VOV4.K’ho – Tàm Kon Tum, Cục phan lời wơl niam chài, Bộ Văn hóa, Thể thao mờ Du lịch pa bơyai lơh pơrjum- cribơyai sền sơ wì bơta geh ngan broă atbồ, sền gàr, ngui niam rài kis niam chài cing mồng Tây Nguyên. Tus bal geh ală cau atbồ, cau kơlôi sơnơng niam chài bơhiàn yau; ala mat nghệ nhân bơhiàn yau bal mờ Sở Văn hóa, Thể thao mờ Du lịch 5 càr tiah Tây Nguyên. Ală cau khoa học, cat atbồ neh đơs tus ală cồng nha kung bè ală bơta ờ niam tàm tơngai lài, bơh hơ̆ ai tơlik ală nùs nhơm, broă lơh cèng bơta ai tơlik lài gùng dà, ngan ngồn cèng bơta krơi is Tây Nguyên nàng kờñ prap gàr, tơnguh ală bơta kuơ bơh jŏ.

Đơs tàm pơrjum, ồng Nông Quốc Thành- Phó Kuang atbồ atbồ Cục phan lời wơl niam chài (Bộ Văn hóa, Thể thao mờ Du lịch) kơp kờñ ală cau khoa học, ala mat ală sở, mpồl, gah broă lơh ală càr Tây Nguyên song dơpă, jơh nùs cribơyai, sền sơ wì bơta geh ngan broă lơh atbồ, sền gàr, ngui niam bơta kuơ niam chài ờ di phan bơna ù iah niam chài cing mồng Tây Nguyên. Mờ kung đal git ală tŭ niam mờ bơta lòng tàm tơngai tus, khin cha mờ song dơpă ai tơlik ală jơnau bơceh pa, ală bơta kuơ pa geh gơtha ngan ngồn uă mờ ală broă lơh geh cồng nha ai broă lơh sền gàr, tơnguh bơta kuơ phan lời wơl niam chài ờ di phan bơna ù tiah niam chài cing mồng Tây Nguyên.

Sùm mờr 16 nam tơnơ̆ ngai Rài kis niam chài cing mồng Tây Nguyên geh UNESCO dờp là phan niam chài mblàng wơl mờ bơr mờ phan lời wơl niam chài ờ di phan bơna kòn bơnus dunia dê, Bộ Văn hóa, Thể thao mờ Du lịch, gơnoar atbồ bal mờ gah niam chài 5 càr Tây Nguyên neh lam lơh uă broă lơh, rơndap broă nàng kờñ prap gàr, tơnguh bơta kuơ phan lời wơl. Bơta kuơmàng ngan rlau jơh là tŭ do uă broă lơh yàng, lơh chờ bơh jŏ kung gam geh làng bol ơm kis bơh jŏ tàm tiah do prap gàr, bơyai lơh tàm rài kis pah ngai. Bal mờ hơ̆, git nđờ rhiang ơdŭ bơto dròng cing, jañ mồng, tamya xoang, bơta chài lơh niam wơl cing... neh geh bơyai lơh mờ bơta tus bal bơh git nđờ rbô nă cau dê. Pơn rơ bè tàm càr Kon Tum, tàm khà 622 ƀòn làng bol jơi bơtiàn kòn cau dùl êt nă cau den geh tus rlau 500 ƀòn geh cing mồng mờ khà gơguh tus rlau 2 rbô 100 bòr.

Cing mồng mờ tamya xoang tàm ngai lơh chờ ƀòn tàm Kon Tum

Bơdìh mờ ală cồng nha chờ hờp lơh geh, ală kuang bàng tus bal pơrjum- cribơyai kung neh đơs tus uă bơta lòng tàm broă lơh atbồ, sền gàr, ngui niam bơta kuơ ù tiah niam chài cing mồng Tây Nguyên, bè: rài kis niam chài ƀòn gơtìp roh huĭ; rơnàng cau git bơyai lơh ală broă lơh bơh jŏ ngai sơlơ ờ gam tai, tàm tŭ rơnàng cau kơnòm să ờ hềt git rơcang lài dờp bơta tàm pơ dờn; bơta gơ rềng đah bơtàu tơnguh lơh sa mờ bơtàu tơnguh niam chài ờ hềt geh bơsong dùl bă ring niam... Jat cau kơlôi sơnơng niam chài bơh jŏ ồng Bùi Trọng Hiền đơs, nàng prap gàr mờ tơnguh bơta kuơ rài kis niam chài cing mồng Tây Nguyên, lài ngan pal gơtùi rơwah ală broă lơh geh cồng nha: “Pơn yơu bè ƀòn A, khi ờ pas sơm mơya khi jơh nùs ngan mờ broă lơh yàng ñô lir bong, den pah nam pơn yơu dà lơgar bơcri priă tĕ nàng khi in gàr sùm broă lơh yàng ñô lir bong. Mìng dùl nơm rơpu. Dong tĕ khi nàng gơtùi gàr broă lơh yàng hơ̆ tài ờ geh phan kis pơ dơng lơh yàng den ngan là gơtùi lơh yàng. Geh ală tiah làng bol kòn cau neh tam gơl bơta pin dờn, ờ gam lơh pơthi ƀồc tai den geh ờ tơrgùm bơcri priă tàm tiah hơ̆. Ală tiah lơi gam prap gàr bơta pin dờn bơh jŏ bơh tiah hơ̆ dê den dà lơgar geh bơcri priă prap gàr tàm bă tiah dềt, den bơta hơ̆ cau hòi là prap gàr tơrgùm bal, bè hơ̆ den geh cồng nha rlau”.

Bơh pơrjum- cribơyai nàng kờñ sền sơwì jơh broă lơh atbồ dà lơgar tàm broă prap gàr mờ ngui niam bơta kuơ phan lời wơl niam chài ờ di phan bơna ù tiah niam chài cing mồng Tây Nguyên bơh tŭ geh pơn jờng mat sơnđan tus tŭ do; tơnguh pràn jak kuang bàng, cồng nha atbồ gơwèt tus mờ ală phan lời wơl niam chài ờ di phan bơna geh UNESCO cih mat đơs bal mờ ù tiah niam chài cing mồng Tây Nguyên đơs is; Đal git gùng dà, kơnòl broă, broă rơndap lơh lam lơh tàm tơngai tus nàng pơn jat tai sền gàr mờ tơnguh bơta kuơ rài kis niam chài cing mồng Tây Nguyên jat jơnau hơ pơrgon tàm sră nggal dan mờ UNESCO; cribơyai, tam pà mờng chài tàm broă lơh sền gàr mờ ngui niam bơta kuơ ù tiah niam chài cing mồng Tây Nguyên nàng kờñ tă bơsong ală kal ke, kòl yan tàm broă atbồ, mờ kung sơlơ tơnguh bơta pơgồp bal đah ală tiah geh bal phan niam chài geh cih mat gơ wèt tus mờ ală broă gơ rềng tus mờng chài lơh broă.

Mpồl bơyai lơh pơrjum- cribơyai sền sơwì bơta geh ngan broă atbồ, sền gàr, ngui niam rài kis niam chài cing mồng Tây Nguyên kung cih dờp uă jơnau đơs bơh ală cau jak chài, cau kơlôi sơnơng niam chài bơh jŏ mờ ala mat gah Niam chài ală càr, bè: geh broă lơh dong kờl pah ngai, pah quý ai ală nghệ nhân, cau geh dà kơl hề tă pơgồp tàm broă sền gàr, tơnguh bơta kuơ phan lời wơl in; Bộ Văn hóa, Thể thao mờ Du lịch pơn jat tai sền gròi đơng lam lam lơh broă prap gàr, tơnguh phan lời wơl Rài kis niam chài cing mồng Tây Nguyên. Tàm hơ̆ tơrgùm ai broă lơh bơto bơtê, bơyai lơh mblàng yal; dong rơndap tap sèng cau lơh broă nàng ală tiah in lam lơh geh cồng nha broă lơh sền gàr, tơnguh bơta kuơ phan lời wơl gơ jat bal mờ bơtàu tơnguh rài kis làng bol.

Cau mblàng K’Duẩn