VOV4.K’ho- Tus ƀòn Đăk Tiêng Ktu, xã Đăk La, kơnhoàl Đăk Hà, càr Kon Tum, lùp ùr bơklau nghệ nhân A Buih (68 sơnam) mờ Y Rac (69 sơnam) kòn cau Rơ Ngao (dùl sơnĕ bơh kòn cau Bahnar dê), cau lơi kung git lơm, tài ùr bơklau ồng mò là dùl tàm khà êt ngan cau gam kờñ gơboh mờ broă sền gàr mờ prap gàr broă lơh ờs mờng bơh jŏ kòn cau dê. Bulah neh dờng sơnam, mơya ùr bơklau nghệ nhân kung gam git wă prap gàr mờ bơto wơl kòn sau in bơta niam chài kòn cau he dê.

Geh bơta lam gùng bơh ồng A Cân, kuang atbồ thôn Đăk Tiêng Ktu dê, bol hi jòi tus hìu ùr bơklau nghệ nhân A Buih mờ Y Rac dê. Bàr bă ùr bơklau nghệ nhân ndrờm deh mờ dờng tàm dùl hìu bơnhă bềng bơhiàn bơh jŏ mờ broă tàñ phan gle đơr mờ tàñ ồi kòn cau. Tềng bồ đap hìu sàng goh, ồng A Buih den tàñ phan mờ gle đơr, ai mò Y Rac den tàñ ồi kòn cau. Bàr nă ùr bơklau ồng mò chờ hờp boh bơr ndang, mờ chài ngan tàñ phan nàng mòn gơs ală phan ờs mờng kòn cau dê.

 Ală tŭ ru, bàr nă ùr bơklau nghệ nhân tàñ ồi, tàñ phan mờ gle đơr

Tŭ geh lùp bè broă lơh ờs mờng hìu bơnhă dê, ồng A Buih gơ lơh chờ hờp ngan. Ồng yal, rài yau, tŭ rài kis làng bol kòn cau dê gam gơ wèt tàm brê bơnơm uă, jơh ală phan ngui tàm hìu bơnhă ndrờm pal bơceh mờ mòn is lơm. Bè hơ̆ den tàng, klau pơnu tàm ƀòn tŭ hơ̆ ndrờm geh bơsram broă lơh ờs mờng bơh bèp ồng dê, sền hơ̆ bè dùl bơta nàng sền sơ wì bơta pràn jak mờ bơta chài rơgơi bơh tơl nă cau dê. Ồng A Buih yal mờ bơta bềng nùs nhơm pơn iờ să là, kung tài bơh bè hơ̆ mờ gơ gơs ùr bơklau mờ mò Y Rac.

Là tềng tê sơ̆ tàñ mờ che đù bơrlŭ bal, nghệ nhân A Buih yal bè tơl bơta niam, bơta ờ niam, bơta chài tàñ sơ̆. Ồng pà git, tŭ do, ồng ngui đù sang sơbì nàng tam gơl tàñ gơs sơ̆, ồng pơgồp bal che rơyah bal mờ che đù nàng cèng wơl bơta kơ̆ kơljap kung bè dong tơrmù priă jền tă lơh. Mùl màl den dơ̆ halà sah, đồng, nir tàñ mờ che đù den kơ̆ ngan mờ geh cau ngui kờñ ngan.

Mò Y Rac nggui tềng gah hìu gam sền gròi tus ală che brài tàñ ồi kòn cau den yal, lài do añ deh tàm ƀòn Đăk Rơ Chót rềp bal. Tàm dùl dơ̆ tìp mat niam chài đah ƀòn Đăk Rơ Chót mờ ƀòn Đăk Tiêng Ktu, ală klau pơnu mờ mpàng tê chài rơgơi mờ broă lơh bơh jŏ geh tŭ tìp mat, lơh quèng. Bè hơ̆ den bol hi tàm tìp mờ tàm kờñ gơboh bơh tŭ sền gŏ dơ̆ sơn rờp tơn.

Bulah neh dờng sơnam mơya mò Y Rac sùm gàr bơta kờñ gơboh mờ broă tàñ ồi kòn cau

Tơnơ̆ tŭ bau, 2 nă ùr bơklau geh mè bèp pà 2, 3 sàu ù tàm ƀòn Đăk Tiêng Ktu nàng ơm mờ lơh broă. Tŭ hơ̆ gam ơm hìu rơng, drim lơi ồng mò kung gàr bơta mờng quèng guh gờñ nàng sing ồs mờ nggui bal mờ gơp, bal mờ kòn sau boh bơr ndang, mờ mòn gơs ală phan ngui ờs mờng bè sah, sơ̆, đồng, blah ồi.. nàng drơng jơnau kờñ hìu bơnhă in mờ cèng tac ai ală hìu bơnhă, cau kis tàm ƀòn in. Tus tŭ do, bulah neh dờng sơnam, kòn sau kung neh dờng mơya pah tŭ lơh jơh broă suơn mìr, tŭ ru, ùr bơklau ồng mò nggui wơl kềng gah hìu nàng tàñ phan mờ gle đơr, ruồi brài, pơn jat tai mờ bơta kờñ gơboh he dê. Jat nò Y Rac yal, broă lơh ờs mờng lơi kung bè hơ̆ lơm, gơ wèt mờ tơl jơi bơtiàn kòn cau den cèng dùl bơta niam krơi is bè rùp rài mờ dà trum bơh ală phan lơh gơs dê nàng đal git mờ ală tiah ndai tàm mpồl bơtiàn kòn cau Việt Nam. Bulah tơl phan bơna lơh gơs ndrờm geh bơta tàm bơrlŭ ală niam chài bơka, mơya kung gam geh uă bơta krơi is, mìng sền gròi nền nòn dùl êt là neh gơtùi sền gŏ bơta hơ̆.

Ndrờm kờñ gơboh broă lơh ờs mờng bơh jŏ den tàng bàr nă ùr bơklau nghệ nhân pah dơ̆ geh tŭ là soh ală blah phan soh ờs mờng kòn cau dê nàng tus bal ală broă lơh chờ, lơh yàng dờng dềt tàm ƀòn. Kuơmàng, mò Y Rac gam git tamya, ồng A Buih git nhơl uă bơta phan nhơl gùng đơs cih, git mờ chài ngan dròng uă jơnau cing mồng den tàng ùr bơklau ồng mò ndrờm là cau geh jơng tàm mpồl dròng cing jañ mồng bơh ƀòn dê.

Ồng A Buih yal, ală bơta niam chài bơh jŏ kòn cau he dê li la ngan. Den tàng nàng sền gàr broă lơh bơh jŏ, bơdìh mờ bơta chài là tàñ phan gle đơr, ồng kung gam jơh nùs ngan tàm jơh ală broă lơh niam chài.

Ồng A Buih yal tai, sap gơlơh moat jrùm, cau kơnòm să tŭ do ờ huan geh cau git mờ wă jơh ală bơta niam mờ jơnau gơtha bơh ală phan ờs mờng dê. Cau kơnòm să tŭ do sơnơng krơi mờ lài uă ngan, bơh phan soh, phan sa ndrờm kờñ phan mùl geh, di mờ bơta tam gơl mpồl bơtiàn dê, ai ală phan ngui ờs mờng bèp ồng dê den ờ kờñ ngui tai, tơ ài lah broă bơsram broă lơh. Ồng rơ wah broă bơto bơtê kòn sau he in, nàng sền gàr bơta niam chài. Kòn ùr dơ̆ 7 là Y Ny, 25 sơnam tŭ geh lùp bè broă lơh ờs mờng den oh đơs, bơh tŭ gam dềt oh neh geh mè bơto tàñ ồi kòn cau, dờng rlau dùl êt tai den bèp bơto oh tàñ mờ gle đơr ală phan ngui dềt, ƀuơn lơh. Tŭ hơ̆ oh kờñ ngan tàñ den tàng ngai lơi kung sền mè, sền bèp hơ̆ sồng đòm lơh jat sơl. Tŭ do tài ờ ru mờ broă lơh den tàng oh ờ huan geh tŭ tơngai lơh bè lài do, jơnau kờñ ngui ală phan ờs mờng hơ̆ bơh cau kơnòm să bol oh dê kung ờ huan uă den tàng kung ờ huan tus bal lơh.

Bulah neh dờng sơnam, ùr bơklau ồng A Buih mờ mò Y Rac pah ngai kung gam jơh nùs, pơn jat tai mờ broă lơh he dê. Ală broă lơh ngan jơh nùs mờ tŭ tơngai nàng prap gàr wơl phan kuơ niam chài bơh jŏ kòn cau he dê, nàng ală bơta kuơ hơ̆ ờ gơtìp roh huĭ.

Cau mblàng K’Duẩn