Mpồng tiah nhàr lơgar dunia Xa Mát là dùl tàm 2 mpồng tiah nhàr lơgar dờng bơh càr Tây Ninh dê mờ mpồl phan bơna tăc mờ lơgar ndai gal ngan pah ngai. Bal mờ bơta pơhìn kă bro phan bơna tìs mờ kơrnoat boh lam den tàng mpồl lơh broă geh gơnoar sùm pal rcang sền ngăc lam lơh broă lơh rcang sơndră kă bro phan bơna tìs mờ kơrnoat boh lam jun pơdiang phan bơna kă bro tìs mờ kơrnoat boh lam lòt gan mpồng tiah nhàr lơgar dê. Ngan là tơnơ̆ tŭ bơta kòp neh geh kơryan den hải quan Xa Mát ai tơn ală mpồl lơh broă kung bè ală broă lơh lơh broă nàng gàr niam broă kă bro phan bơna mờ lơgar ndai lòt gan tiah nhàr lơgar geh sơr băc mhar mờ dong kờl uă ngan ai ală mpồl lơh sa kă bro in lơh broă tăc bro mờ blơi phan bơh lơgar ndai kung bè năc in mŭt tàm lơgar. Sền bal bơh bồ nam tus tŭ do mpồng tiah nhàr lơgar Xa Mát ờ hềt gơlik geh broă lơh lơi kơn jơ̆ geh gơrềng tus phan bơna kă bro tìs mờ kơrnoat boh lam.

Ồng Nguyễn Nam Hồng Sơn, Phó Kwang atbồ Ci kụk hải quan Xa Mát pà gĭt: Bơta kă bro phan bơna tìs mờ kơrnoat boh lam bơh ală cau lơh tìs dê kung geh sơn đờm lơh uă wơl tai, kung sơmờm broă lơh ờ kràñ cê bơh adat boh lam dê kung bè sră nggal hải quan den cau lơh tìs geh ală broă lơh tìs nàng jun pơdiang phan bơna kă bro tìs mờ kơrnoat boh lam mờ jơnau kờñ là mpồn priă dia, ngan là tàm ù tiah tiah nhàr lơgar Xa Mát do là gơl gùng tiah nhàr lơgar gùng ù gờl mờ tiah đah ne lơgar Campuchia dê den là tiah lơh gơlik phan lơh geh bơh broă lơh sa suơn sre. Den tàng bơta kă bro phan bơna tìs mờ kơrnoat boh lam tàm tiah nhàr lơgar Xa Mát gơ sùm pơhìn ală bơta kă bro phan bơna tìs mờ kơrnoat boh lam là uă ngan. Mơya tơnơ̆ dơ̆ kòp aniai ală mpồl lơh broă geh gơnoar tàm ù tiah do dê kung lơh ngan ai ală mpồl lơh broă rcang sơndră cau lơh tìs, den tàng bơta kă bro phan bơna tìs mờ kơrnoat boh lam tŭ do gam gơ ơm ing đau mơya kung ờ pleh mờ broă mpồn ndơ̆p ală broă kă bro phan bơna tìs mờ kơrnoat boh lam lòt gan ù tiah Xa Mát do dê.

Kung ndrờm bè ală mpồl lơh broă hải quan mpồng tiah nhàr lơgar ndai sơl, Ci kụk hải quan mpồng tiah nhàr lơgar dunia Xa Mát sùm pal kong mờ ală bơta kal ke tàm broă sơndră mờ broă kă bro phan bơna tìs mờ kơrnoat boh lam, kơryan dơ̆ jun pơdiang tìs mờ kơrnoat boh lam ma tuý, phan bơna kă bro ờ loh tiah tờm lơh gơlik blơi ờm tìs mờ kơrnoat boh lam mŭt tàm tiah nhàr lơgar ală cau lơh tìs sùm lơh blăc pơrlồm phan kă bro tìs mờ kơrnoat boh lam tơmŭt bal mờ phan kă bro tăc uă jat sră pơrgon nàng jòi broă mŭt gan mpồng tiah nhàr lơgar, tàm hơ̆ geh bal phan bơna kă bro kơryan ờ ai. Ală cau lơh tìs sùm tam gơl broă lơh ngui uă gùng dà broă lơh, kai krơi is nàng sơmờm ală gùng kă bro ờ jat sră pơrgon, gùng dềt, gùng pờ nàng jun pơdiang tìs mờ kơrnoat boh lam ală phan bơna kă bro gan tiah nhàr lơgar nàng kờñ pleh mpồn bơta lòt sền, jat sền mờ gròi sền bơh ală mpồl lơh broă geh gơnoar dê.

Ồng Nguyễn Văn Đạt, Kwang atbồ Mpồl tơrgùm bal, Ci kụk hải quan mpồng tiah nhàr lơgar Xa Mát pà gĭt: Jơh gùt bă ù bơh xã Tân Lập là dờng ơnàng ngan, gùng tiah nhàr lơgar jòng pơgap 35 kơi sồ, uă gùng pờ, gùng dềt, ală rơndeh pơndiang phan tơrgùm phan bơna jat kềng gah gơl gùng tiah nhàr lơgar mờ ơm tàm đah ne ù tiah lơgar Campuchia dê. Sùm mŭt ờm tìs mờ kơrnoat boh lam tàm lơgar Việt Nam he dê tàm trồ mang, geh cau ơm gak sền ală mpồl lơh broă geh gơnoar den tàng kal ke ngan tàm broă lòt sền mờ gròi sền jat kềng gah gùng tiah nhàr lơgar dê nàng lơh broă rcang sơndră kă bro phan bơna tìs mờ kơrnoat boh lam. Dơ̆ 2 là tàm Ci kụk ờ geh mpồl gròi sền, drơng broă sùm bè rcang sơndră kă bro phan bơna tìs mờ kơrnoat boh lam den broă lơh rcang sơndră kă bro phan bơna tìs mờ kơrnoat boh lam là bơh mpồl tơrgùm bal dê drơng broă den ờ hoan geh cau ngan, ù tiah den dờng ơnàng den gơtìp uă ngan kak ke.

Sền gĭt loh ală bơta ƀuơn, bơta kal ke bơh bồ nam tơn, mpồl lơh broă neh rcang lài gĭt loh ală bơta bơt bơtàu broă lơh lơh broă, lơh kơnòl broă tờm nàng ai tơlik ală gùng dà broă lơh bơsong bơta bơta kal ke, tàm hơ̆ tơrgùm lam lơh bàr pe broă lơh, bè: Lơh ală broă lơh rcang sơndră sa kuề sa kuà mờ tă dia dà lơgar dê di, tơl, lơh pràn lơh niam sră nggal, lơh pa broă lơh hải quan, tam gơl pa broă lơh lơh broă, sơlơ lam lơh ală broă lơh rcang sơndră kă bro phan bơna tìs mờ kơrnoat boh lam, blăc pơrlồm kă bro, tàm ù tiah nhàr lơgar dê tơn.

Bal mờ ală broă lơh geh ai, Ci kụk hải quan mpồng tiah nhàr lơgar dunia Xa Mát neh sơlơ tơnguh broă lơh pơgồp bal yal tơngĭt jơnau yal mờ ală mpồl ling sền gàr tiah nhàr lơgar, atbồ drà kă bro, kwang àng, geh bơta tam gơl niam ngan, uă dơ̆ broă tơngume geh lòt sền, gròi sền geh bơta tus bal dùl ròt bal kràñ cê jơh nùs bơh ală mpồl lơh broă geh gơnoar dê.

Ồng Nguyễn Nam Hồng Sơn Phó Kwang atbồ Ci kụk hải quan Xa Mát pà gĭt tai: Nàng gàr niam broă lơh rcang sơndră kă bro phan bơna tìs mờ kơrnoat boh lam niam den hải quan pal lam lơh ală broă lơh lơh broă bol añ dê, pơn yơu bè broă lơh gĭt loh ală bơta, tàm yal tơngĭt bal jơnau yal kung bè kĭ hơ ală kơrnoat pal jat pơgồp bal mờ ală mpồl lơh broă geh gơnoar tàm ù tiah do dê. Bơdìh mờ hơ̆ den ală kwang bàng, kông cứk bơh bol añ dê tŭ lơh broă lơh bè gròi sền broă rcang sơndră kă bro phan bơna tìs mờ kơrnoat boh lam den pal sùm sền gĭt jơnau yal tơngĭt tàm ală phần mềm lơh broă bơh hải quan dê nàng gĭt ală jơnau yal, ală bơta ală kai, broă lơh kung bè ală cau lơh tìs tàm ù tiah do dê. Bol añ pal lòt bơto pơlam lơh broă tàm ală mpồl lơh broă geh gơnoar kấp hơđang mờ gah lơh broă dê, bol khi kung geh yal he in, tơngkah lài he in ală jơnau yal, broă lơh pa nàng kông cứk bol he in lơh niam broă lơh tàm ù tiah do dê.  

Nàng lơh  geh jai pha ală broă jàu kơnòl broă mờ ală kấp neh jàu tàm nam 2022, Ci kụk hải quan mpồng tiah nhàr lơgar Xa Mát pơn jat tai lam lơh dùl ròt kràñ cê jơh nùs ală broă lơh, di tŭ lơh ală broă lơh rcang sơndră, kơryan broă kă bro phan bơna tìs mờ kơrnoat boh lam mờ blăc pơrlồm kă bro, pơgồp bơnah gròi sền niam tơn ală bơta tàm tiah nhàr lơgar, mpồng tiah nhàr lơgar ngai sơlơ geh cồng nha.