VOV4.K’ho- Đơs tus Tây Nguyên, ờ mìng kơlôi tus mờ tiah ù pơr hê bazan dờng ơning ơ nàng, chi che dờng li la. Tiah do gam là “ tiah tờm” bơh ală phan sa bơkah, pơn rơ mờ krơi is ngan. Tàm ală phan sa hơ\, pal đơs tus phan sa bơh tu- nhộng tờm muồng, geh pơn yơu bè “ ka ti brê bơnơm” bơh tiah bơnơm dê.

Tờm muồng là chi geh tam tàm bơr lu\ nàng gơ in kìng tơngai, kơryan càl ai suơn kơphe in, mơkung lơh jrong ai tờm tiêu in wờr sơl. Lồi nhai 3- bồ nhai 4, là tu\ tơngai tàm tiah Tây Nguyên duh uă ngan, là tu\ mờ jơi kong kìm par bềng tàm ală gah suơn muồng nàng deh tăp. Mìng bàr pe ngai tơnơ\ hơ\, gơ lồ gơs ală kòn tu wờr tàm ală nha chi nàng kis.

Jòi ku\p tu – nhộng tờm muồng

Tu tờm muồng do dềt, geh ngkời rơmi\t, 2 gah să gơ dê geh gơ còr jù, să ntiar. Tu do wìn trơlkue să mờ wìn hơ đap. Tu do hàm sa ngan den kòn tu lơi kung lơmă lơm. Tàm dùl tơngai tơnơ\ hơ\, jat dar rài kis dờng pràn, ală tu do gơ gơs nhộng tơrlir bè nha chi. Mờ ală kòn cau Rơđê tàm tiah do, 2 tu\ tơngai  tu mờ nhộng tờm muồng ndrờm gơtùi lơh gơs phan sa bô thồm, bơkah, mờ pràn kơl dang. Mìng lòt dùl ết gùt dar ală tơngu tờm muồng là geh tơn uă ngan kòn tu do.

Nàng lơh phan sa tu- nhộng tờm muồng buơn ngan lơh. Tu tơnơ\ tu\ ku\p, ơn tai dùl ết nha ai tu in sa, ơn tai tus nggùl ngai ai tu in gơ gơs nhộng. Ràu kloh mờ dà, ơn tơngi tàm glah chàng, ơn hàn tỏi gơ in bô thồm den hơ\ sồng tuh nhộng chàng, sơlơ\ ring tê nàng nhộng in ờ lề. Ơn tai dùl ết boh, bòk ngòk gơ in di pal. Nàng bơkah rlau, bàr pe tiah gam ơn tai dùl ết mre\ mờ nha chanh koh dềt. Kòn cau Rơđê sùm chàng gời nàng lời wơl bơta bơkah lơngồt, lơmă pơn rơ ngan bơh nhộng do dê. Tơnơ\ tu\ chàng sin, nhộng do geh dà rơmi\t dimơ, ngkàr rơbă mờ lơmă, di he sa nền nòn den bô thồm bè nha tờm muồng tàm poăc nhộng do dê. Nhộng tờm muồng bô thồm mờ bơkah rlau mờ nhộng tờm zờu sa uă kàr lơi kung ờ làp sơl.

Phan sa bơkah pơn rơ bơh tu - nhộng tờm muồng

Làng bol kòn cau Rơđê sùm yal bal mờ gơ\p phan sa bơkah pơn rơ do, ờ mìng lơh bơkah tàm tu\ sào sa tàm ală ngai trồ duh mờ gam là sơnơm nàng kơryan kòp sốt rết cồng nha ngan. Ai gơ wèt mờ ală cau klau, do là dơ\ nàng tơnguh pràn kơl dang să jan, ờ duh pal lòt ngài lik bơdìh tàm ală ngai rcang sơn dră kòp mờ gam lơh pràn đah deh dùh cau klau dê geh cồng nha ngan.

Tu – nhộng tờm muồng ờ mìng là phan sa brê bơnơm bơh làng bol kòn cau Rơđê dê lơm gời mờ gam gơ gơs bơta pơn iờ să ngan Tây Nguyên dê, geh uă cau kờ` jòi, mờ kờ` ngan mờ phan sa do. Kàl tu tờm muồng mìng jo\ jòng tàm pơgap nhai 3 mờ nhai 4 pah nam. Mơya tu\ ală nhộng do neh gơlik kén mờ gơ gơs kong kìm par, cau lơi neh sa dùl dơ\ den bơta bơkah bơh nhộng do dê kung gam kah sùm mờ ờ tu\ lơi hui\ là geh phan sa brê bơnơm bềng lìu Tây Nguyên do.

Cau mblàng K’ Hạnh