VOV4.K’ho - Pơn jăt tai broă pơrjum dơ̆ 14, mho òr (11/08), Ủy ƀan Thường vụ Quốk hội ring bal Nghị quyết bè broă pơn jăt tai tơm priă dong kờl gơwèt mờ cau lơh broă gơtìp gơrềng tài bơh kòp Kovid-19.

Jăt mờ hơ̆, Ủy ƀan Thường vụ Quốk hội ring bal ngui di pơgăp 1 rơbô 155 tơmàn đong bơh kes priă bảo hiểm roh broă lơh tus jơh nam 2021 nàng pơn jăt tai tơm priă dong kờl gơwèt mờ cau lơh broă gơwèt mpồl cau geh dờp jăt mờ Nghị quyết geh ai. Tơngai lơh jăt broă tơm priă dong kờl cau lơh broă lơh gơs lơyài ngan tàm ngai 10 nhai 9 nam 2022. Nghị quyết jào Cíñ phủ lơh jăt broă tơm priă di tơngai mờ yal Ủy ƀan Thường vụ Quốk hội in cồng nha lơh jăt Nghị quyết tàm pơrjum nhai 9 tus. Đơs pơn dŭt pơrjum dơ̆ 14, Củ tịc Quốk hội ồng Vương Đình Huệ đơs loh, tơnơ̆ mờ bàr ngai nggùl lơh broă, Ủy ƀan Thường vụ Quốk hội neh lơh gơs 7 broă dờng mờ bàr mpồl tơngu me. Sồr Tổng thư ký, Củ ñiệm Cơl dŭ lơh broă Quốk hội lơh jăt jơnau đơs pơn dŭt nàng tơlik jơnau yal jơnau đơs pơn dŭt, gờñ lơh gơs nàng yal Củ tịc Quốk hội kĭ 4 Nghị quyết.

Cau mblàng Ndong Brawl