VOV4.K’ho- Phan sa kòn cau Rơđê tàm ù tiah càr Dak Nông tiơng pơnrơ ngan mờ ală phan sa geh bơta bơtang bal mờ ka rì cèng wơl bơta ƀô thồm, bơkah, krơi is ngan. Bơdìh mờ phan trŭ gơm là blơn bơtang halà ƀùñ bơtang brê, kòn cau Rơđê gam geh 2 bơta nha geh bơta bơtang bơkah krơi is ngan sùm gơm bal mờ ka rì mờ biăp bơtang (jdam ble)

Nha bùm blàng geh bơta bơtang geh kòn cau Rơđê kờñ ngan sa. Nha bùm blàng ngui nàng trŭ gơm pal là nha bùm blàng ngkòng pơrhê, sùm ờs ngui gơm biăp dà, nha bùm blàng chàng bal mờ bơkào bơl hong dam, nhai bùm blàng chàng mờ ka rì... Tàm hơ̆, nha bùm blàng càhng mờ ka rì gơm ƀuơn ngan mơya sa den bơkah ngan.

Phan sa nha bùm blàng chàng ka rì bơkah krơi is ngan bơh kòn cau Rơđê dê

Lài ngan, nha bùm blàng pal koh dềt mờ geh tram lài dùl ết mờ dà duh ai gơ in ờ hoan bơtang den hơ̆ sồng lời gơ in rơsơh. Ală hìu bơnhă kòn cau Rơdê kờñ sa bơtang uă ờ duh pal tram nha bùm blàng lài mờ dà duh mờ lời tơn bè ờs nàng trŭ gơm. Nha bùm blàng geh cèng ƀŏ lề bal mờ plang. Phan sa do trŭ gơm kung mhar ngan sơl tàm pơgap bàr pe phuk lơm. Glah ơn tàm bơnhă ồs lời gơ in duh, ơn dùl ết tơngi tàm glah, tĕ bàr pe nơm hàn kòn cau neh pờng lề ai gơ in ƀô thồm, tĕ tai dùl ết ka rì chàng bal. Tŭ ka sin, kòn cau Rơđê hơ̆ sồng tĕ nha bùm blàng tàm glah chàng bal mờ ka rì, tĕ tai dùl ết boh, mrĕ là geh phan sa bơkah ngan. Phan sa gơrề bơta ƀô thồm bơh plang mờ bơta ƀô thồm bơh ka rì dê.

Jdam ble (biăp bơtang) sùm geh kòn cau Rơdê pĭc jat kềng gah brê

Dùl phan trŭ gơm tai geh bơta bơtang mờ kòn cau Rơđê kờñ ngan sơl gơm bal mờ ka rì hơ̆ là jdam ble. Hơ̆ là mat sơnđan jat jơnau kòn cau Rơđê dê bơh dùl bơta nha brê. Jdam ble gơ hòn gơs mpung, nha jòng, gơ hòn ndrờm bal, nha bơnung geh dà tơlir rơmĭt bè plai cañ dê. Kòn cau Rơđê sùm pĕ ală cồng nha bơnung nàng gơm, nha geh bơta bơtang. Biăp jdam ble gơm bal mờ ka rì kung ndrờm bè nha bùm blàng sơl. Mơya, broă trŭ gơm biăp jdam ble ờ duh pal koh dềt mờ lời nha bè ờs nàng gơm. Jdam ble chàng bal mờ ka rì tàm pơgap 5 phuk den hơ̆ sồng tĕ tai phan tĕ. Ala tài bơh ngui plang bè tàm phan sa nha bùm ƀlàng den phan sa do mìng tĕ uă mrĕ lơm. Tŭ chàng sin geh bơta ƀô thồm bơh mrĕ lir gơmut tàm muh. Biăp jdam ble sa ƀô thồm ngan, wền di mơ, bơtang sa krơi ngan tàm bơr mờ bơkah ngan.

Mờ bơta kờñ sa bơtang mờ hòi, kòn cau Rơđê sền nha bùm blàng mờ jdam ble là bàr phan trŭ gơm pơn rơ bơkah ngan. Sa ală phan sa bal mờ piang duh cèng wơl bơta bơkah ngan tàm bơr mờ krơi is ngan. Bơta bơtang bơh ală nha do dê tŭ sa dơ̆ sơnrờp gơlơh bè kal ke ngan tŭ loan. Mơya mìng nhjah lề tus dơ̆ 2, dơ̆ 3 cau sa hơ̆ sồng gơlơh geh bơta lơngồt krơi is tàm bơta bơtang. Bè hơ̆ sùm, cau sa gơlơh gơ kờñ ngan tài bơh dùl phan sa geh uă bơta bơtang, gơ lơh bè ờ gơ hờp mơya lơh gơ dan sa ngan.

 K’Brọp ai bơh băo Dak Nông- Cau mblàng K’Hạnh