VOV4.K'ho - Tu\ do làng bol lơh broă sa tàm càr Kontum gam mut tàm kàl tơnhàu bùm blàng, mơya khà priă tac gơmù mờr 40% pơn drờm mờ nam lài. Jơnau là tài bơh mpồl lơh sa kă bro gơtìp kal ke bè tac hờ lơgar ndai bòk bùm blàng. Tàm tu\ hơ\, đah mpồl lơh sa kă bro mờ cau lơh broă sa ờ geh sră pơrgon blơi bùm blàng:

Ndrờm bè git nđờ rhiang hìu nhă ndai, priă lơh geh tờm ngan bơh hìu nhă bi Võ Minh Sơn, ơm tàm ntum Sa Bình, kơnhoàl Sa Thầy kơnờm tàm 3 lồ bùm blàng. Nam lài, hìu mai\ blơi bùm blàng mờ khà priă 1 rbô 700 đông tàm 1 ki\, hìu nhă bi tac geh rlau 250 tơlak priă. Mơya nam do, tài trồ prang dờng soat dà jo\ jòng cồng nha tơnhàu lơyah, hìu mai\ mìng blơi bùm blàng ris mờ khà priă bơh 1 rbô 200 tus 1 rbô 450 đông tàm dùl ki\, den tàng hìu nhă mìng tac geh mờr 100 tơlak priă. Neh bè hơ\, kờ` gơtùi tac den pal ơpah cau dus bùm blàng mờ pơndiang tus hìu mai\. Bi Võ Minh Sơn pà git: “ Ơpah cau dus 10 tấn là 13, 14 nă. Tơl nă cau klau ơpah 150 rbô, cau ùr 120 rbô. Ơpah rơndeh pơndiang dilah rềp den priă pơndiang 10, dilah ngài den priă pơndiang 15. Dùl tấn priă pơndiang là 150 rbô. Priă ơpah cau dus, rơndeh pơndiang roh uă ngan, priă cồng gam wơl dùl êt ngan.”

Ồng Nguyễn Hữu Thạnh, kuang jat jơng atbồ Anih duh broă làng bol kơnhoàl Sa Thầy pà git, kàl do làng bol tam geh mờr 7 rbô lồ bùm blàng. Mờ khà priă blơi hìu mai\ dê bơh 1 rbô 200 tus 1 rbô 450 đông tàm 1 ki\ ris, den cau tam bùm blàng mìng git lơh is nàng geh priă cồng. Dilah bơh bồ kàl, làng bol ki\ tac bùm blàng ală hìu mai\ lơh bòk in den neh ờ gơbàn bơta do. Ồng Thạnh pà git: “ Ờ hềt tus kàl tơnhàu, hìu mai\ pơrgon blơi bùm blàng 1 rbô 700 đông. Dilah 1 rbô 700 đông tàm 1 ki\ den làng bol geh priă cồng, gơ ya làng bol pal geh sră pơrgon. Tus hìu mai\ kung gam blơi mờ khà priă bè hơ\, mơya yal tus làng bol den làng bol ờ bài lơh jat jơnau pơrgon mờ hìu mai\. Làng bol ringbal là gơguh den tac jat khà priă gơguh, dilah gơmù den tac jat khà priă gơmù.”

Jơnau lơh cau tam bùm blàng tàm càr Kontum ờ kờ` mờ broă ki\ tam klac mờ mpồl lơh sa kă bro là tài ngòt tac gơtìp hoàc huơr mờ sùm kờ` tac bùm blàng mờ khà priă jơnhua. Den tàng, jơh 40 rbô lồ bùm blàng tàm càr do ờ hềt geh ki\ sră pơrgon blơi. Mpồl lơh sa kă bro bòk bùm blàng Tây Nguyên – Đak Hà là mpồl lơh sa kă bro geh rơndap broă bơcri niam ngan, mơya kung ờ hềt geh làng bol ki\ sră pơrgon blơi phan lơh gơs. Ồng Lê Văn Tình, ala mat mpồl lơh sa kă bro pà git: “ Hìu mai\ kung kờ` blơi làng bol in nàng gàr niam broă lơh sa. He blơi làng bol in kờ` khà priă kơ\ kơljap nàng khi in tam. Mơya làng bol tu\ do go\ khà priă gơguh jơnhua dùl êt là khi tus hìu mai\ ndai tac, ờ bài tac he in.”

Tàm Kontum tu\ do geh 6 hìu mai\ lơh bòk bùm blàng gam lơh broă mờ 2 hìu mai\ tai gam geh mut lơh. Pah nam, ală mpồl lơh sa kă bro ndrờm dong kờl sơntìl, phơng sih, chài lơh broă, pơn jờng làng bol tam mờ kơp kờ` ki\ sră pơrgon blơi phan lơh gơs, mơya làng bol ờ bài. Den tàng, tu\ mpồl lơh sa kă bro gơtìp kal ke tàm broă tac hờ lơgar ndai bòk bùm blàng, mìng blơi bùm blàng mờ khà priă lơyah, den làng bol gơtìp hoàc huơr. Jat ồng Nghiêm Đức Thuần, Kuang atbồ mpồl đơng lam, mơlà kuang atbồ hìu mai\ lơh gơlik bòk bùm blàng Vina Kontum, bơdìh mờ jơnau pơrgon đah làng bol lơh broă sa mờ mpồl lơh sa kă bro, pal geh bơngă bơh gơnoar atbồ ală kơnă dê tàm broă gàr niam gơnoar kuơ jơh 2 gah in: “ Geh 2 bơta. Khà priă jơnhua den làng bol kung pal tac hìu mai\ in mờ khà priă gơmù den mpồl lơh sa kă bro kung pal blơi làng bol in. Bơta gơ rềng jơnau pơrgon đah làng bol lơh broă sa mờ mpồl lơh sa kă bro là tềng hơ\. Mơya [òn lơgar pal dong kờl, geh pơrgon bơh ntum, kơnhoàl, [òn mờ bơh să tờm làng bol lơh broă sa pơgồp bal mờ mpồl lơh sa kă bro den hơ\ sồng bol a` gơtùi lơh geh bơta do”.

Geh đơs là chi tam tơn jơh jơgloh tờmu rơbah, di mờ chài tam phan làng bol kòn cau dê, càr Kontum tơlik jơnau kờ` bơtàu tơnguh bùm blàng kơ\ kơljap. Bal mờ rlau 40 rbô lồ bùm blàng gam geh tu\ do, càr gam tam gơl rlau 10 rbô lồ ù tam kòi sùm gơtìp ờ tơl dà nàng tam bùm blàng. Mơya đah làng bol lơh broă sa mờ mpồl lơh sa kă bro kung ờ geh bơta tam klac den broă bơtàu tơnguh bùm blàng kơ\ kơljap tàm càr do sền ngan là jơnau kờ` ngài ngan mờ làng bol lơh broă sa den kung gam tàm pơdar mờ jơnau tơnhàu geh uă mơya tac ờ ỳom, geh tu\ là tơnhàu ờ geh mờ tac kung ờ ỳom sơl.

               Cau cih mờ yal tơnggit K’Duẩn