VOV4.K’ho- Dùl dơ̆ Pơrjum cribơyai nàng kờñ sền swì bơta atbồ, prap gàr mờ ngui niam bơta kuơ Ù tiah bơta niam chài cing mồng Tây Nguyên dê neh geh Cục phan lời wơl kah yau bơta niam chài, Bộ Văn hoá, Thể thao mờ Du lịch bơyai lơh ngai 12/04, tàm ƀòn dờng Kon Tum, càr Kon Tum. Tus bal geh ală cau  atbồ, cau kơlôi sơnơng bơta niam chài bơh yau; cau ala mat nghệ nhân bơh yau bal mờ Sở Văn hóa, Thể thao mờ Du lịch 5 càr tàm tiah Tây Nguyên dê.

 Làng bol ƀòn Kon Kơ Tu, xã Đăk Rơ Wa, ƀòn dờng Kon Tum dròng cing jañ  mồng mờ tam ya xoang tam ngai lơh chờ

Ală nam do, Bộ Văn hóa, Thể thao mờ Du lịch, gơnoar atbồ bal mờ Gah lơh broă bơta niam chài 5 càr tàm tiah Tây Nguyên dê neh lơh jat uă broă lơh, rơndap broă lơh nàng kờñ prap gàr, ngui niam bơta kuơ phan lời wơl kah yau. Pal sền gròi ngan là tŭ do, uă ngan ală dơ̆ lơh yàng, lơh chờ ờs mờng kung gam geh làng bol tàm càr prap gàr, lơh jat tơn tàm rài kis pah ngai. Bal mờ hơ̆, gĭt nđờ rơhiang ơdŭ bơto bơtê mblàng wơl dròng cing jañ mồng, tam ya xoang, bơta chài lơh niam cing... neh geh bơyai lơh mờ bơta tus bal bơh gĭt nđờ rơbô nă cau.

Bơdìh mờ ală cồng nha pal chờ hờp ngan, ală cau tus bal tàm dơ̆ pơrjum, cribơyai kung sơnnio uă ngan bơta lòng tàm broă atbồ, prap gàr, ngui niam bơta kuơ Ù tiah bơta niam chài cing mồng Tây Nguyên dê, bè: Ù tiah bơtia niam chài ƀòn gơtìp lời tĕ; rơnàng cau gĭt prap gàr ală dơ̆ lơh yàng jat bơhiàn yau ngai sơlơ roh tĕ tàm tŭ rơnàng kơnòm să rcang wă rò dờp bơta tàm pơdờn; bơta gĭt gơ̆p đah bơtàu tơnguh lơh sa mờ bơtàu tơnguh bơta niam chài ờ hềt geh bơsong dùl bă ring bal...

Cau mblàng K’ Hạnh