VOV4.K’ho - Mang òr (16/04), tàm ƀòn Văn hoá-Du lịch ală jơi bơtiàn kòn cau Việt Nam (Đồng Mô, Sơn Tây, Hà Nội), Bộ Văn hoá, Thể thao mờ Du lịch pơgồp bal mờ ờ uă Bộ, gah lơh broă tàm dà lơgar bal mờ ală tiah neh bơyai lơh sơn đờm Ngai chài rơgơi ală jơi bơtiàn kòn cau Việt Nam nam 2021.

                                               Làng bol kòn cau chờ hờp tàm ngai chờ

Broă lơh đơs crih tamya chờ gờm Ngai chài rơgơi ală jơi bơtiàn kòn cau Việt Nam nam 2021 geh 4 bơnah: “Jòi nàng gĭt bè rài lài do, Bơta àng sòl, Kơ̆p kờñ, Bal dùl hìu”, geh lơh jăt broă lơh pơgồp bal mờ uă jơnau đơs pơn đik, đơs crih, tamya nàng pơrlai guh bơhiàn kờñ gơboh mờ dà lơgar, nùs nhơm pơnyờ să tài dà lơgar, prăp gàr bơta niam chài rơgơi tàm 54 jơi bơtiàn kòn cau.

Broă lơh neh geh lơh nền nòn mùl màl neh pơn jờng ngai bơhiàn chài rơgơi ală jơi bơtiàn kòn cau mờ tơnguh uă nùs nhơm geh kơnòl bơh gùt jơi bơtiàn kòn cau tàm broă sền gàr, prăp gàr ală phan tềl kah yau chài rơgơi kòn cau, bơhiàn chài rơgơi yau; ai geh tơngu me tơnguh, bơ̆t bơtàu mpồl tam klăc bal gùt kòn cau.

Cau mblàng Ndong Brawl