Mò H’Ních Niê, kòn cau Rơđê ơm tàm sơnah ƀòn Tân An tơnơ̆ tŭ geh kham pràn kơldang ờ sa priă tàm dơ̆ sơnrờp bơh Anih duh broă Làng bol càr Dăk Lăk dê bơyai lơh, yal:

“Dơ̆ sơnrờp he geh kham pràn kơldang ờ sa priă bè do, kham hơ̆ sồng den gĭt là pràn kơldang he dê bè lơi. Să tờm añ mờ làng bol tàm ƀòn chờ hờp ngan. Kơ̆p kờñ bơh tŭ do rê hờ tơnơ̆ do pơn jăt tai geh Đảng, Dà lơgar sền gròi rlau tai nàng làng bol pơn jăt tai geh kham kòp ờ sa priă”.

Jăt mò Châu Thị Kim Phụng, Kwang Lam bồ Hìu Sơnơm sơnah ƀòn Tân An, tàm 2 poh bơyai lơh kham, kham nàng gĭt pràn kơldang ờ sa priă ai làng bol in, dong cih bơtơl jơnau yal pang sră dềt pràn kơldang điện tử mờ sră Kham sơm kòp sa priă tàm phan ngui VNeID, ƀòn lơgar neh lơh sir 100% broă jàu lơh tơrlòng lài mờ pơn jăt tai rề ơnàng kham pràn kơldang ờ sa priă jơh gùt làng bol.

“Hìu sơnơm sàh, sơnah ƀòn bơyai lơh kham kòp dơlam, kòp bơdìh să, sề - kàng – muh măt, tồr- muh- rơnồng dờ, sền swì săc rwah mờ săc rwah pràn kơldang ai làng bol in. Mơkung lam lơh bàr pe drơng broă sa priă măy mŏk bè xét nghiệm mhàm, xét nghiệm dà đồm, kung bè lơh bàr pe bơta kòp gơ tơnggŏ đah bơdìh cùp X- kwang. Bal mờ kham săc rwah, hìu sơnơm sơnah ƀòn kung dong kờl làng bol lơh ndrờm bal ală jơnau yal tơnggĭt, cih tơmŭt bal tàm sră dềt kham kòp điện tửh”.

Ƀák sìh Mìng gah II ồng Phạm Minh Hữu, Phó Kwang Lam bồ Sờh Lơh sơnơm càr Dăk Lăk pà gĭt, lơh jăt jơnau sồr bơh Anih duh broă Làng bol càr mờ Jơnau lơh nền tàm pơrjum sồ 72 Bộ Chính trị dê bè kham pràn kơldang ờs mờng pah dơ̆, kham săc rwah ờ sa priă ai làng bol in, Sờh neh lam lơh broă rơndăp lơh tus jơh ală Hìu sơnơm sơnah ƀòn mờ Anih hìu sơnơm sơnah ƀòn gơ wèt 102 sàh, sơnah ƀòn jơh gùt càr; pơgồp bal mờ ală anih tờm lơh sơnơm mờ anih lơh sơnơm làng bol dê lơh is rơcăng măy mŏk, phan ngui mờ cau lơh broă drơng làng bol in. Tàm hơ̆, lơh tơrlòng lài tàm 4 sàh, sơnah ƀòn là Tân An, Tuy Hoà, ală sàh Đồng Xuân mờ Krông Bông; 98 sàh, sơnah ƀòn gam wơl rơ̆p dồ ròt bal lam lơh bơh ngai 1/7 mờr tus. Tus tŭ jiơ do, mờr 500 nă làng bol neh geh kham wil tơl jăt bơto pơlam bơh Bộ Lơh sơnơm dê mờ broă lơh săc rwah kung gam pơn jăt tai bal mờ gĭt nđờ rơbô nă cau. Ƀak sìh ồng Phạm Minh Hữu đơs sùm, broă kwơmàng broă rơcăng lài kham săc rwah pràn kơldang jơh gùt làng bol dê.

 “Kham pràn kơldang jơh gùt làng bol geh tam pà gơs 3 mpồl tờm là mpồl bơh pa deh tus 6 sơnam, mpồl bơh 6 tus 18 sơnam, gam wơl là mpồl hơđăng 18 sơnam. Broă rơcăng lài kham pràn kơldang rơ̆p gĭt geh pràn kơldang tơl nă làng bol dê tàm khà nđờ, jăt ală khà niam ngan, niam, di mơ halà ờ pràn, nàng lơh bè lơi cèng bơta gàr wơl jơh ală, mờ tŭ gŏ geh kòp den sồr làng bol tus anih lơh sơnơm nàng sơm di tŭ”.

Càr Dăk Lăk tơnơ̆ tơmŭt bal geh 3 tơlak 340 rbô nă làng bol. Lơh jăt Jơnau lơh nền tàm pơrjum sồ 72 Bộ Chính trị dê, tơngai bơh nam 2026- 2030, Dăk Lăk digơlan ai 1 rbô tơmàn đong dồ nam nàng kham săc rwah ờ sa priă ai làng bol in. Is nam 2025, càr tam pà 400 tơmàn đong ai 102 hìu sơnơm sàh, sơnah ƀòn in, mờ khà tă pơgăp 350 rbô đong dồ dă dồ dơ̆ kham. Ồng Lương Nguyễn Minh Triết, Bí thư Tỉnh ủy càr Dăk Lăk đơs wih đơs wơl, mờ ƀòn lơgar ơnàng, làng bol ơm kis rah rài ờ ơm rềp bal, khà hìu rƀah mờ làng bol jơi bơtiàn dồ êt nă cau uă, broă lơh kham drơng gàr pràn jơh gùt làng bol in là kơnòl broă kwơmàng, gơcèng jơnau gơtha niam chài kòn bơnus jrô ơnàng ngan, lơh bè lơi ờ cau lơi gơtìp lời ơm wơl ngkời. Bí thư Tỉnh ủy càr Dăk Lăk sồr ală sờh, gah, ƀòn lơgar lơh jăt bal mờ nùs nhơm kơnòl uă ngan rlau jơh.

“Ală anih lơh broă, mpồl lơh broă mờ gah lơh sơnơm pal lòt tơl gùng, teh tơl mpồng hìu nàng lơh bè lơi jơh tơl nă làng bol ndrờm geh gĭt mờ tus bal kham săc rwah pràn kơldang ờ sa priă jăt ờs mờng pah dơ̆, is ồn là cau dờp bơta dong kờl bơh mpồl bơtiàn dê, cau dờng sơnam, cau kwĕt kơlte, hìu rƀah mờ làng bol jơi bơtiàn dồ êt nă cau. Gah lơh sơnơm jơh gùt càr pal tơrgùm uă ngan rlau jơh bơta pràn, măy mŏk phan ngui, lam lơh ală dơ̆ kham ntrờn làm bă tiah dùl bă jak chài, mờng chài, lơh bè lơi broă lơh kham kòp lơh geh cồng nha uă ngan rlau jơh”.

Broă kham pràn kơldang ờ sa priă jơh gùt làng bol ờ mìng dong gĭt gŏ gờñ, sơm di tŭ kòp jê, broă lơh gam pơgồp bơnah gơgơs bơta mờng kwèng drơng gàr pràn kơldang rơcăng lài tàm mpồl bơtiàn. Mờ bơta tus bal bơh jơh ală anih lơh broă chính trị dê, jơnau kờñ jơh tơl nă làng bol geh gĭt pràn kơldang, geh tus bal drơng broă sa priă lơh sơnơm pa gam rơhời gơgơs ngan ngồn tàm rài kis, ai Jơnau lơh nền tàm pơrjum sồ 72 Bộ Chính trị dê gờñ lòt mŭt tàm rài kis tiah dơng bơnơm dờng.