VOV4.K’ho- Pơn jat tai pơrjum dơ̆ 10, Ủy ƀan Thường vụ Quôk hội cribơyai jơnau rơcang cih Nghị quyết bơh Quôk hội dê bè lam lơh tơrlòng lài 2, 3 kơ cế, broă lơh krơi is bơtàu tơnguh càr Khánh Hòa. Ală kwang bàng đơs là, bơtàu tơnguh càr Khánh Hòa ờ mìng geh bơta kuơ lơh sa mờ gam pơgồp bơnah gàr kơ̆ gơnoar tờm bồt dà lềng bơh dà lơgar dê.

Tàm pơrjum, jơh ală kwang geh jơng tàm Ủy ƀan Thường vụ Quôk hội ring bal ai tơngume Jơnau rơcang cih Nghị quyết bơh Quôk hội dê bè lam lơh tơrlòng lài 2, 3 kơ cế, broă lơh krơi is bơtàu tơnguh càr Khánh Hoà tàm broă lơh bơt bơtàu adat boh lam, kơrnuat boh lam nam 2022. Dilah geh ring bal tàm pơrjum dơ̆ 3, Quôk hội khóa 15, càr Khánh Hòa geh gơnoar lam lơh ală broă lơh dong kờl, krơi is bè: tơnguh tai khà jơngkah dồs càn, geh kes priă dà lơgar bơtơl geh jơnau kờñ bơh khà gơguh tơrgùm priă dia; càr geh lơh nền is rơndap ù tiah bal bơt bơtàu ală anih ờs mờng; lơh nền tam gơl jơnau kờñ ù tam kòi hơ đơm 500 lồ, tam gơl brê lơh sa hơ đơm 1 rbô lồ jat gơnoar geh jàu bơh Thủ tướng Cíñ phủ dê.

Cau mblàng K’Duẩn