VOV4.K’ho- Ngai 19/04, tàm Hìu bơsram Đại học Dà Làc, Mpồl gĭt gơ̆p lơh bơyô Việt Nam mờ Lào càr Lâm Đồng, Sở Ngoại vụ, Tỉnh Đoàn Lâm Đồng mờ Hìu bơsram Đại học Dà Làc bơyai lơh dơ̆ sa tềp Bunpimay bơh làng bol jơi bơtiàn lơgar Lào dê mờ dơ̆ dờp ròng siam 21 hìu bơnhă tàm Lâm Đồng gơwèt mờ 22 nă cau bơsram dờng lơgar Lào gam bơsram tàm ală gah bơsram đại học tàm Hìu bơsram Đại học Dà Làc. Tus bal tàm ngai lơh chờ geh ồng Vănxay Saysena, Phó Tổng lãnh sự quán Lào tàm ƀòn dờng Hồ Chí Minh mờ ală Kuang bàng, cau jak chài Tổng lãnh sự quán dê.

Tổng lãnh sự quán tàm ƀòn dờng Hồ Chí Minh lơh broă mờ Kuang đơng lam bồ Hìu bơsram Đại học Dà Làc

Broă lơh do nàng kờñ lơh jat niam nùs nhơm tam klăc bal mờ rềp mềr rlau tai bơta gĭt gơ̆p đah 2 làng bol lơgar Việt Nam mờ Lào dê đơs bal mờ đah làng bol càr Lâm Đồng mờ làng bol 2 càr Champasak mờ Bolykhamxay đơs is, mơkung lơh geh tơl bơta ƀuơn nàng cau bơsram dờng lơgar Lào gam bơsram tàm Hìu bơsram Đại học Dà Làc in geh wă rò sa tềp ờs mờng bơh làng bol ală jơi bơtiàn lơgar Lào dê- dơ̆ sa tềp Bunpimay tàm dùl nùs nhơm bềng bơta ram mhŭ mờ nùs nhơm kờñ gơboh bal; bơh hơ̆, dong ală cau bơsram dờng lơgar Lào geh tai tŭ tơngai niam geh tìp mat lơh kuèng, jòi gĭt bơta niam chài, kòn bơnus Việt Nam dê.

Cau mblàng K’ Hạnh