VOV4.K’ho - Neh geh tu\ là bơta chi tam geh tam bơrlu\ tàm suơn kơphe nàng jơm mbur, kìng càl, mơya 2, 3 nam do ală tờm chi sa plai bè [ơ, sầu riêng neh cèng wơl priă jền lơh geh uă ngan ai làng bol lơh broă càr Daklak in:

Hìu nhă bi ùr Nguyễn Thị Thu, ơm tàm [òn 8, ntum Ea Kpam, kơnhoàl Cư Mgar, càr Daklak geh rlau 1 lồ mờ gùl kơphe gam tàm tơngai tơnhàu. Mơya 2, 3 nam do, cồng nha tơnhàu kơphe gơmù uă tài gơtìp aniai bơh tam gơl trồ tiah. Kờ` lơh niam suơn chi mờ tơnguh priă jền lơh geh, bi ùr Thu neh tam bơrlu\ [ơ mờ sầu riêng tàm suơn kơphe. Bi ùr Thu pà git, priă bơcri tam [ơ mờ sầu riêng lơyah rlau mơya cồng nha lơh sa den kung ndrờm bè kơphe. Rlau mờ hơ\ tai, broă tam bơrlu\ gam dong lơh geh mbur jơm rơ hiơm, gàr khà sùh ìo tờm kơphe in, tơmù priă jền sơngka sền gàr mờ tơnguh cồng nha tơnhàu chi tam. Bi ùr Thu pà git: “ Bơh tu\ sơn đờm tam bơrlu\ tus tu\ do, cồng nha lơh geh jơnhua ngan. Tài dilah bè ờs den tờm kơphe tàm 1 lồ tàm dùl nam mìng tơnhàu geh 4 tấn, mơya tờm [ơ den 1 nam dilah tơnhàu geh uă den êt ngan kung tac geh 300 tơlak, 1 nam mờ dilah tơnhàu jơh bal mờ [ơ, kơphe, tiêu, sầu riêng bè hơ\ den he kờp mờ khà priă tac lơyah ngan rlau jơh kung geh bơh 350 tus 400 tơlak priă.” 

Sền go\ bơta kuơ bơh broă tam bơrlu\ ală bơta chi sa plai, ngan là tờm [ơ mờ sầu riêng cèng wơl, uă cau lơh broă sa tàm xã Ea K’pam neh khin cha tam gơl chi tam, tam bơrlu\ uă bơta chi tam tàm dùl bă ù, ala mờ mìng tam tờm kơphe bè lài do. Ồng Nguyễn Công Định, Phó Chủ tịch xã Ea K’pam, kơnhoàl Cư Mgar pà git, gùt xã tu\ do geh mờr 2 rbô 500 lồ chi tam jo\ ngai, uă ngan là kơphe mờ kau su. Tơngai pa do, làng bol lơh ngan tam bơrlu\ uă bơta chi sa plai bè [ơ, sầu riêng den tàng bă ù tam ală chi tam do neh gơguh uă ngan. Jat khà kờp tơr gùm bơh bồ nam do, gùt xã geh rlau 50 lồ [ơ mờ rlau 20 lồ sầu riêng tam bơrlu\ tàm suơn kơphe. Ồng Nguyễn Công Định đơs: “Bơh mùl màl den kung neh ai go\, bơdìh mờ broă tam ală bơta chi tam do nàng tơnguh priă lơh geh den kung pơgồp bơnah gàr niam tiah kis mờ tam chi tam jơm mbur, jơm rơ hiơm suơn kơphe in, gàr khà sùh ìo tàm nhai prang duh, làng bol den geh phan nàng tơnhàu gùt nam. Tu\ do den broă lơh do geh làng bol bơsram đòm jat bal mờ gơp mờ rề ơnàng tam uă.”

Jat Sở Nông nghiệp mờ Phát triển nông thôn Daklak, gùt càr tu\ do geh mờr 2 rbô 900 lồ sầu riêng mờ 2 rbô 500 lồ [ơ, uă ngan tam bơrlu\ mờ kơphe. Broă tam bơrlu\ ală bơta chi sa plai tàm suơn kơphe gam là rơndap broă dipal mờ broă lơh bơh càr dê bè li la chi tam gơ jat bal mờ tam gơl trồ tiah. Chi tam bơrlu\ ờ mìng tơnguh priă jền lơh geh mờ gam jơm mbur, kìng càl tờm kơphe in gơs niam. Bulah bè hơ\, tu\ tam, làng bol pal lơh jat ală jơnau pơlam bè rơwah tờm sơntìl, bơta chài tam, ba` tài bơh jat cồng nha lơh geh mờ ngui uă ir sơnơm, ơn uă ir phơng hoá học halà tam jat srơh, lơh gơbàn bơta khà lơh gơlik uă rlau mờ jơnau kờ`, lơh aniai ờ niam tus broă lơh sa.

                 Cau cih mờ yal tơnggit K’Duẩn