Deh mờ dờng tàm ƀòn lơgar geh bơhiàn kăc màng Nghệ An, klau pơnu  Hoàng Ngọc Linh deh nam 1982, tơnơ̆ tŭ jơh bơsram kấp pe, neh cih is sră dan lòt ling. Jơh 2 nam lơh kơnòl broă ling klàng, bi pơn jat tai jat bơsram tàm Hìu bơsram Kao đẳng Ling klàng lơh sơnơm 2 ƀòn dờng Hồ Chí Minh. Jơh bơsram mờ sră cơng tàng jơh bơsram jăk, bi geh ai lơh broă tàm Mpồl ling sền gàr tiah nhàr lơgar càr Gia Lai. Nam 2018, Hoàng Ngọc Linh geh ntrờn rê lơh broă tàm Pôs đồng ling sền gàr tiah nhàr lơgar Ia R’vê, kơnhoàl Ea Súp, càr Dăk Lăk drơng broă cơl dŭ kham sơm kòp ling klàng làng bol lơh bal, lơh broă kham sơm kòp pràn kơl dang să jan ai ală kwang bàng, cau ling bơh pôs đồng mờ làng bol tàm xã in.

Thượng úy Hoàng Ngọc Linh đơs: Mùl gŏ ngan tàm tiah nhàr lơgar dê bè kàl mìu den sùm gơlik geh kòp sốt xuất huyết, ai kàl prang den kòp jê ndul gơ jroh, è mhàm, as sồt gùng tă nhơm... mờ pah ngai geh bơh 10 tus 15 nă cau tus kham mờ ndrờm geh bol añ sơm bời jơh lơm. Pah nam tơrgùm wơl den geh rlau 4 rơbô nă cau kòp geh sơm bời di tŭ. Bulah gal ngan bè hơ̆ mơya dong kờl lơh pràn kơl dang să jan ai làng bol in den jơh oh mi bol añ ndrờm chờ hờp mờ sùm pơnđơl pàn lơh ngan. Bal mờ broă jơh nùs kham kòp den oh mi gam mblàng yal ai làng bol in bè broă lơh pơs wàs sàng goh hìu đam, lơh jat broă sa sin hùc duh... gàr niam pràn kơl dang să jan.

Ông Vi Văn Ngút 67 sơnam, ơm tàm thôn 5, xã Ia R'vê, kơnhoàl Ea Súp pà gĭt, thôn ơm ngài mờ anih tờm kơnhoàl Ea Sup dê tus rlau 60 kơi sồ, gùng lòt rê kal ke ngan, ngan là tàm kàl mìu. Bơh tŭ geh cơldŭ kham kòp ling klàng làng bol Pôs đồng ling sền gàr tiah nhàr lơgar Ia R’vê dê, làng bol ờ gam lòt gùng ngài nàng kham sơm kòp tai. Ờ mìng bè hơ̆ lơm, kwang bàng ling klàng lơh sơnơm gam lơh ngan tus tơn tàm hìu nàng kham kòp, sơm kòp ai ală cau kòp dờng sơnam mờ kòp kơn jơ̆ in... Kung kơnờm geh cơldŭ kham kòp mờ cau lơh sơnơm Hoàng Ngọc Linh mờ ală cau kòp jŏ nam bè pơ ùr ồng dê neh gơtùi ñă lòt wơl.

Ồng Vi Văn Ngút yal: Pơ ùr añ dê gơtìp lò ntìng gòr ngkời kơn jơ̆ ngan, hìu sơnơm khi đơs là ờ gŏ gơtùi sơm bời jơh ờ, pơ ùr añ ờ gơtùi ñă lòt. Añ kơno đơs là tàm cơldŭ kham kòp ling klàng làng bol geh ƀák sĩ Linh gơtùi câm kứu sơm bời jơh kòp den añ jun pơ ùr tus kham kòp. Bơh dơ̆ sơm kòp câm kứu pơgap 18 ngai den pơ ùr añ neh bời đau, gơtùi ñă lòt. Jơh hìu bơnhă chờ hờp ngan.

Ia R'vê là xã tiah nhàr lơgar ngài ngan rlau jơh bơh kơnhoàl Ea Súp dê, mờ 6 rơbô 800 nă cau gơwèt 28 jơi bơtiàn kòn cau oh mi ơm kis bal. Lơh sa kal ke lơh broă sền gròi pràn kơl dang să jan bơh làng bol dê gam uă bơta ờ niam. Jat ồng Lê Văn Hoàng Lâm– Củ tịc Ủy ƀan Ñân zân xã Ia R’vê yal, ală nam do, cơdŭ kham kòp ling klàng làng bol lơh bal bơh Pôs đồng ling sền gàr tiah nhàr lơgar Ia R’vê dê neh lơh niam ngan kơnòl broă kham mờ sơm kòp ai làng bol tàm ù tiah nhàr lơgar in. Să tờm Thượng úy Hoàng Ngọc Linh neh dờp geh uă nùs nhơm kờñ gơboh bơh làng bol ală jơi bơtiàn kòn cau dê.

Ồng Lê Văn Hoàng Lâm, đơs: Thượng úy Hoàng Ngọc Linh là dùl nă ƀák sĩ lơh broă  jơh nùs, tryang tryồng mờ broă lơh kham sơm kòp ai làng bol in. Pah tŭ geh làng bol sồr den ờ rơngòt ngai mang halà gùng lòt ngài tus nàng dong kờl làng bol. Bal mờ kham sơm kòp, Thượng úy Hoàng Ngọc Linh gam mblàng yal làng bol in gĭt pơs wàs sàng goh tiah ơm kis, lơh jat broă sa sin hùc duh, mblàng yal broă lơh rcang sơndră kòp Kovid-19 lơh geh bơta pin dờn tàm làng bol.

Mờ ală bơta lơh ngan tàm tŭ lơh broă, Thượng úy ling klàng lơh sơnơm bi Hoàng Ngọc Linh neh geh uă kấp, ngàñ jàu pà ală bơnah phan pà kwơ màng. Mơya gơwèt mờ bi, bơta chờ hờp dờng ngan rlau jơh là geh cau ling bal, làng bol ală jơi bơtiàn kờñ gơboh pin dờn, tă pơgồp bal bơt bơtàu tiah nhàr lơgar ngai sơlơ pas niam.