VOV4.K’ho- Làng bol kòn cau Rơđê halà kòn cau M’nông tàm ù tiah càr Dak Nông buh ka chiềng (ka ke) bal mờ ală bơta phan tĕ geh is, sa bal mờ biăp brê lơh phan sa trŭ gơm bơh ka chiềng gơ gơs bơkah krơi is, ƀô thồm mờ lơh dan sa ngan...

Ală kòn ka chiêng geh kŭp bơh tàm dà dờng, dà croh cèng rê rào kloh, sang tĕ pròc klung. Ka rào kloh mờ boh halà ai dùl sơm băt bùh bơnhă ồs jùt rào jơh să ka nàng jơh dà mbir tàm kơltau ka dê. Nàng ờ ƀô ngir, pal rào goh mhàm tàm ndul ka mờ 2 gah mhàm ƀô ngir tàm 2 gah ngke ka dê. Cau ngui pềs koh dimơ ală gùng tàm să ka dê nàng tŭ buh ka den phan tĕ gơmut tàm poac ka kung bè ka in sin mhar, sin jơh mờ poăc ka tàm dơlam rơsơh rlau. Tơnơ̆ tŭ rào goh jơh, ka geh ơn gơ in rơsơh dà, tơnơ̆ hơ̆ tĕ phan tĕ tàm ka.

                                            Ka chiềng buh sa pồt bal mờ biăp brê

Ka chiềng buh jat kòn cau tàm ù tiah càr Dak Nông dê là bơta tàm pơgồp bal krơi is ngan đah ka chiềng mờ ală phan tĕ lơh geh bơta ƀô thồm uă ngan. Hơ̆ là nha ca yŭ, plang, nha plai sơmoan,... Ơn tàm mpal mờ ƀŏ bal mờ dùl ết boh, mrĕ, hàn kòn cau bal mờ nha ca yŭ, nha plai sơmoan brê, plang neh koh dềt. Tŭ tĕ ală phan tĕ, làng bol ai phan tĕ jeh tàm ndul mờ ală tiah ha neh koh tàm să ka dê. Lời 15 phuk ai phan tĕ gơ in mut jơh tàm poăc ka, làng bol ngui dùl nơm tờm gle dềt koh gơ in nsồñ tơmut bơh bồ ka tus hơ đơm ndul ka.

                      Koh dimơ ală gùng tàm să ka nàng phan tĕ gơmut tàm poăc, tŭ buh ka bơkah rlau

Buh ka tàm bơnhă ồs rơnga neh rcang lài. Tàm tŭ buh pal sơlơ̆ ka nàng ai ka in sin,  buh ka pơgap 30 phuk mờ jat ka dờng halà ka dềt. Tŭ sền gŏ ka sơnđờm geh bơta ƀô thồm gơrề uă tàm ù tiah he dê ơm, phan tĕ đah bơdìh gơ mờr sin rơmĭt mờ ka ờ gam gơlik dà tai hơ̆ là ka neh sin.

Poăc ka neh ro mờ gơmơl wơl gơrề bơta ƀô thồm gơdan sa ngan. Phan sa bơh ka chiềng buh ƀô thồm bơkah geh sa bal mờ ală biăp brê geh is nè nha lốt, nha sơr, nha đing lăng, nha plai sơmoan bơnung, nha plai pơ ò bơnung... Ală nha do bè là dùl ală bơta biăp mơ kung là nha sơnơm niam ngan ai pràn kơl dang să jan gơwèt mờ làng bol tiah do dê, ai dùl ết poăc ka chiềng buh, pồt tàm nha biăp brê, gơtùi cik tai dùl ết boh mrĕ plang ai bơta bơkah gơ in krơi is, sa bơkah ờ gĭt lơh ngan.

Poăc ka chiềng buh lơbơn ngan mờ ờ gŏ ro dùl ết lơi, bơta lơngồt bơkah geh is bơh ka dê geh tai bơta ƀô thồm bơh ală phan tĕ sơlơ bơkah rlau tai mờ sa sùm ờ làp.

Quốc Học jat băo Dak Nông- Cau mblàng K’ Hạnh