VOV4.K’ho- Tàm tiah Tây Nguyên, dơ̆ lơh chờ duh kah bơtau Hùng nam do kung geh ală tiah bơyai lơh yŭ rơyùm ngan. Tàm Lâm Đồng, dơ̆ duh kah geh lơh tàm 2 ngai, 20 mờ 21/4 (hơ̆ là ngai 9 mờ ngai 10 nhai 3 jat nam lơgar he dê) tàm hìu duh khoai Âu Lạc- Tiah nhơl chờ ñjrùh dà Prenn, Dà Làc. Mờ tơngume “Bal dùl tơngu rơyas”, dơ̆ lơh chờ geh uă broă lơh geh kuơ ngan. Bơdìh mờ bơhiàn duh khoai ờs mờng, rò, pơdơng phan duh khoai, chu ñàng tàm hìu duh khoai Trung- Thượng- Hạ mờ hìu duh khoai mè Âu Lạc; uă broă lơh kung geh lơh duh hồl ngan bè: Anih bơyai lơh broă lơh niam chài ờs mờng, yal tơnggit ală gùng đơs pơnđik, tàm pơrlòng cờ tướng, ală bơta nhơl bơhiàn yau, anih phan sa 3 tiah dà lơgar, pơrlòng bơka sơlàu ơn phan pơdơng duh khoai, tồt bơkàu, bơka guàng bơkàu pơdơng duh khoai bơtau sơn rờp dà lơgar.. Kuơmàng dơ̆ duh kah nam do geh bơyai lơh nhơl đờn ca tài tử tiah đah jum dà lơgar bơh ală nghệ nhân, nghệ sĩ tus bơh tiah tờm niam chài đơs crih tamya càr An Giang.

Sở Văn hóa, Thể thao mờ Du lịch pà gĭt, gah do geh pơgồp bal mờ Ủy ban Nhân dân ƀòn dờng Buôn Ma Thuột mờ ală mpồl lơh broă gơrềng bal bơyai lơh duh khoai bơtau Hùng ngai 10 nhai 3 nam Tân Sửu 2021 tàm ngai 20 mờ 21 nhai 4 nam 2021, tàm tiah tềl kah yau dà lơgar Đìng Lạc Giao, sồ hìu 67, gùng Phan Bội Châu, ƀòn dờng Buôn Ma Thuột). Dơ̆  duh khoai bơtau Hùng ngai 10 nhai 3 jăt tơngai àng kơnhai pah nam neh gơs ngai chờ gùt lơgar dê, là bơta pràn nùs nhơm pơgồp bal lơh geh bơta pràn tam klăc bal gùt làng bol sơrlèt mờ ală bơta glar bòl, kal ke bơh rài tam lơh, rềs àr bơh trồ tiah, kal ke; tơnguh nùs nhơm pin dờn mpồl bơtiàn nàng wèt tus rài tơnơ̆ do, bơ̆t bơtàu dà lơgar Việt Nam ngai sơlơ pas gơs, pràn kơl dang, niam bơnĕ rơlao. Broă bơyai lơh duh khoai bơtau Hùng là dơ̆ nàng lam sồr ală làng bol tus bal pơrlòng, lơh geh cồng nha ală kờnol broă, tơngu me tơnguh bơtàu broă lơh sa, bơta chài rơgơi mpồl bơtiàn jăt mờ nùs nhơm Nghị quyết pơrjum dờng Đảng bộ càr dơ̆ 17 neh ai.

Tơnơ̆ tŭ Bộ Văn hóa, Thể thao mờ Du lịch geh sră nggal pơyua Ủy ban Nhân dân càr Quảng Nam bè broă lơh tơrlòng lài wă nac nhơl chờ dunia bơh nhai 7 tus nhai 9 nam 2021, pa do, Chủ tịch Ủy ban Nhân dân càr Quảng Nam neh kĭ sră nggal hơ Bộ Văn hóa, Thể thao mờ Du lịch, cih mat mờ Chính phủ là tiah lơh tơrlòng lài ngan bơh gùt lơgar dê wă nac dunia rê lơgar Việt Nam nhơl chờ ờdo ờdă. Jat ồng Lê Trí Thanh, Chủ tịch Ủy ban Nhân dân càr Quảng Nam pà git, càr neh geh broă rơndap lơh mùl màl, tềng đap mat geh rơwah nac bơh Hàn Quốc tus ơm rlô să tàm tiah ơm rlô să pơgồp bal Hoiana, tàm kơnhoàl Duy Xuyên mờ Tui Blue Nam Hội An tàm kơnhoàl Núi Thành, gan ƀlàng rơndeh par Chu Lai, jat broă lơh ală dơ̆ par dunia tơn jat ală dơ̆ par, tơngai ơm wơl bơh 5 tus 10 ngai. Bơh lòt sền ngan ngồn, Tổng cục Du lịch Việt Nam đơs, Quảng Nam là tiah geh tơl bơta nàng drơng ală bơta bè phan bơna, lơh sơnơm, anih broă drơng ala nhơl chờ... nàng lam lơh lài.

Cau mblàng K’Duẩn mờ Ndong Brawl