VOV4.K’ho - Tu\ do neh lồi kàl tơnhàu sầu riêng tàm càr Daknông. Jat jơnau đơs bơh gah lơh broă geh gơnoar mờ cau lơh broă sa dê, do là kàl sầu riêng lơh geh cồng nha uă, mờ khà priă tac jơnhua ngan rlau jơh bơh lài tus tu\ do; tơl lồ geh priă cồng git nđờ rhiang tơlak priă.

Bulah neh lồi kàl tơnhàu, mơya uă anih blơi sầu riêng tàm kơnhoàl Dak Mil, càr Daknông kung gam blơi sầu riêng uă ngan. Sầu riêng uă ngan geh cau blơi ơn tàm kơldung nàng cèng tac tus ală càr tiah đah jum mattơngai mut mờ đah jum mattơngai lik dà lơgar. Mò Lê Thị Thanh Xuân ơm tàm [òn Đức Nghĩa, xã Đức Mạnh, kơnhoàl Dak Mil pà git: Hìu nhă tam rlau 50 tờm sầu riêng, tàm hơ\ 20 tờm là sơntìl bơkiar Thái Lan, ai cồng nha tơnhàu uă. Kàl sầu riêng nam do, tơnơ\ mờ tu\ kờp jơh ală bơnah priă bơcri, hìu nhă mò geh priă cồng rlau 200 tơlak priă. Mò đơs: “Sầu riêng Thái Lan khà priă tac jơnhua ngan, khà priă sầu riêng gơguh jơnhua pah ngai, tu\ do khà priă neh gơguh tus 60 rbô tàm 1 ki\. Nam do bulah tơnhàu ờ uă mơya khà priă tac kung kơljap.”

Mò Nguyễn Thị Khang là cau tờm dùl anih blơi sầu riêng tàm xã Đức Mạnh, kơnhoàl Dak Mil pà git, gơwèt mờ sầu riêng bè ờs den mìng geh khà priă bơh 15 tus 20 rbô tàm 1 ki\; do là sầu riêng plai dềt, gar dờng jù. Ai gơwèt mờ sơntìl sầu riêng bơkiar, plai dờng, să rơmit, gar nsiap, tàm gùl kàl geh khà priă blơi mờr 40 rbô tàm 1 ki\, mơya tu\ do neh lồi kàl, khà priă neh gơguh tus 60 rbô tàm 1 ki\. Mò Nguyễn Thị Khang đơs: “Sầu riêng Thái Lan khà priă jơnhua mơya uă ngan là cau bơh tiah đah mattơngai mut dà lơgar tus blơi uă, ai sầu riêng gar he dê den mìng geh khà priă bơh 15 tus 20 rbô tàm 1 ki\. Tơnhàu ờ uă mơya tac ỳom, sầu riêng Thái den să rơmit gar nsiap, 1 lồ tam geh bơh 4 tus 50 tờm, dùl tờm tơnhàu geh bơh 2 tus 3 tạ.”

Jat ồng Lê Văn Điệp, kuang atbồ Phòng Nông nghiệp mờ Phát triển nông thôn kơnhoàl Dak Mil, là tiah mờ tu\ do geh mờr 400 lồ sầu riêng, geh mờr gùl bă sầu riêng bơh càr Daknông dê. Sầu riêng uă ngan geh cau lơh broă sa tam bơrlu\ tàm suơn kơphe. Mơya dilah mìng tam sầu riêng, kờp bal tơl lồ tơnhàu geh bơh 30 tus 40 tấn. Mìng mờ khà priă tac 25 rbô tàm 1 ki\, tơl lồ sầu riêng kung neh tac geh mờr 1 tơmàn priă. Ồng Lê Văn Điệp pà git:

“Gơwèt mờ bơta khà priă den nam do là dùl tàm ală nam geh khà priă tac sầu riêng jơnhua mờ kơljap. Tu\ do, kơnhoàl gal hòi jà bơt bơtàu mat sơnđan kă bro sầu riêng Dak Mil. Pah nam, mờ kơnòl bơh Phòng dê, den dan mờ UBND kơnhoàl geh ală sră nggal pơlam UBND ală xã, ală hợp tác xã, mpồl cau lơh broă sa nàng gàr kơ\ ală bă sầu riêng gam geh tu\ do, tơr gùm tàm broă sơngka sền gàr nàng tơnguh cồng nha mờ bơta niam sầu riêng dê.”

                                          Cau cih mờ yal tơnggit K’Duẩn