VOV4.K’ho- Sơnđờm mut tàm kàl sih tam phan tam pa, tàm ƀòn O Pếch, xã Ia Pếch, kơnhoàl Ia Grai, càr Gia Lai, den bơyai lơh tai dơ̆ lơh răc yàng hòi mìu tàm hìu rông bơh ƀòn dê tơn. Bơhiàn duh khoai dơ̆ lơh yàng hơ̆ neh geh làng bol prap gàr mờ lơh sùm tàm uă nam sùm, là broă lơh pin dờn jat yàng jŏ rài ngan, cèng bơta kuơ nùs nhơm dờng màng tàm rài kis kòn cau Jrai dê.

Tàm trồ tơngai duh, soat dà, làng bol ƀòn O Pếch ờ ru ngan rcang ai dơ̆ lơh răc yàng hòi mìu bơh ƀòn dê. Bơh mƀur tờm chi rơdàp, gùt dar hìu rông bơh ƀòn lơgar dê, tơl mpồl cau tam pà bal drơng broă tơl broă lơh ai dơ̆ lơh yàng duh khoai in. Cau ùr tàm ƀòn geh tơrgùm wơl, tam pà bal mpồl cau nàng rcang ai broă lơh trŭ gơm in. Ơruh pơnu geh kơnòl broă lòt koh gle, đơr, lòt tàm dà croh bùt koăt, kŭp ka, drơng broă cau kra ƀòn in ală broă lơh kơn jơ̆ ai dơ̆ lơh yàng duh khoai bơh ƀòn dê. Cau lơi kung ndrờm tus bal tàm dơ̆ lơh yàng duh khoai bơh ƀòn dê den hô hâng mờ tryang tryồng ngan.

Mpồl duh broă cau kra ƀòn guh lòt lài tàm hìu rông rcang lài dơ̆ lơh ràc yàng hòi mìu

Kra ƀòn Rơ Lan Li cau tờm lơh yàng duh khoai mut lik sùm lòt sền, sồr ală broă lơh rcang lài. Bơh gờñ ngan, kra ƀòn neh ntròñ, soh ào yau ờs mờng mờ pồt chèu pơr hê tàm ƀồ. Dơ̆ lơh yàng duh khoai bơh ƀòn dê den kra ƀòn kơlôi rcang ngan, bulah nam lơi kra ƀòn kung geh làng bol pin dờn jàu drơng broă duh khoai. Ală cau kra ndai tàm ƀòn kung sơr băc ngan lòt soh phan yau. Kra ƀòn  Rơ Lan Li pà gĭt:  

“Nam lơi ƀòn bol añ kung duh khoai hòi dan geh mìu. Sùm mut tàm nhai 4, nhai  5 pah nam dê. Duh khoai nàng hòi dan mờ Yang ai mìu nhàc, càl niam, ai chi che, ù tiah in lơngơm mrềt, tơlir niam, hòi dan ai làng bol tàm ƀòn in pràn kơldang, hờm ram.

Di 10 jiơ drim, 3 nă kra ƀòn ià sơlào ơn phan pơdơng tàm hơ̆ geh dùl nơm iar neh geh buh sin, dùl sơmbồc phe, boh ơn tàm nha prìt guh hơđang hìu rông. Tàm dùl tiah ơpah hìu rông neh geh ơn dùl yăng tơrnờm. Ơn sơlào duh khoai tàm hìu rông, kra ƀòn Li đơs ală jơnau răc dan yal mờ yàng in ngai do ƀòn O Pếch hòi dan geh mìu, pơdơng phan ơn duh khoai nàng ưn ngài Yàng. Kơ̆p kờñ Yàng ai làng bol in dùl nam lơh broă sa ƀuơn ƀoài, cau lơi kung ndrờm pràn kơl dang, ờ geh cau lơi kòp tê jê să. Neh răc dan jơh, kra Li ngui dùl nơm nha rơsìh tơrnờm ai bơh yăng tơrnờm tàm hìu rông dê. Dơ̆ duh khoai tơn jơh mờ jơnau răc dan ưn ngài yàng bơh kra Li dê tềng đap mpồng hìu rông.

Tơnơ̆ dơ̆ lơh yàng duh khoai, ală năc lòt nhơl bal mờ làng bol chờ hờp dơ̆ ñô tơrnờm, gờm chờ ai dùl kàl lơh sa pa ƀuôn ƀoài

Dơ̆ sơnrờp geh drơng broă dong mpồl duh broă kra ƀòn rcang phan ơn pơdơng duh khoai, bi Ksor Aih chờ hờp ngan, ntoat jơh tiah do tus tiah ne nàng lòt sền tơl broă lơh. Bi Aih đơs: “Bàr pe ngai lài, añ bal mờ ơruh pơnu tàm ƀòn neh lòt koh gle, đơr rê nàng lơh piang mhar buh, koh lòng ai oh mi in trŭ gơm, den hơ̆ sồng lòt bùt koăt, kŭp ka dà croh. Geh jat ală kra ƀòn rcang lài ală phan pơdơng ai dơ̆ lơh yàng duh khoai răc yàng hòi mìu añ bơsram geh uă ngan. Tơnơ̆ do, tŭ ală kra ƀòn ờ gam tai den ơruh pơnu tàm ƀòn geh pơn jat tai prap gàr mờ bơyai lơh dơ̆ lơh yàng duh khoai kuơ màng ngan do”.

Dơ̆ lơh yàng duh khoai răc yàng hòi mìu nam do bơh ƀòn O Pếch dê geh sền gròi, dong kờl lơh wơl bơh Ủy ban Nhân dân kơnhoàl Ia Grai mờ Hìu đơs crih tam ya tơrgùm bal Dam San dê. Ồng Đỗ Văn Đông, Phó Chủ tịch Ủy ban Nhân dân kơnhoàl Ia Grai pà gĭt: Tŭ gĭt Hìu đơs crih tam ya tơrgùm bal Dam San geh broă lơh lơh wơl ală dơ̆ lơh yàng ờs mờng bơh làng bol jơi bơtiàn kòn cau dê bol añ chờ hờp ngan tă pơgồp bal. Làng bol xã Ia Pếch đơs bal, ƀòn O Pếch đơs is bơh gĭt nđờ rài do kung gam prap gàr uă dơ̆ lơh yàng duh khoai ờs mờng pơgồp bal mờ rài kis pin dờn jat yàng bè duh khoai ntờc dà, duh khoai brê, duh khoai răc yàng hòi mìu... Ồng Đỗ Văn Đông pà gĭt: Do là dơ̆ nàng lơh geh wơl bơta kờñ gơboh, bơta tam klăc bal tàm mpồl bơtiàn, mờ làng bol kung geh yal tơngĭt, yal ală bơta niam chài krơi is bơh jơi bơtiàn kòn cau he dê tus mờ tơl nă cau.

 Quốc Học jat ƀăo TTXVN- Cau mblàng K’ Hạnh