VOV4.K’ho- Mờ bơta kờñ gơboh niam chài bơh jŏ, kuơmàng là ù tiah niam chài cing mồng Tây Nguyên, nghệ nhân cing mồng ồng K’Tiếu ơm tàm thôn Duệ, xã Đinh Lạc, kơnhoàl Di Linh, càr Lâm Đồng sùm sền gàr, lơh gơ rề bơta kờñ gơboh mờ broă bơto bơta chài dròng cing, jañ mồng ai cau kơnòm să tàm tiah do in.

Nghệ nhân K’Tiếu deh nam 1952 tàm ù tiah kơh bơnơm Di Linh, là ù tiah cèng bềng bơta kuơ bơh jŏ bè niam chài, rài kis lơh kòi sre bơh cau K’ho Srê dê, là tiah geh gal làng bol kòn cau K’ho ơm kis jŏ rài. Kung bè git nđờ nă cau ra ƀòn mờ nghệ nhân ndai tàm ù tiah đah jum Tây Nguyên đơs bal, ồng K’Tiếu neh sền gŏ mờ geh pơ dờn ală gùng đơs pơnđik pơnring, đơs tam pla, đơs loong niam ngan bơh mò pàng cau K’ho bơh yau tàm ală dơ̆ lơh chờ, lơh yàng ờs mờng tàm ù tiah kơh bơnơm do.

Ồng ờ mìng git wă mờ bơyai lơh chài ngan ală broă lơh chờ, lơh yàng ờs mờng, lơh ală broă lơh yàng lơh sa suơn sre,... ồng gam chài ngan ală jơnau rac yàng kung bè ală jơnau dròng cing mờ bơta chài dròng cing, jañ mồng bơh kòn cau he dê.

                                             Ồng K’Tiếu gam bơto cau bơsram ngui cing mồng

Ồng yal, ồng kờñ cing mồng bơh tŭ gam dềt, tus tŭ 14 sơnam ồng neh git dròng cing jañ mồng. Pah tŭ tàm ƀòn geh hìu bơnhă bơyai lơh yàng ờs mờng, ồng ndrờm tus bal mờ bơsram jat ală cau lòt lài. Bè hơ̆ den tàng ồng ngui chài ngan jơh ală bơta cing 2, cing 3, cing 6. Ồng kơp kờñ pơn jat tai geh tă pơgồp bơta pràn he dê nàng bơto kòn sau in git ngui cing mồng, dong khi git bơta kuơ màng bơh cing mồng dê tàm rài kis niam chài cau K’ho dê đơs is mờ ală jơi bơtiàn kòn cau Tây Nguyên đơs bal.

Tŭ do, ală cau kra ƀòn, nghệ nhân git mờ bơyai lơh chài rơgơi ală broă lơh yàng ờs mờng cau K’ho dê bè ồng K’Tiếu tàm ù tiah Di Linh ndrờm bè ờ gam cau lơi tai. Tài bơh tŭ do, ală cau git wă bè niam chài bơh jŏ cau K’ho dê neh hời rơhời ờ gam tai. Den tàng, làng bol tàm do sùm sền ồng bè dùl “anih prap ơn gam kis” bềng lìu bơta ki ngàm kuơmàng bè niam chài, pin dờn đah huềng krơi is bơh cau K’ho dê.

Ồng K’Tiếu geh uă cau tàm xã mờ tàm tiah do ki ngàm, kờñ gơboh là tài bơh ồng là anih kơldìng nùs nhơm bơh ƀòn lơgar dê, sùm rềp mềr, sền gàr mờ mblàng wơl bơta kờñ gơboh ai làng bol jơi bơtiàn kòn cau dùl êt nă cau tàm xã in, ngan là rơnàng kơnòm să cau K’ho.

Mờ gơnoar broă là cau kra ƀòn, nghệ nhân, ồng K’Tiếu ờ mìng jơh nùs tus bal mblàng yal, hòi jà làng bol sang tĕ ală bơhiàn ờ gam dipal, jơh nùs lơh broă, lơh sa, tơrmù rƀah kơ̆ kơljap, bơt bơtàu rài kis niam chài, ƀòn lơgar pa, tam klac bal, bơt bơtàu nùs nhơm đềt mềr ƀòn lơgar, mờ gam jơh nùs bơto ngui cing mồng ai ơruh pơnu, kơnòm pa tàu tàm ƀòn lơgar in.

Ồng Trương Quốc Phương, Phó Chủ tịch Ủy ban Nhân dân xã Đinh Lạc pà git, tŭ do, ồng K’Tiếu là Phó Kuang atbồ mpồl cing mồng xã Đinh Lạc. Tàm 2 nam do, neh geh 42 nă ơruh pơnu cau K’ho tàm xã geh Sở Văn hóa, Thể thao mờ Du lịch càr Lâm Đồng lơh sră dờp lơh gơs ơdŭ bơto mờ ngui cing mồng. Tŭ do, ồng K’Tiếu gam pơn jat tai bơto 14 nă ơruh pơnu tàm thôn Duệ in. Ồng K’Tiếu sùm là krơh niam tàm srơh Jơh gùt làng bol tam klac bal bơt bơtàu rài kis niam chài; ồng sùm rơcang lài, lam lài tàm broă bơto, prap gàr cing mồng ai ală ơruh pơnu tàm xã in... Tàm tơngai tus, ồng K’Tiếu geh pơn jat tai bơto ngui cing mồng ai mpồl ding mồng kơnòm bơsram Hìu bơsram kấp 2 Đinh Lạc.

Là cau kờñ gơboh mờ uă nam đềt mềr mờ niam chài cau K’ho, kuơmàng là niam chài cing mồng, ồng K’Tiếu kung gam sùm kơlôi rơcang bè broă lơh prap gàr mờ tơnguh phan lời wơl niam chài do tàm ală xã, thị trấn tàm kơnhoàl. Tài tŭ do uă xã tiah làng bol jơi bơtiàn kòn cau dùl êt nă cau kơnhoàl Di Linh kung ờ hềt ngan ngồn sền gròi, lơh niam broă lơh prap gàr den tàng bơta gơ rềng mờ cồng nha cèng wơl ờ hềt uă.

Rlau 55 nam đềt mềr mờ cing mồng, cơnđuà jơng bơh ồng K’Tiếu dê kung gam kơ̆ kơljap mờ neh lời tềl tàm làm gùt ù tiah Tây Nguyên bè Dak Lak, Gia Lai, Kon Tum, Dak Nông nàng tus bal tìp mat, pơrlòng niam chài cing mồng, ngai chờ niam chài- tàp pràn să jan ală jơi bơtiàn kòn cau ală càr Tây Nguyên.

Phó Bí thư Thường trực Huyện ủy Di Linh ồng K’Broi pà git, ồng K’Tiếu ngan ngồn là dùl tàm ală cau jŏ nam tàm broă sền gàr niam chài cing mồng bơh kơnhoàl dê. Ồng sùm jơh nùs tus bal ală broă lơh pơrlòng niam chài, tìp mat chài rơgơi bơh càr mờ kơnhoàl lam lơh. Mpồl cing mồng thôn Duệ, xã Đinh Lạc bơh ồng dê kung geh kơnhoàl rơ wah lơh cau ala mat tus bal ală dơ̆ pơrlòng niam chài cing mồng bơh càr dê mờ neh ai geh uă khà jờng kuơmàng.

Nam 2020, ồng K’Tiếu pơn iờ să geh kơnhoàl Di Linh mờ Sở Văn hóa, Thể thao mờ Du lịch càr lâm Đồng rơ wah là dùl tàm ală cau geh pơn rơ jak geh sồr sền sơ wì dờp, pà khà jờng Nghệ nhân ưu tú. Sùm nđờ jơt nam jơh nùs mờ broă lơh sền gàr, bơto ngui cing mồng, bulah neh dờng sơnam, mơya ồng K’Tiếu kung gam sùm kơp kờñ tă pơgồp uă rlau tai, nàng ală bơta niam chài bơh ală jơi bơtiàn kòn cau Tây Nguyên dê đơs bal ngai sơlơ gơ hòi gơ jà uă rơnàng cau kơnòm să cau jơi bơtiàn kòn cau dùl êt nă cau tus bal sền gàr mờ prap gàr.

Cau mblàng K’Duẩn