VOV4.M’nông – Kêng măng 24/11, Kruanh Quốc hội Trần Thanh Mẫn n’hanh mpôl đại biểu gưl prêh Đảng, ngih dak he lôch uĕh rơh hăn khâl na nê̆ Campuchia n’hanh râng Rƀŭn nchră lĕ rngôch rơh tal 12 bah Rƀŭn nchră lam ntŭr neh ăp chính đảng chính trị châu Á (ICAPP); râng Rơh rƀŭn lĕ rngôch rơh tal 11 bah Nghị viện lam ntŭr neh yor Tâm yô̆ n’hanh đăp mpăn (IPTP) bah lơ 21-24/11. Đah bơi 30 nău ƀư, rơh pah kan bah Kruanh Quốc hội lĕ lôch uĕh.

Tâm rơh khâl na nê̆ Dak Campuchia, Kruanh Quốc hội Trần Thanh Mẫn rgum ôp Kđăch Norodom Sihamoni; rgum ôp Kruanh Đảng, Kruanh Thượng viện Hun Sen; rgum ôp Thủ tướng Hun Manet; rgum nchră đah Kruanh Quốc hội Campuchia Samdech Khuon Sudary... Ta rơh rgum chră đah Kruanh Quốc hội Campuchia, 2 nuĭh kruanh ndrel an lah, 2 Quốc hội an mât uĕh tay ƀư tơm ngih pah kan lập pháp 2 dak ntrôl tâm boh ăp ding; groi nđôi, ntrôl ăp n’gâng kan, nău kan, ƀon lan, ăp doanh nghiệp nsrôih ƀư săk rnglăy ăp Hiệp ước, Hiệp định, Tâm ton lĕ ký ton; n’hao tâm rgâl nu nău, tâm pă nău blău ơm tâm ndâk ƀư nău kan bah Quốc hội du trong săk rnglăy, ngăn lah tâm ndâk njêng trong ƀư, trong pháp luật n’hanh groi nđôi mbơh ƀư tĭng pháp luạt, rgop an trong mkra khlay bah ăp dak.