VOV4.K’ho- Poh lài, geh lơh pơrjum tơngume adat boh lam nhai 8 bơh Ủy ƀan Thuờng vụ Quôk hội dê. Tàm dơ̆ pơrjum do, Ủy ƀan Thường vụ Quôk hội ai jơnau đơs tàm 5 rơndap lơh adat boh lam neh yal Quôk hội in tàm pơrjum dơ̆ 3 mờ 3 rơndap lơh adat boh lam yal Quôk hội in ai jơnau đơs dơ̆ sơn rờp tàm pơrjum dơ̆ 4. Ai jơnau đơs bè jơnau rơcang cih Nghị quyết ai tơlik Tơngume pal jat dơ̆ pơrjum Quôk hội (tam gơl), Củ tịc Quôk hội ồng Vương Đình Huệ sồr pal gàr niam bơta làng bol lơh tờm; gơnoar, kơnòl bơh kwang bàng Quôk hội dê mờ gơ dờp ngac ngar mờ bơta geh ngan.

Jơnau rơcang cih Nghị quyết ai tơlik Tơngume pal jat dơ̆ pơrjum Quôk hội (tam gơl) nàng kờñ pơgồp bơnah tơnguh broă lơh bơh Quôk hội dê ngai sơlơ mờng chài, ring niam mờ tơnguh rlau tai bơta niam, cồng nha bơh ală dơ̆ pơrjum Quôk hội dê. 

Bơta pa kuơmàng bơh jơnau rơcang cih Tơngume pal jat dơ̆ pơrjum Quôk hội (tam gơl) hơ̆ là cih mùl màl rlau bè kơnòl bơh kwang bàng Quôk hội dê tàm broă tus bal dơ̆ pơrjum mờ tŭ ờ gơtùi tus bal tàm dơ̆ pơrjum. Sang tĕ jơnau cih bè broă sồr pơyua sră pơ àr tus kwang bàng Quôk hội mờ ala mờ sră nggal điện tử; bơtơl jơnau cih yal loh làng mat ală anih lơh broă, cau dùl nă să lơyài pơyua sră nggal.

Tus tŭ do, broă gam geh jơnau đơs krơi is hơ̆ là jơnau cih bè tŭ jơ ai jơnau đơs bơh kwang bàng dê tàm dơ̆ pơrjum bal gùt mpồl. Uă jơnau đơs sồr gàr jơnau cih tŭ jơ ai jơnau đơs là 7 phuk bè tŭ do bè Tơngume pal jat gam ngui tŭ do nàng kwang bàng Quôk hội in gơtùi mblàng loh làng, wil tơl jơnau đơs he dê. Bè gơnoar broă bơh cau đơng pơlam dơ̆ pơrjum dê, ală kwang bàng sồr cih mùl màl rlau ală broă pal geh nàng cau đơng lam dơ̆ pơrjum in sồr Quôk hội lơh nền tơn jŏ halà tơrmù lơyah tŭ jơ ai jơnau đơs halà mblàng lơh loh. Củ ñiệm Ủy ƀan Lơh sa bơh Quôk hội dê Vũ Hồng Thanh sồr: “Nàng gàr gơnoar bơh kwang bàng dê tàm broă ai tơlik jơnau đơs he dê, kuơmàng là ală dơ̆ cribơyai tàm hìu pơrjum, kwang bàng kờñ ai tơnggŏ kơnòl he dê mờ tiah tơlik mat tĕ khà. Den tàng kung pal gàr niam tŭ jơ. Mơya tŭ jal mhar pal geh jơnau sồr, den cau đơng pơlam dơ̆ pơrjum gơtùi tơrmù lơyah tŭ jơ”.

Jơnau rơcang cih Nghị quyết bơ tơl jơnau cih bè gơnoar tàm pơndang tàm hìu pơrjum nàng kờñ rề ơnàng bơta ring bal dùl nùs tàm broă lơh bơh Quôk hội dê, lơh gơlik bơta niam nàng kwang bàng Quôk hội in lơh loh ală broă mờ kwang bàng sền gròi. Gơ wèt mờ tàm pơndang, lùp wơl, Ủy ƀan Thường vụ Quôk hội sồr lơh loh kơrnuat pal jat khat dùl nă kwang bàng lơi halà mìng kwang bàng tơlik jơnau lùp hơ̆ hơ̆ sồng geh gơnoar tàm pơndang mờ cau hơ jơnau lùp. Phó Củ tịc Quôk hội ồng Trần Quang Phương đơs loh: “Tàm broă lùp, hơ jơnau lùp mờ he lời tàm pơndang, đah tàm pơndang mờ lùp wơl ờ loh làng. Tàm pơndang là ală broă ờ hềt loh den tàm pơndang. Lùp wơl là kung ờ hềt loh sơl. Bè hơ̆, den jơnau cih bè tŭ jơ tŭ do tàm jơnau rơcang cih geh 2 khà krơi is. Tàm cribơyai den tàm pơndang là 3 phuk, mơya lùp den tàm pơndang 2 phuk. Jat añ den sang tĕ tàm pơndang tàm broă lùp, hơ jơnau lùp, mờ hòi lùp wơl den tŭ jơ lùp mờ lùp wơl kung mìng 1 phuk”.

Tàm dơ̆ pơrjum, Củ tịc Quôk hội ồng Vương Đình Huệ đơs nền: Quôk hội là anih lơh broă làng bol pồ, den tàng jơnau rơcang cih Nghị quyết ai tơlik Tơngume pal jat dơ̆ pơrjum Quôk hội (tam gơl) pal gàr bơta ring bal dùl nùs; tơnguh gơnoar adat boh lam; mờng chài, tam gơl pa; loh làng, song dơpă, jak chài mờ geh cồng nha; gơ dờp ngac ngar mờ bơta geh ngan: “Lơh jat gùng dà ai tơlik lài tam gơl broă lam lơh mờ broă lơh bơh Quôk hội dê, ngan là gàr gơnoar mờ tơnguh kơnòl bơh kwang bàng Quôk hội dê. Ală bơta lơi mờ gơnăp gơnoar bơh kwang bàng Quôk hội dê den ờ gơtùi tơrmù. Pal gàr dơ̆ pơrjum lơh bè lơi, cih bè lơi nàng kwang bàng Quôk hội in gơtùi ngui niam gơnoar do. Ờ mìng ờ tơrmù mờ gam pal gàr bơta gơtùi ngui niam gơnoar mờ tơnguh kơnòl bơh kwang bàng Quôk hội dê. Pơn jat tai tam gơl pa broă lơh đơng pơlam, tam gơl tơngume tờm bơh Quôk hội cribơyai gơs cribơyai mờ tàm pơndang tai”.

Ală jơnau đơs kung sồr cih broă lơh pờ tê ring bal ngac ngar rlau tàm ală tŭ kuơmàng bè tŭ kòp bơtờp gơlik geh kal ke. Bulah bè hơ̆, Củ tịc Quôk hội đơs là, bañ lơh kră kơldang 2 broă lơh pờ tê ring bal. Tài dilah neh pờ tê ring bal mờ măi mok điện tử ờ tam gơl tàm hìu pơrjum den ờ gơtùi pờ tê ring bal mờ măi mok điện tử tàm điện thoại at tê.

Cau mblàng K’Duẩn