan rlau jơh”.

Củ tịc Quôk hội ồng Vương Đình Huệ đơs pơn dut pơrjum

Củ tịc Quôk hội ồng Vương Đình Huệ sồr, bơh mờng chài bơh Quôk hội mờ Hội đồng Ñân zân 2, 3 càr, ƀòn dờng dê lam lơh kờp sền, bơt bơtàu, yal kấp ủy dùl kấp bal ring bal gùng dà halà Hội đồng Ñân zân ai tơlik Nghị quyết bè broă lơh bơt bơtàu ală sră nggal pơlam lơh jat jơnau cih adat boh lam ai jơh gùt tơngai lơh broă in nàng rơcang lài bơh gờñ, bơh ngài tàm bơt bơtàu, lơh sir tơngume, thể cế bơt bơtàu bơtàu tơnguh lơh sa- mpồl bơtiàn bơh càr, ƀòn dờng dê; sền gròi broă tam gơl gơs thể cế, lam lơh jat ngan ngồn ală nghị quyết krơi is bơh Quôk hội dê gơ wèt tus mờ broă bơyai lơh gơnoar atbồ mờ kơ cế broă lơh krơi is ai 2, 3 càr, ƀòn dờng in.

Cau mblàng K’Duẩn