VOV4.K’ho- Mho ngai 01/6, Quôk hội neh cribơyai tàm hìu pơrjum bè bơ tơl cồng nha lam lơh broă rơndap lơh bơtàu tơnguh lơh sa- mpồl bơtiàn mờ kes priă dà lơgar nam 2021 mờ ală nhai bồ nam 2022.

Tus bal đơs tàm hìu pơrjum, kwang bàng Quôk hội mpồl càr Lâm Đồng ồng K’Nhiễu tă pơgồp jơnau đơs: Tiah jơi bơtiàn kòn cau dùl êt nă cau mờ tiah kơh bơnơm geh bơta kuơ dờng màng ngan tàm broă lơh bơtàu tơnguh dà lơgar kung bè broă lơh kac màng bơh Đảng dê. Quôk hội khóa 14 neh ai tơlik Nghị quyết sồ 120 ring bal gùng dà bơcri priă broă lơh jơnau kờñ dà lơgar bơtàu tơnguh lơh sa- mpồl bơtiàn tiah jơi bơtiàn kòn cau dùl êt nă cau mờ tiah kơh bơnơm tơngai bơh nam 2021 tus nam 2030. Cíñ phủ neh đơng lam kràñ cê ngan, jơh nùs ngan ală ƀộ, gah broă lơh lam lơh mờ lơh jat. Ồng K’Nhiễu dan Cíñ phủ, Thủ tướng Cíñ phủ sền gròi, đơng lam ală ƀộ, gah broă lơh geh gơ rềng pal geh dùl bơta lơh ngan cíñ trị uă ngan rlau jơh tơrgùm priă jền, cau lơh broă, dà kơl hề, bồ tơngoh jak nàng lam lơh broă lơh, lơh ngan tă 100% priă bơcri bè broă rơndap lơh neh geh jàu.

Cau mblàng K’Duẩn