VOV4.K’ho – Tơngai lài, càr Dak Lak neh pờ 2, 3 ơdu\ bơto dròng cing mồng ai kơnòm bơsram, cau bơsram dờng kòn cau tàm ală hìu bơsram in. Broă lơh do neh geh ală kơnòm bơsram, cau bơsram dờng jơh nùs ngan tus bal, bơh hơ\ dong ală oh geh tu\ niam nàng git cing mồng, wèt tus ală bơta kuơ tơngu rơyas bơh yau. Pa do, ơdu\ bơta dròng cing mồng dơ\ sơn rờp geh pờ tàm hìu bơsram Đại học Tây Nguyên dong ua\ cau bơsram dờng git niam chài cing mồng, tơnguh bơta kờ` gơboh tàm ală oh tus bal ơdu\ bơsram.

Mờr 3 nhai do, pah tu\ tus mang ngai dơ\ 2, dơ\ 4, dơ\ 6 pah poh, tàm hìu bơsram Đại học Tây Nguyên mpong ntas ală sap dờng, sap dềt, sap gơguh, sap gơmù bơh cing mồng dê. Sap ntas bơh ơdu\ bơto dròng cing bơh ală cau bơsram dờng kòn cau dê. Ală cau tus bal ơdu\ bơsram geh tam cah gơs 4 mpồl, tơl [ùi bơsram geh 2 mpồl tus bal bơsram, pơlam tàp bơh 5 jơ mho tus 7 jơ mang. Ơdu\ bơsram sùm duh hồl ngan tài sap ntas bơh cing mồng, sap boh bơr, sap đơs, sap `o\ bơh ală cau bơsram mờ nghệ nhân pơlam dê.

Siu Lok, kòn cau Jarai, cau bơsram dờng gah Y dược pà git, bulah neh git dròng cing bơh lài, mơya tu\ tus bal ơdu\ bơsram, geh bơta pơlam jơh nùs ngan bơh ală nghệ nhân dê, bi neh git tai ua\ bơta pa: “Sền bal den cau Jarai mờ cau Rơđê geh bơta niam chài mờr ndrờm bal den tàng bè cing mồng den bơta chài dròng kung ờ huan krơi sơl. Ua\ ngan là krơi bè sap dròng, khà ndang, rơle\ tu\ dròng bơh 2 kòn cau dê lơm, den tàng gơtùi dròng bal mờ gơp. Tơnơ\ tu\ bơsram jơh ơdu\ bơto dròng cing mồng do den oh go\ gơ lơh pơn iờ să ngan tài he neh sền gàr bơta niam chài kòn cau he dê, bơta krơi is bè chài rơ gơi cing mồng. Sền go\ să tờm he pal lơh ngan rlau tai nàng sền gàr, kờ` tơ nơ\ do rê hờ [òn lơgar den he gơtùi pơn jat tai bơsram mờ bơtàu tơnguh broă dròng cing mồng jat ua\ gùng dà broă lơh krơi is, pơn yơu bè lơh nhơl chờ”.

Cau bơsram gam geh bơsram đơs pơnđik kòn cau mờ lơh quèng mờ ală nghệ nhân

Ơdu\ bơto dròng cing bơh 2 nă nghệ nhân cau Rơđê tàm [òn dờng Buôn Ma Thuột, càr Dak Lak mờ 1 nă nghệ nhân cau Bahnar tàm càr Kon Tum pơlam. Tài geh ua\ cau tus bal ơdu\ bơsram pa rơp bơsram dròng cing mồng dơ\ sơn rờp, den tàng ală nghệ nhân pal sền nền nòn tơl nă nàng pơlam jơh nùs khi in, di tu\ tam gơl bè chài ìa cing, chài gàr sap dròng cing bơh tơl nă cau dê.

Nghệ nhân A Biu, cau Bahnar đơs, ală oh geh bơta chài đal git gùng đơs crih niam ngan mờ tryang ngan lòt bơsram: “Lài ngan là đơs bè nùs nhơm den go\ là ală oh jơh nùs ngan bơsram. A` ờ mìng bơto dròng cing mồng mờ gam bơto bơtê bè nùs nhơm tai, hơ\ là ală oh pal sền gàr bơta niam chài do, tài do là bơta niam chài kòn cau he dê, ală oh pal pơn iờ să ngan tu\ git sền gàr niam chài kòn cau he dê. Broă lơh a` dê là bè hơ\, mờ bè hơ\ den a` pal geh kơ nòl ua\ rlau tai, pal pơn jờng ală oh ua\ rlau. Mblàng wơl ală oh in nàng niam chài dròng cing mồng ờ gơtùi roh hui\”.

Ơdu\ bơto dròng cing mồng bơsram mang ngai dơ\ 2, dơ\ 4 mờ dơ\ 6 tàm poh

Hìu bơsram Đại học Tây Nguyên là hìu bơsram sơn rờp ngan tàm càr Dak Lak geh Sở Văn hóa, Thể thao mờ Du lịch sac rơwah pờ ơdu\ bơto dròng cing mồng. Tus bal ơdu\ bơsram do geh rlau 40 nă cau, kờp jơh bal cau klau mờ cau ùr, gơ wèt ua\ jơi bơtìan kòn cau krơi is bè: Rơđê, Jarai, Tày, Nùng, Mạ… geh bal bơta kờ` gơboh cing mồng Tây Nguyên.

Tus bal ơdu\ bơsram, Vi Thị Cảnh, kòn cau Thái, cau bơsram dờng gah Sư phạm chờ hờp ngan đơs: “Ndrờm bơh lài tus tu\ do mìng geh cau klau lơm dròng cing, kơnờm cau pơgru dong kờl den tàng tu\ do jơh bal cau ùr kung geh bơsram dròng cing mồng sơl. Geh git tus niam chài cau Tây Nguyên dê bè dròng cing, git sap ntas dròng cing dê, git tamya xoang mờ ua\ bơhìan ndai tai. Bơta do geh kuơ ngan a` in, tài a` gơtùi git ua\ jơnau git wă rlau tai bè niam chài cau Tây Nguyên dê, tài git niam chài kòn cau kung bơ tơl a` in ua\ jơnau git wă kuơmàng nàng dong broă bơsram bol hi dê tơnơ\ do”.

Ală cau bơsram jak ngan bơh ơdu\ bơsram geh sac rơ wah mut tàm mpồl đơs crih tamya hìu bơsram Đại học Tây Nguyên dê

Jat nghệ nhân Y Nuynh Byă, kòn cau Rơđê, tài tryang tryồng pơlam tàp, den tàng jơh ală cau tus bal ơdu\ bơsram ndrờm neh mhar ngan git bơta chài dròng cing mồng. Bơta kuơmàng là lài do, gơwèt mờ cau Rơđê, mìng geh cau klau hơ\ sồng dròng cing, den tàm ơdu\ bơsram do, geh ua\ cau ùr tus bal bơsram sơl mờ ai tơnggo\ bơta chài rơ gơi rlau mờ ală cau klau: “Rài yau cau đơs là mìng geh cau klau den hơ\ sồng gơtùi dròng cing, mơya tu\ do mpồl bơtìan bơtàu tơnguh mờ sền go\ ua\ jơnau git wă pa den kung kơp kờ` là jơh bal cau ùr kung geh bơsram drìng cing sơl mờ bơto ală cau ùr in dròng cing. Mơya tu\ bol hi bơto bơtê tàm hìu bơsram Đại học Tây Nguyên den sền go\ là, ală oh ùr dròng cing gam chài mờ git mhar rlau mờ ală oh klau tai. Pơn yơu bè ală cau klau den tê ờ lơ bơn bè cau ùr”.

Bơh ơdu\ bơsram do, ală cau bơsram jak geh sac rơwah nàng mut tàm mpồl dròng cing mồng bơh hìu bơsram Đại học Tây Nguyên dê, pơn jat tai pơlam tàp nàng lòt dròng cing tàm ală dơ\ bơyai lơh, dơ\ ràng tơlik, pơr lòng, tìp mat niam chài đơs tamya. Broă lơh bơto bơtê neh tơnguh srơh bơsram mờ ngui cing mồng ai rơnàng kơnòm să in. Do kung là dùl tàm ală broă lơh nàng kờ` pơ gồp bơnah sền gàr, tơnguh bơta kuơ niam chài cing mồng dùl bă ngan ngồn mờ geh cồng nha.

Cau mblàng K’Duẩn