VOV4.K’ho - Broă lơh jăt jơnau kờñ Dà lơgar tus bal tơnguh bơtàu lơh sa mpồl bơtiàn tiah làng bol kòn cau mờ tiah kơh bơnơm tơngai bơh nam 2021 tus 2030 mùl màl geh lơh tàm ală tiah bơh bồ nam do, sơlơ ai tơngŏ jơnau hơ pràn kơl dang bơh Cíñ phủ tàm broă lơh jăt ală jơnau kờñ tơnguh bơtàu kơl jăp, wèt tus broă geh tơl “Ờ geh cau lơi gơtìp sơbì is hờ tơnơ̆”. Cau ai tơngit jơnau đơs Việt Nam geh jơnau lùp Ƀộ trưởng, Củ ñiệm Ủy ƀan Zân tộk ồng Hầu A Lềnh bè broă rơcang nàng broă lơh geh kwơ màng do lơh geh cồng nha.

                                            Ƀộ trưởng, Củ ñiệm Ủy ƀan Zân tộk ồng Hầu A Lềnh

-Ơ Ƀộ trưởng, nam 2022 là nam sơnrờp ngan broă lơh jăt jơnau kờñ dà lơgar tơnguh bơtàu lơh sa mpồl bơtiàn tàm tiah làng bol kòn cau mờ tiah kơh bơnơm mùl màl lơh jăt tơngai sơnrờp tàm ală tiah. Dan Ƀộ trưởng pà git bè ală tơngu me geh ai lài tàm broă tam pà bơta pràn tàm tơngai dơ̆ sơnrờp bơh broă lơh jăt jơnau kờñ dà lơgar dơ̆ do tơrgùm tàm ală broă mờ gah broă bè lơi?

Ƀộ trưởng Hầu A Lềnh: “Tàm broă lơh jăt jơnau kờñ Dà lơgar tơnguh bơtàu lơh sa mpồl bơtiàn tiah làng bol kòn cau mờ tiah kơh bơnơm tơngai bơh nam 2021 tus 2030 mờ tơngai bơh nam 2021 tus 2025 tàm hơ̆ geh 10 rơndăp broă lơh. Mơya, nàng mŭt tàm nam 2022, ai geh bơnàng jă ai ală nam pơn jăt tai in, Ủy ƀan Zân tộk neh ring bal mờ ală ƀộ, gah lơh broă dà lơgar mờ ai tàm rơndăp broă tam pà kes priă. Hơ̆ là tơrgùm bơsong lài jơh là bè hìu ơm, ù lơh hìu ơm, ù lơh sa, dà ngui sa. Do là ală broă làng bol kờñ ngan. Dơ̆ bàr là lơh gơs bè kơ cế lơh ring bal đah Dà lơgar mờ ală tiah kung pal geh dùl bơta pràn uă ngan.

Dơ̆ 3 là tơrgùm tàm broă tam gơl sồ mờ bơta tờm là bơ̆t bơtàu mpồl ală khà broă, khà geh ai bè cồng nha bơh broă bơyai lơh jăt broă lơh do. Lòt bal mờ ală kơnòl do, den bol añ kung geh ai dùl bơnah khà priă tàm nam 2022 ai ală gah broă ndai in bè gah lơh sơnơm, gah bơto bơtê mờ bơsram, gah chài rơgơi, geh bal broă sền gàr bơta lơngăp lơngai dà lơgar, hơ̆ sồng là broă lam sồr, hơ̆ sồng là broă bơto bơtê mờ bơsram, tơnguh uă bơta pràn ai mpồl kwang bàng atbồ tàm ală kấp tàm broă bơyai lơh jăt broă lơh. Mờ sền gròi gròi tus broă là lơh sir Mpồl đơng lam bơh Dà lơgar tus ală tiah nàng gàr niam broă ring bal đah dà lơgar mờ ală tiah dê.

-Ơi, bè hơ̆, den Ƀộ trưởng kơlôi bè lơi bè ală jơnau ƀuơn mờ broă kal ke tŭ lơh jăt broă lơh jăt jơnau kờñ dà lơgar tàm bơta dà lơgar gam gơtìp aniai kal ke bè broă lơh sa mpồl bơtiàn tài bơh kòp kovid-19?

Ƀộ trưởng Hầu A Lềnh: Bè ală bơta ƀuơn bơh broă lơh do, den lài jơh là tàm kơrnoăt bơcri priă bơh Thủ tướng Cíñ phủ neh tơl ai khà priă nàng broă lơh do in là 104 rơbô tơmàn đong, tơngai bơh tŭ do tus nam 2025. Mpồl lơh broă yal tơngit neh tus bal mờ làng bol neh git broă do lài ngan.

Ală rơndăp broă lơh dềt tàm broă lơh do geh lơh tàm tơngu me tơrgùm bal jơnau kờñ kung bè bơh broă sền wơl nền nòn ală càr, ƀòn dờng, ală ƀộ, gah lơh broă dà lơgar, den tàng broă lơh jăt broă do là di pal mờ jơnau kơ̆p kờñ mùl màl ngan, kờñ ngan, mờ geh nùs nhơm chồl pràn nàng tơnguh bơta pràn bơh làng bol, lik klàs is nàng klàs mờ rơƀah.

Mơya, kung geh ală broă gơtìp kal ke ngan. Neh sơrlèt mờ kòp gơtờp tàm tơngai pa do, rài kis làng bol gam gơtìp kal ke, pơn jăt tai gơtìp kal ke rơlao. Bè hơ̆, bơta pràn geh tàm dơlam is làng bol dê kung gơtìp kal ke rơlao. Ală broă rơcang sơndră bơh ală tiah kung neh kal ke rơlao uă ngan pơn drờm mờ tŭ geh ai broă lơh.

Bơdìh hơ̆ tai, den ală broă mùl màl di gơlan gơlik geh tàm broă bơyai lơh jăt broă lơh, bè tơlik geh hìu gơtìp rơƀah gơlik geh xã gơtìp rơƀah bơh broă là sền wơl bơta jơgloh rơƀah tàm nam 2021 di jăt mờ khà rơƀah uă bơta pa. Bè hơ̆, broă pờ ơnàng tai cau, ù tiah geh lơh gơmù khà bơcri priă. Di lah ờ bơcri priă tus mờ ală ƀòn hơ̆ den lơh gơtìp nùs nhơm kơlôi sơnơng tàm làng bol, pal geh dùl jơnau mblàng, jơnau hơ mờ bơtơl di pal.

Hơ̆ là ală broă kal ke mờ bol añ ai tềng đăp măt mờ kung gam geh ală broă lơh nàng pơgồp bal mờ ală ƀộ, gah lơh broă dà lơgar, ală càr, ƀòn dờng nàng bơsong ală broă do.

-Mờ ală kal ke mờ ƀộ trưởng pa yal, nàng lơh jăt broă lơh do geh cồng nha bơh sơnrờp tơn den ală gah lơh broă gơrềng bal mờ ală càr, ƀòn dờng geh pal lơh ală broă lơh lơi nàng kơrian geh broă hoàc huơr, ha là geh tŭ là sa kuề sa koà tŭ lơh jăt ală rơndăp broă lơh do?

Ƀộ trưởng Hầu A Lềnh: “Añ đơs là broă kơrian hoàc huơr tàm broă bơyai lơh broă do, ha là geh tŭ ală cau sa kuề sa koà, kung pal geh. Mơya, jăt mờ nùs nhơm đơng lam bơh Đảng dà lơgar, ală sră nggal, kơrnoăt bè broă lơh, bè kơnòl, tam pà kấp geh gơnoar tàm ală kấp geh lơh tơmù jơh ală bơta do. Tàm hơ̆, geh dùl broă lơh kwơ màng ngan. Hơ̆ là broă bơ̆t bơtàu mpồl sră nggal pal lơh loh kơnòl, gơnoar mờ kwơ màng, hơ̆ là kơnòl bơh tơl kấp dê.

Bơdìh mờ broă lơh jăt nền nòn bơh mpồl anih lơh broă atbồ dà lơgar, den pal hòi jà broă sền gròi bơh Quốk hội, Hội đồng Ñân zân ală kấp mờ kwơ màng là broă tus bal sền gròi bơh Mặt trận Dà lơgar, ală mpồl lơh broă cíñ trị mpồl bơtiàn mờ broă sền gròi bơh làng bol, kung bè ală anih lơh broă sră ƀăo. Añ đơs là di lah lơh jăt ndrờm bal jơh ală broă lơh do den geh tơmù uă ngan ală broă là bơcri priă ờ di, tìs mờ anih bơcri, tìs cau ha là ală bơta tơngŏ lơh geh kwơ is bơh broă dong kờl do. Bol añ kung neh sồr tơnkah broă do tàm broă lơh sră nggal, kơrnoăt boh lam”.

-Ơi, dan ưn ngài ƀộ trưởng neh ai tơngai tus mờ dơ̆ jơnau lùp do!

Cau mblàng Ndong Brawl