VOV4.K’ho – Tàm bơta geh ngan, ală phan ờs mờng bè ồi, àu, phan soh lòt nhơl chờ... ngui ồi kòn cau Tây Nguyên neh geh gal ngan làng bol kung bè cau nac rềp ngài kờñ. Gơ wèt mờ tiah geh niam chài li la bè Gia Lai, broă ai tơlik 1 ngai nàng jờng rơ phan soh ờs mờng bơh mpồl bơtiàn kòn cau Jrai, Bahnar kung là broă lơh niam pơgồp bơnah bơtàu tơnguh broă tàñ ồi kòn cau đơs is mờ broă lơh ờs mờng bơh jŏ đơs bal.

Tơngai lài, tàm uă anih yal tơnggit geh uă jơnau cih đơs bè ală cau dùl nă să, ngan là rơnàng kơnòm să sền gròi uă ngan tus broă lơh sền gàr mờ bơtàu tơnguh bơta kuơ chài rơgơi niam bơnĕ bơh kòn cau Jrai, kòn cau Bahnar bơh broă tơnguh bơta kuơ phan soh ờs mờng. Pơn yơu bè bi Rơmah H’Tuyết (ơm tàm mpồl 10, thị trấn Phú Thiện, càr Gia Lai) gàr broă mai phan soh ờs mờng mờ li la ngan bơta. 

                               Ală phan soh ờs mờng bơh ồi kòn cau Tây Nguyên gơ kờñ ngan tus mờ nac nhơl chờ

Pơgru Tưih (ƀòn Dur, xã Glar, kơnhoàl Đăk Đoa, càr Gia Lai) lời jơh nùs tồr ai broă bơtàu tơnguh niam chài ờs mờng bơh jơi bơtiàn kòn cau dê, să tờm bơceh tơn ală bơta ồi àu ñô bau, ồi soh lòt nhơl mờ ồi kòn cau sền niam ngan, di mờ jơnau kờñ bơh rơnàng kơnòm să dê... Tơl nă cau mờ dùl broă krơi is, mơya khi ndrờm pơgồp bơnah gàr sùm ală phan soh ờs mờng. Bơta do ai gŏ jơnau git wă, kơnòl khi dê tàm broă lơh prap gàr, bơtàu tơnguh niam chài jơi bơtiàn kòn cau.

Mùl màl ală phan ờs mờng bè ồi àu, phan soh lòt nhơl... ngui ồi kòn cau Tây Nguyên neh geh gal ngan làng bol kung bè cau nac rềp ngài kờñ ngan. Do là cơng tàng mùl màl ngan rlau jơh ai tơnggŏ bơta gơhòi gơ jà bơh phan soh ờs mờng dê. Jat hơ̆, ală sở, mpồl, gah broă lơh geh gơ rềng pal sền gròi dong kờl ală bơta kuơmàng nàng pơgồp bơnah gàr sùm mờ rề ơnàng phan lơh gơs bơh broă lơh ờs mờng, ờ mìng tàm gah tàñ mai ồi àu kòn cau mờ gam uă broă lơh bơh jŏ ndai bè tàñ phan, trah mòn rùp.

Tàm tŭ tơngai uă jơnau tơnggit bè tŭ do, bơta ơm yah ngai đah kòn bơnus bal mờ gơp geh tơrmù bơh ală dơ̆ “click chuột” halà pờ điện thoại ngac ngar den broă yal tơnggit phan lơh gơs bơh ƀòn lơgar dê, tàm hơ̆ geh phan bơh jŏ kung gơ gơs ƀuơn mờ mhar. Den tàng, tơnơ̆ do geh bềng bơta tam gơl mờ cồng nha ai gơl gùng bơtàu tơnguh broă tàñ phan, tàñ ồi kòn cau là bơta mờ rơnàng kơnòm să kòn cau Jrai, Bahnar gơtùi kơp kơ nờm mờ wèt tus.

Jơnau cih bơh Thạc sĩ Hoàng Thị Thanh Hương dê bè “Broă lơh bơt bơtàu mờ bơtàu tơnguh mpồl nghệ nhân tàñ ồi kòn cau tàm Gia Lai” pờ tơlik tàm Jơnau yal tơnggit pơrjum làng bol sồ nhai 3 nam 2021 ai gŏ ală broă lơh mờ Thạc sĩ ai tơlik kờñ bơtàu tơnguh broă tàñ ồi kòn cau kung bè tơnguh mpồl cau tàñ ồi, mơkung khin cha ai tơlik tai 2, 3 broă lơh pơgồp bơnah bơtàu tơnguh broă tàñ ồi kòn cau Tây Nguyên tàm càr.

Lài jơh, mờ mpồl nghệ nhân, cau kơnòm să kờñ broă tàñ, mai phan kòn cau pal gàr sùm anih, geh dơ̆ pơrlòng, broă lơh chờ niam chài kòn cau... nàng ai tơnggŏ bơta chài rơgơi he dê, mơkung sơlơ tìp mat, cribơyai mờng chài đah ală cau kơnòm să mờ nghệ nhân geh mờng chài. Ală cau dờp niam chài bơh jŏ tàm ƀòn lơgar, cau geh gơ rềng tơn là mpồl cau Jrai, Bahnar ơm kis tàm ală tiah pal tơnguh nùs nhơm geh kơnòl tàm broă dong kờl bơta bơtàu tơnguh bơh broă tàñ, mai phan kòn cau bơh jŏ dê mờ broă rơcang lài êt ngan rlau jơh là phan soh kòn cau ai tơl nă cau tàm hìu bơnhă in. Mờ ală kuang bàng, công chức, viên chức là cau tàm ƀòn lơgar, broă mai, blơi phan soh kòn cau ờ mìng nàng soh tàm ală dơ̆ lơh chờ, broă kuơmàng bơh ƀòn lơgar dê mờ gam gơtùi ngui nàng lơh phan soh lòt lơh broă (soh dùl ngai tàm 1 poh) kờñ pơgồp bơnah jờng rơ bơta niam chài rơgơi jơi bơtiàn.

Tàm “Poh àu kap” pa do, oh mi cau ùr càr Gia Lai lơh jat jơh nùs ngan, ờ mìng jờng rơ mờ gam ai tơnggŏ bơta pơn iờ să bơh làng bol Việt Nam dê mờ phan soh ờs mờng jơi bơtiàn dê. Bè hơ̆ den tàng gơtùi halà ờ, gơ wèt mờ tiah geh niam chài li la bè càr Gia Lai  den broă ai tơlik dùl ngai nàng jờng rơ phan soh ờs mờng bơh kòn cau Jrai, Bahnar dê kung là broă lơh niam pơgồp bơnah bơtàu tơnguh broă tàñ ồi kòn cau đơs is mờ broă lơh ờs mờng bơh jŏ đơs bal.

Cau mblàng K’Duẩn