VOV4.K’ho- Tơnơ̆ tŭ bơyai lơh ñô bau, nàng tơngŏ nùs nhơm ki ngàm, kah ưn ngài dà kơl hề bơh mè bèp dê, bơta tam klăc bal nùs nhơm mờ oh mi, gơ̆p bơyô, mơkung tơngăc kòn klau rê ơm đah hìu pơ ùr, làng bol kòn cau Jrai sùm bơyai lơh dơ̆ Joă H’Bâu halà gam sơnđan là dơ̆ chờ jă kơm buh ồs

Jat bơhiàn yau bơh kòn cau Jrai dê, tơnơ̆ tŭ bơyai lơh dơ̆ ñô bau, kòn klau pal tơrgùm jơh phan bơh he dê nàng rê ơm tàm hìu pơ ùr. Tơnơ̆ tŭ bau bơh 3 tus 7 ngai, kòn cau Jrai sùm bơyai lơh dơ̆ Jă H’Bâu.

Dơ̆ lơh chờ do geh gơtha là kah ưn ngài dà kơl hề neh deh, neh ròng dờng mờ bơto bơtê bơh mè bèp dê, bơta tam klăc bal nùs nhơm kờñ gơboh oh mi, gơ̆p bơyô jŏ jòng, kơ̆ kơl jap. Mơ do kung là broă tơngăc kòn klau rê ơm tàm tiah pa, rềp mềr jơh rài mờ pơ ùr. Den tàng bè hơ̆, nàng tơngŏ nùs nhơm bơh he dê, ùr bơklau pa bau pal sac rơwah dùl ngai tàm poh, sùm là ngai ơm rơlô nàng rê tàm hìu mè bèp bau klau dê, jà oh mi, gơ̆p bơyô tus bal dơ̆ lơh chờ Jă H’Bâu.

Bi Kpă Vũ (ơm tàm ƀòn Toan, xã Ia Kdăm, kơnhoàl Ia Pa, càr Gia Lai) đơs: Añ pa bau mờ pơ ùr ơm tàm ƀòn Chư Băh, xã Chư Băh, thị xã Ayun Pa. Tơnơ̆ tŭ neh bơyai lơh ñô bau, nàng kah ưn ngài mè bèp neh ròng siam, bơto bơtê he, tơngŏ broă lơh bơh he dê mờ tơngăc oh mi, gơ̆p bơyô lài mờ tŭ ngan ngồn rê ơm tàm hìu pơ ùr, añ kung lơh chờ Jă H’Bâu.

Tơnơ̆ tŭ bơyai lơh ñô bau, tàm tơngai bơh 3 tus 7 ngai, kòn cau Jrai sùm lơh chờ Jă H’Bâu

Tàm dơ̆ lơh chờ Jă H’Bâu, kòn klau geh cèng 1 yăng tơrnờm, 1 nơm sur, 1 glah piang ai mè bèp in; 1 yăng tơrnờm, 1 nơm iar, 1 nơm bềl ai gơ̆p bơyô in. Ală phan do kòn klau pal cèng bơh hìu pờ ùr tus. Tiah bơyai lơh là tàm hìu mè bèp đah klau dê, cau tờm lơh chờ sùm là cau lơh kòn gùng bơh yô ùr bơklau pa bau do dê. Tơnơ̆ tŭ cèng ală phan do tus hìu mè bèp, kòn klau geh jà jơh oh mi, gơ̆p bơyô, cau rềp mềr bal tus chờ hờp bal mờ hìu bơnhă pa dê.

Tàm dơ̆ lơh chờ, ală cau tàm hìu bơnhă, oh mi, gơ̆p bơyô geh nggui wơl bal mờ gơ̆p. Pơn jat hơ̆, kòn klau geh rcang ñă ntàu mờ đơs, đơs jơnau bơh broă bơyai lơh chờ Jă H’Bâu, mơkung tơngŏ nùs nhơm gĭt ưn ngài gơwèt mờ mè bèp neh ròng siam he. Kung tàm dơ̆ lơh chờ do, oh mi, gơ̆p bơyô geh jà bal mờ gơ̆p ñô tơrnờm nàng kah wơl ală kir sơnrai, tam pà bal, tơm bơh bơr bal, nting tơngkah yô ùr klau pa bau ală broă lơh pal lơh tàm tơngai mờr tus mờ gờm chờ ai yô ùr bơklau do in kis chờ hờp, ring bal, lơh ngan ngan lơh sa, bơtàu tơnguh lơh sa, ròng siam, bơto bơtê oh kòn....

Dơ̆ lơh chờ Joă H’Bâu sùm bơyai lơh mờ broă lơh dềt mờ ơ hoàn roh uă priă jền. Ală cau tus bal tàm dơ̆ lơh chờ do uă ngan là cau tàm hìu bơnhă, gơ̆p bơyô rềp mềl den bè priă jền mờ tŭ tơngai ờ uă ir sơl, digơlan bơyai lơh tàm ƀùi drim halà trồ mho mang, jat broă lơh bơh tơl hìu bơnhă dê.

Tŭ do, uă yô ùr bơklau pa bau bơyai lơh ñô bau jat rài kis pa den tàm bàr pe tiah, bơhiàn do kung ết lơh jat rlau mờ lài do. Mơya gơwèt mờ kòn cau Jrai, dơ̆ lơh chờ Jă H’Bâu kung là dùl bơnah ờ gơtùi ờ geh tàm rài is niam chài, nùs nhơm, tơngŏ bơta niam tàm rài kis pah ngai bơh làng bol dê.

K’Brọp ai bơh băo Gia Lai- Cau mblàng K’Hạnh