VOV4.K’ho – Tàm tiah Tây Nguyên, uă tiah neh lơh Hìu duh khoai bơtau Hùng. Pah nam, dơ̆ duh kah bơtau Hùng geh ală tiah bơyai lơh yŭ rơyùm ngan. Bơh hơ̆, pơgồp bơnah bơto bơtê bơhiàn ờs mờng “Hùc dà kah tô dà”, kah ưn ngài uă ngan tus ală bơtau Hùng neh geh dà kơl hề bơt bơtàu dà lơgar mờ ală cau lài do neh khin cha jak chài dră wơl bol sò tơm, sền gàr dà lơgar.

Bơh ngai 20 tus ngai 21/4/2021, tàm tiah tềl kah yau dà lơgar Đình Lạc Giao, sồ 67 gùng Phan Bội Châu, ƀòn dờng Buôn Ma Thuột, Sở Văn hóa, Thể thao mờ Du lịch pơgồp bal mờ Ủy ban Nhân dân ƀòn dờng mờ ală mpồl geh gơ rềng bơyai lơh duh kah bơtau Hùng ngai 10/3 nam Tân Sửu 2021 nàng kờñ wèt tus chờ dờng duh kah bơtau Hùng. Bơh ală broă lơh bơh dơ̆ duh kah bơtau Hùng dê, pơn jờng ală rơnàng làng bol lơh ngan tàm pơrlòng, lơh jat geh cồng nha ală kơnòl broă, jơnau kờñ bơtàu tơnguh lơh sa, niam chài, mpồl bơtiàn.

Neh gơ gơs mờng quèng, ngai 10 nhai 3 jat nam lơgar he dê pah nam, uă làng bol Gia Lai mờ ală càr rềp bal neh tus chu ñàng tàm hìu duh khoai bơtau Hùng tàm Công viên niam chài Đồng Xanh (xã An Phú, ƀòn dờng Pleiku, càr Gia Lai) tàm nùs nhơm king crŭ ngan geh rê mờ tơngu rơyas. Hìu duh khoai bơtau Hùng tàm Công viên niam chài Đồng Xanh geh lơh mờ niam chài lơh hìu đam ờs mờng, hìu rông Tây Nguyên geh lơh jat bơta tam gơl pa jơnhua 18 thơk, tàm dơlam hìu duh khoai là rùp mòn bơtau Hùng geh lơh mờ dơm chi jơnhua 6 thơk, kơnjơ̆ mờr 3 tấn geh sờng son thếp biàng, tềng đap hìu duh khoai geh rùp 18 nă bơtau Hùng.

Hìu duh khoai bơtau Hùng tàm Gia Lai

Jat kuang đơng lam bồ Kong ti Cổ phần niam chài- nhơl chờ càr Gia Lai pà git, tàm ngai 9 nhai 3 jat nam lơgar he dê, kong ti klơm mbar lơm pòng, bŏ piang lă, sur buh, phan pơ dơng duh khoai nàng thàn rơcang lài ai drim ngai 10 nhai 3 pơdơng duh khoai ală bơtau dà lơgar in. Ală nam rềp ndo, ngai duh kah bơtau Hùng neh gơ gơs là ngai chờ dờng bơh làng bol ală jơi bơtiàn kòn cau tàm càr Gia Lai dê. Gal ngan ală hìu bơnhă lam kòn sau tus nhơl ñŏ, kuơmàng 2, 3 hìu bơsram tàm càr kung bơyai lơh ală broă lơh rê hờ tơngu rơyas nàng kờñ bơto bơtê rơnàng kơnòm să, tơnguh nùs nhơm kờñ gơboh dà lơgar, bơta pơn iờ să bè kah yau jơi bơtiàn.

Gơ rờm bal tàm nùs nhơm bơh jơh gùt lơgar dê, ngai 10 nhai 3 jat nam lơgar he dê pah nam, mpồl bơtiàn ală jơi bơtiàn kòn cau tàm xã tiah nhàr dà lơgar Dak Buk So, kơnhoàl Tuy Đức, càr Dak Nông tơrgùm rê hờ hìu duh khoai ală bơtau Hùng nàng bơyai lơh duh kah bơtau dà lơgar. Bơh nam 2017, hìu duh khoai bơtau Hùng geh lơh neh dong làng bol bơh làm gùt bă tiah rê tus, ai tơnggŏ nùs nhơm ki ngàm gơ wèt tus mờ ồng pàng, tơngu rơyas. Hìu duh khoai ơnàng rlau 250 thơk vuông, geh lơh jat niam chài mòn hìu đam bơh yô yau, mpờl gŏ tàm dà tơlir bơh ù tiah brê bơnơm Tây Nguyên dờng ơning ơnàng dê. Jơh ală bơnah priă tă lơh geh làng bol tă pơgồp is, tàm hơ̆ bơnah ù bơh dùl hìu bơnhă làng bol ai pà. Ồng Nguyễn Đình Lương ơm tàm thôn 6, xã Dăk Buk So pà git, uă ngan làng bol tàm do ndrờm bơh càr Phú Thọ mut Dak Nông nàng lơh sa. Lik lòt bơh ƀòn tờm 20 nam do, mơya tơl nă cau kung gam kah tus ngai duh kah bơtau dà lơgar. Tơl nă cau neh cribơyai, ring bal dan gơnoar bơh gơnoar atbồ ală kấp dê lơh hìu duh khoai bơtau Hùng.

Làng bol kòn cau M’nông tus bal dơ̆ duh kah bơtau Hùng tàm Dak Buk So

Dơ̆ duh kah bơtau Hùng tàm ngai 10 nhai 3 jat nam lơgar he dê pah nam neh gơ gơs là ngai chờ dờng dà lơgar bơh jơh gùt jơi bơtiàn dê, là bơta pơn jờng nùs nhơm pơgồp bơnah lơh gơlik bơta pràn tam klac dờng jơh gùt làng bol bal mờ gơp sơrlèt gan ală bơta kal ke bơh rài tam lơh, trồ tiah lơh aniai dê... tơnguh bơta pin dờn ai mpồl bơtiàn in nàng bal mờ gơp wèt hờ tơngai tơnơ̆ do, bơt bơtàu dà lơgar Việt Nam ngai sơlơ pas sơm, pràn kơldang, niam bơnĕ rlau.

Cau mblàng K’Duẩn