VOV4.K’ho- Poh lài, tàm pơrjum dơ̆ 10, dùl tàm ală tơngume kuơmàng là Ủy ƀan Thường vụ Quôk hội neh lơh nền rơ wah 4 tơngume jat sền bơh Quôk hội, Ủy ƀan Thường vụ Quôk hội dê tàm nam 2023 mờ ai jơnau đơs tàm broă lơh pơrjum dơ̆ 3, Quôk hội khóa 15.

Tàm 4 tơngume jat sền nam 2023, Quôk hội jat sền 2 tơngume mờ Ủy ƀan Thường vụ Quôk hội jat sền 2 tơngume. Hơ̆ là: Broă hòi jà tă pơgồp, atbồ mờ ngui ală bơnah priă jền drơng broă lơh rơcang sơndră kòp Kovid-19; broă lam lơh broă lơh, adat boh lam bè lơh sơnơm kâp hơ đơm, lơh sơnơm rơcang gàr lài. Broă lam lơh jat ală Nghị quyết bơh Quôk hội dê bè ală broă lơh jơnau kờñ dà lơgar (geh: bơt bơtàu ƀòn lơgar pa tơngai bơh nam 2021 tus nam 2025, tơrmù rƀah kơ̆ kơljap tơngai bơh nam 2021 tus nam 2025, bơtàu tơnguh lơh sa- mpồl bơtiàn tiah làng bol jơi bơtiàn kòn cau dùl êt nă cau mờ tiah kơh bơnơm tơngai bơh nam 2021 tus nam 2030). Broă lam lơh jat Nghị quyết sồ 88 nam 2014, Quôk hội khóa 13 mờ Nghị quyết sồ 51 nam 2017, Quôk hội khóa 14 bè tam gơl pa broă lơh bơto bơtê, sră măi phổ thông. Broă lam lơh broă lơh, adat boh lam bè bơtàu tơnguh năng lượng gơlik wơl.

Geh jơnau đơs dan bơ tơl tơngume jat sền bè kờp sền jơh broă lơh tơn pồ, tàm pơ dờn kwang bàng tơngai bơh nam 2011 tus tŭ do tài sa kuề sa kuà gam ngai sơlơ gơlik geh kal ke; bơta lơyài tàm broă atbồ đơng lam tàm uă tiah; bơta niam bơt bơtàu mờ ai tơlik thể cế ndrờm sơn đờm bơh bơta niam cau lơh broă bơh mpồl kwang bàng duh broă dê. Bulah bè hơ̆, Kwang gơnoar cih Quôk hội ồng Bùi Văn Cường đơs là, broă rơ wah ală tơngume jat sền geh lam lơh jat broă rơndap lơh geh sồr. Jat tàm bơta geh ngan geh ai tơlik tàm ală dơ̆ lùp mờ hơ jơnau lùp halà broă lơh jat sền tàm tŭ tơngai dipal. Mìng is mờ jơnau đơs ai tơlik jat sền gơ wèt tus mờ tơngume lam lơh ngan ngồn tềm pềr, sơndră hoàc huơr, Củ tịc Quôk hội ồng Vương Đình Huệ đơs: “Nam lơi bol he kung sền sơ wì jơnau yal bè lam lơh ngan ngồn tềm pềr, sơndră hoàc huơr. Bol he tŭ do kung gam pal jat sền uă ngan rlau jơh bè tơngume do. Den tàng să tờm añ là añ ờ ring bal mờ broă neh geh yal pah nam bloh den ờ sền gròi. Pơn rơ là broă lam lơh ngan ngồn tềm pềr, sơndră hoàc huơr nam lơi kung geh jơnau yal jơh lơm mờ ờ mìng ală jơnau yal mờ gam geh cribơyai tàm Quôk hội. Neh đơs sền gròi, hơ̆ là gơ rềng uă ngan tus rài kis làng bol dê”.

Jat kờp dŭ broă lơh pơrjum dơ̆ 3, Quôk hội pơrjum tơrgùm bal tàm Hìu lơh broă Quôk hội. Bulah bè hơ̆ kung gam geh broă rơndap lơh rơcang lài pơrjum pờ tơlik tơn tàm tàm internet dilah pal lơh. Kờp dŭ tŭ tơngai lơh broă bơh Quôk hội dê là 20 ngai. Quôk hội mut pơrjum tàm ngai dơ̆ 2, ngai 23/5 tus do, kờp dŭ tơn jơh tàm ngai 17/6 tus do. Cíñ phủ sồr tơn ruc tơngai yal rơndap lơh Adat ù tiah (tam gơl) tài tŭ lam lơh bơt bơtàu rơndap lơh Adat neh gơlik geh 2, 3 bơta pa pal geh tai tŭ tơngai nàng kơlôi sơnơng nền nòn. Củ ñiệm Ủy ƀan Kiñ tế bơh Quôk hội dê ồng Vũ Hồng Thanh pà git: “Gơ rềng tus Adat ù tiah, bol hi gam lơh ngan pơgồp bal mờ Ƀộ Tài nguyên mờ tiah ơm kis nàng tus bal ală pơrjum, cribơyai lam lơh tơn jơh Adat ù tiah. Ală anih lơh broă kung pal lam lơh uă ngan ală broă lơh krơi is den hơ̆ sồng gơtùi gàr bơta niam bơh Rơndap lơh adat dê. Geh tŭ rơndap lơh adat do pal dan jơnau đơs bơh làng bol dê tai. Kờñ gàr bơta niam nàng Cíñ phủ rơcang lài nền nòn mờ yal Quôk hội pơrjum dơ̆ 4”.

Cíñ phủ kung sồr bơ tơl yal Quôk hội in ring bal Adat tam gơl, bơtơl 2, 3 bơta bơh Adat Kwang àng làng bol; Nghị quyết bè tơn jŏ tơngai ngui Nghị quyết sồ 42 nam 2017, Quôk hội khóa 14 bè lam lơh tơrlòng lài bơsong dồs rlau tơngai hơ pơrgon tơm bơh ală ngân hàng dê; nghị quyết lam lơh tơrlòng lài 2, 3 kơ cế, broă lơh krơi is bơtàu tơnguh càr Khánh Hòa. Yal Quôk hội in ai jơnau đơs bè 3 rơndap lơh adat: Adat gùng ù gờl; Adat gàr ờdo ờdă gùng lòt ù gờl; Adat Mpồl tus bal sền gàr lơngap lơngai, ờdo ờdă tàm ƀòn lơgar. Mờ kung yal Quôk hội lơh nền gùng dà bơcri priă 5 rơndap broă lơh, geh: Gùng pleh 4 tiah càr lơgar Hà Nội; Gùng pleh 3 ƀòn dờng Hồ Chí Minh; Gùng ù gờl rơndeh ntoat rat Châu Đốc- Cần Thơ- Sóc Trăng; Gùng ù gờl rơndeh ntoat rat Khánh Hòa- Buôn Ma Thuột; Gùng ù gờl rơndeh ntoat rat Biên Hòa- Vũng Tàu. Gơ rềng tus tơngume cribơyai bè lam lơh rơndap broă lơh gùng Hồ Chí Ming tơngai pơn jat tai, Củ ñiệm Ủy ƀan Khoa họk kông nghệ mờ Môi trường bơh Quôk hội dê ồng Lê Quang Huy đơs bơta geh ngan gam gơlik geh tŭ do là broă ai priă bơcri: “Priă bơcri dà lơgar den dùl tàm ală kơrnuat pal lơh hơ̆ là ală broă lơh ờ hềt lơh gơs, gam dùl êt lơm nàng lời gơ in geh bơta kuơ. Bol hi dan uă dơ̆ ngan nàng ai, lơyài ngan mờ tŭ do mìng gam 200 kơi sồ gời. Gùng Hồ Chí Minh lòt gan mờr 30 càr. Tŭ do, gam mờr 200 kơi sồ lòt gan mờr 9 càr Thái Nguyên, Phú Thọ, Hòa Bình, Hà Nội. Tiah đah jm mat tơngai mut dà lơgar den uă ngan tơrbŏ mờ Kiên Giang, Bạc Liêu mờ Cà Mau... Bol hi dan pal geh broă cribơyai, gam tŭ tơngai den Thường vụ lơh nền”.

Củ tịc Quôk hội ồng Vương Đình Huệ sồr sền gròi tơnguh cồng nha, bơta niam broă tơrgùm jơnau đơs bơh kwang bàng Quôk hội dê cribơyai tàm mpồl mờ tàm hìu pơrjum; pơgồp bal, rơcang lài nền nòn broă lơh bè yal tơnggit jơnau, sră nggal, mblàng yal jơnau, sră ƀău, ală bơta bè phan bơna, ală broă lơh rơcang sơndră kòp bơtờp nàng kờñ drơng niam ai dơ̆ pơrjum in.

Cau mblàng K’Duẩn