VOV4.K’ho- Bơh bồ nam 2019 tus tu\ do, càr Dak Lak neh geh 445 nă cau kòp sốt rét, tàm hơ\ geh 2 nă cau kòp sốt rét kơn jơ\. Anih lơh broă rcang sơn dră kòp sốt rét - ký sinh trùng - côn trùng (Sở Y tế) pà g^t: jơh ală kơnhoàl, thị xã bơh càr dê ndrờm geh cau kòp sốt rét, tàm hơ\, uă ngan rlau jơh là kơnhoàl Ea Kar mờ 174 nă cau, Krông Năng  109 nă cau…

Dùl tàm ală jơnau lơh kòp sốt rét gơguh là tài broă làng bol sùm lòt tàm brê, bi\c tàm mìr ờ tơl phan rcang is. Bulah gah lơh sơnơm neh mblàng yal, tơngkah làng bol lòt tàm brê pal cèng kơmùng neh tram dà sơnơm, kem bong bơtrơh sơmăc bơh gah lơh sơnơm ai mơya uă cau kung gam sền ờ sơ\p sơl.

Anih lơh broă rcang sơn dră kòp sốt rét - ký sinh trùng - côn trùng gam gròi sền khà cau kòp sốt rét mờ atbồ niam cau kòp sốt rét; lơh pràn broă rcang sơn dră kòp mờ tàm nhai 8 do, Anih lơh broă rcang sơn dră kòp sốt rét - ký sinh trùng - côn trùng pà mờr 400 lít dà sơnơm ai ală kơnhoàl geh uă kòp in nàng tram kơmùng.

Cau mblàng K’ Hạnh