VOV4.K.ho – Bơh nam lài tus tu\ do, kòp bạch hầu gơbàn wơl tàm càr Kon Tum mờ geh 2 nă cau neh chơt tài gơbàn jơnau ờ niam gơ lời wơl tu\ kòp neh jroă. Bơta ờ suk là tu\ do gah lơh sơnơm càr ờ gơtùi sơm bời cau kòp in tài kung gam ờ hềt geh huyết thanh dră wơl bơta khih bạch hầu.

Tàm nhai 8 pa do, geh 4 nă cau bơh 11 tus 26 sơnam tàm 2 xã Đăk Ui mờ Ngọc Réo, kơnhòal Đăk Hà pal mut tàm Khoa Y học Nhiệt đới, hìu sơnơm dờng càr Kon Tum nàng sơm tài pin gơbàn kòp bạch hầu. Ală cồng nha sền mhàm tơnơ\ hơ\ bơh Viện Vệ sinh dịch tễ Tây Nguyên dê ai go\, jơh 4 nă cau kòp do ndrờm bơ tờp vi khuẩn bạch hầu. Bơta ờ suk là kòp bạch hầu digơlan lơh gơbàn uă jơnau ờ niam gơ lời wơl ngòt rơngơt ngan tus mờ cau kòp, bè as sồt ơ ră plai nùs, ờ niam bè as sồt uă gùng mhàm tàm tơngoh... lơh gơbàn chơt să tàm tơngai lơyah ngan, den gah lơh sơnơm càr ờ gơtùi sơm bời cau kòp in tài bơh ờ geh huyết thanh dră wơl bơta khih bạch hầu.

Bác sỹ Lê Thị Chi, atbồ Khoa Y học Nhiệt đới, Hìu sơnơm dờng càr Kon Tum pà git, hìu sơnơm mìng gơtùi ngui kháng sinh nàng gơ sơt vi trùng nàng sơm cau kòp in: “Tu\ gơbàn kòp bạch hầu mờ ờ geh huyết thanh dră wơl bơta khih den khà jơnau ờ niam gơ lời wơl là uă ngan. Tài kờ` dră wơl bơta khih den mìng ngui huyết thanh dră khih nàng lơh ring bal khà khih, ai tu\ do he mìng sơm kòp mờ sơnơm kháng sinh nàng dong cau kòp in gời”.

            Dùl nă cau pin gơbàn kòp bạch hầu gam sơm tàm hìu sơnơm dờng càr Kon Tum

Jat bác sỹ Hìu sơnơm dờng càr Kon Tum pà git, dilah mìng ngui kháng sinh nàng sơm cau kòp bạch hầu in den mìng gơtùi gơ sơt vi trùng mờ gơtùi sơm ală tềl tơnggo\ kòp ai cau kòp in, ai lơh gơ in ring bal khà khih nàng kơryan jơnau ờ niam gơ lời wơl den ờ gơtùi. Dilah ờ bơtuah mờ bơta khih mut tàm să jan den kal ke ngan nàng sơm. Den tàng cau kòp tơnơ\ tu\ sơm mờ sơnơm khánh sinh den gơtùi rê bơh hìu sơnơm, mơya kung pal lòt kham wơl sùm nàng sền gròi bơta pràn kơldang să jan mờ digơlan kung gam gơbàn ală jơnau ờ niam gơ lời wơl.

Bè jơnau bơh tài mờ hìu sơnơm dờng càr Kon Tum tus tu\ do kung ờ hềt geh huyết thanh dră khih bạch hầu, den bác sỹ Lê Vũ Thức, Phó Kuang atbồ hìu sơnơm pà git: “Tàm nam 2018, khà cau gơbàn kòp bạch hầu gơguh uă, hìu sơnơm dờng càr neh geh sră nggal pơyua Bộ Y tế in nàng dan jơnau pơlam bè broă do. Bộ Y tế kung neh đơng lam Cục atbồ sơnơm tơmba, sồr ală kong ti tac mờ blơi phan bơh lơgar ndai ai blơi huýet thanh. Mơya bơh hơ\ tus tu\ do, ală kong ti kung gam ờ hềt gơtùi blơi sơl. Tu\ do, hìu sơnơm dờng càr Kon Tum ờ hềt geh huyết thanh”.

Bulah jơh 4 nă cau kòp bạch hầu tàm nhai 8 pa do tàm càr Kon Tum ndrờm neh geh rê bơh hìu sơnơm tàm bơta să jan neh pràn. Mơya jơh bal cau kòp mờ gah lơh sơnơm càr kung ndrờm ờ suk ngan tài ờ hềt geh huyết thanh dră khih bạch hầu. Lài hơ\ tàm nam lài, kòp bạch hầu neh gơbàn uă wơl tàm càr Kon Tum tơ nơ\ 11 nam ờ geh cau lơi gơbàn kòp do mờ tàm khà 10 nă cau gơbàn kòp neh geh 2 nă cau chơt.

Cau mblàng K’Duẩn