VOV4.K’ho- Ntào dờng kềng gah bơrnơ̆ tàñ ồi yau bơh mè dê den bi Tưih, ơm tàm bòn Dur, xã Glar, kơnhoàl Đăk Đoa, càr Gia Lai, neh kờñ ngan dà rơlĭp rơlir tàm ồi kòn cau dê bơh tàm tŭ gam dềt. Bơta kờñ gơboh hơ̆ neh sồr ngan bi pal jòi gùng dà pa ai ồi kòn cau jơi bơtiàn in mờ lơh bơta kơ̆p kờñ ai ồi kòn cau lik bơh ƀòn lơgar gơ gơs ngan ngồn.

Kơlôi sơnơng bè broă ồi kòn cau ờs mờng gam rơ hời roh tĕ, bi Tưih neh geh bơta kơlôi sơnơng lơh pa wơl phan soh ñô bau may bơh ồi kòn cau ờs mờng jat broă lơh pa tŭ do dê. Ală phan soh ñô bau may bơh ồi kòn cau bơh cau ùr Bahnar dê kung gam geh lơh bơh ồi yau mơya cèng bơta pa nàng di pal mờ jơnau kờñ, mat sền bơh tơl nă cau dê, ngan là ală gơ̆p bơyô kơnòm să.

Bi Tưih (ơm dơ̆ 2 bơh kiau) neh ngui phan ồi kòn cau nàng may ală ồi soh ñô bau jat ală bơta pa

Đơs bè jơnau kơlôi sơnơng bơh he dê, bi Tưih pà gĭt: bơh sơnrờp, añ geh bơta kơlôi sơnơng tài kờñ lơh gơ rề uă bơta niam chài ờs mờng bơh kòn cau Bahnar tus mờ tơl nă cau. Mơya, dilah he ờ khin cha geh bơta tam gơl pa den ờ mìng kal ke ngan nàng prap gàr, ờ kơlôi tus bơta lơh gơ rề uă mờ bơtàu tơnguh. Den tàng sơnđờm mut lơh phan soh ñô bau may bơh ồi kòn cau jat bơhiàn pơgồp bal mờ bơta pa, an kung neh jòi gĭt nền nòn ngan bơh  tàm internet, tàm màng xã hội... mờ tŭ ală phan bơna geh lơh, añ neh dờp geh uă ngan bơta  kờñ gơboh bơh uă ngan bơh tơl nă cau dê.

Bi Tưih bal mờ mè bèp tàm rùp hin soh phan kòn cau pa geh may bơh ồi kòn cau

Tŭ do, jơh ală phan soh ñô bau may bơh ồi kòn cau ndrờm geh mè mờ bi ùr bi Tưih dong kờl tàñ mờ tê, tơnơ̆ hơ̆ kơnờm ală cau tàñ may geh bơta mờng chài lơh sir. Phan bơna sơnrờp bi Tưih lơh sir là pò phan soh ñô bau lời ai mè bèp he in, tơnơ̆ hơ̆ bi neh cùp rùp ơn tàm internet mờ geh uă ngan gơ̆p bơyô tàm pà bal: mơkung bơh ală rùp hin do, bi neh yal tơngĭt uă bơhiàn niam chài jơi bơtiàn kòn cau Bahnar dê mờ bơta niam bơh ƀòn lơgar bi dê ơm kis.

Bi Tưih đơs: Rùp hin bơh mè bèp añ tŭ ơn tàm internet neh dờp geh uă ngan tềl tơngŏ niam. Bơta do lơh geh bơta gơn kơnờm dong añ lơh ngan rlau tai tàm broă ai ồi kòn cau sơlơ geh mat tàm uă tiah. Tŭ do, làng bol tàm ù tiah càr Gia Lai neh lùp blơi uă ngan. Bàr pe nă cau lơgar ndai kung neh hòi điện thoại kơ̆p kờñ lơh broă bal bơtàu tơnguh phan ñô bau may bơh ồi kòn cau. Mơya, tài bơh ờ hềt geh uă bơta mờng chài mờ priă jền ờ hoan geh, mờ añ kung kờñ geh tai tŭ tơngai nàng hời rơ hời bơceh pa den añ ờ bài.

Bơh nam 2020 tus tŭ do, bi Tưih cùp rùp gĭt nđờ rơhiang nơm hìn ñô bau, hin kir sơnrai bơh ală phan soh geh may bơh he dê. Kơnờm bơh hơ̆, bi kung geh uă ngan gơ̆p bơyô sền gròi, tă pơgồp, dong kờl, dờp lơh mẫu ai phan bơna nàng dong lơh gơ rề uă tus mờ mpồl bơtiàn uă rlau tai, ngan là mpồl bơtiàn ală jơi bơtiàn kòn cau Bahnar, Jrai tàm ù tiah càr Gia Lai dê.

K’Brọp ai bơh Băo Jơi bơtiàn kòn cau mờ tiah kơh bơnơm