Dờp jơnau jà bơh Củ tịc lơgar ồng Nguyễn Xuân Phúc, Tổng Thư kĭ Liên hợp quôk ồng Antonio Guterres còp ngan ngồn lơgar Việt Nam bơh ngai 21 tus ngai 22/10/2022. Mho ngai 21/10, dơ̆ wă ngan ngồn neh geh bơyai lơh yŭ rơyùm tàm Hìu lơh broă Củ tịc dê. Tơnơ̆ dơ̆ wă tơn, Củ tịc lơgar ồng Nguyễn Xuân Phúc neh tìp mat cribơyai mờ Tổng Thư kĭ Liên hợp quôk.

Tổng thư ký Liên hợp quôk mờ Củ tịc lơgar ồng Nguyễn Xuân Phúc

Tàm dơ̆ tìp mat cribơyai, Củ tịc lơgar ồng Nguyễn Xuân Phúc đơs sùm, ală cồng nha mpờl gŏ ngan, geh bơta kwơ kah yau bơh Việt Nam dê tàm broă lơh bơtàu tơnguh dà lơgar; đơs nền gùng dà broă lơh lơh broă mờ lơgar ndai krơi, rcang lài is, lơh bơyô mờ uă lơgar, lơh uă bơta gĭt gơ̆p, rcang lài mờ lơh ngan mŭt gơ rờm bal mờ dunia bơh lơgar Việt Nam dê. Tổng thư kĭ tơngŏ nùs nhơm kờñ ngan uă ngan lời ai Củ tịc Hồ Chí Minh mờ Việt Nam in tàm broă lơh tam lơh dongklàs jơi bơtiàn mờ bơt bơtàu wơl dà lơgar, gờm chờ ală cồng nha kwơ màng bơh Việt Nam dê tàm broă lơh rcang sơndră kòp Kovid-19, bơtàu tơnguh wơl mờ bơtàu tơnguh lơh sa- mpồl bơtiàn; pin dờn Việt Nam geh pơn jat tai lam lơh jat geh cồng nha ală broă lơh kơ̆ kơljap dờng, ai làng bol lơh tờm, sền gàr tiah ơm kis, rcang sơndră mờ tam gơl trồ tiah, gơ gơs là broă lơh geh cồng nha nàng ală lơgar ndai in bơsram jat bal.