Đah aƀaơ 71 năm, Lơh dơi lịch sử Điện Biên Phủ ndrel đah nău dơi ta ăp trong kan tâm boh ta Tâm nchră Giơ-ne-vơ 1954 hŏ năl dơi nău khlay bah ntŭk gŭ kan tâm boh an bah tâm lơh tâm su, dêh bên nsum bah Việt Nam ta ntŭk kan dak bah dih. Ăp nău tă ơm gĭt kơt nti bah ăp nău khlay têh dja nha hôm geh rnoh khlay kơt ơm, lah ntŭk nsing hun hao jâng ntơm tâm boh dak bah dih Việt Nam n’hanh ntrôl dăng lăp rgum dak bah dih.

"Nău geh dăng ngăn lah chĭng gong ma tâm boh lah nău nteh. Chĭng têh, nău nteh mơ loh". Aơ lah nău lah rjăp bah Kruanh Hồ Chí Minh tâm năm 1945 mpeh ntŭk gŭ prêh, nău khlay bah pah kan tâm boh dak bah dih. Lơh dơi Điện Biên Phủ 1954 lah nău nteh chĭng n’gloh lam ntŭr neh, mprat sŏng ta Tâm nchră Geneve, lơh chrai lĕ rngôch nău mĭn krit djơh lăp tŭn jot bah Prăng, khân păng ân  gŭ ta nsưng tâm nchră đah Chính phủ Việt Nam Dân chủ cộng hòa. Groi Thủ tướng Bùi Thanh Sơn lah rjăp, Hiệp định Geneva 1954 lah du n’gâng ntơm chrat ang tâm boh cách mạng Việt Nam, nsĭt nău têl nkah nău mĭn, trong gŭ rêh n’hanh nău blău tâm boh Hồ Chí Minh:

“Rnôk tâm nchră, ký ton n’hanh tĭng ƀư Hiệp định Geneva lah siƀŭt ndjôt tĭng đâng dơ âk nău tă ơm gĭt kơt nti jru hvi mpơl săk tơm uĕh êng bah mpeh trong kan dak bah dih n’hanh tâm boh Việt Nam, hŏ dơi nđơn tay, kơt dŏng blău mhe n’hanh hun hao tâm nchră, ký ton n’hanh tĭng ƀư Hiệp định Paris 1973 bah kơi nơh tâm ban kơt tâm rdâk njêng, hun hao neh dak n’hanh Mât njrăng neh dak aƀaơ đŏng.”

Ăp rơh kơn bah kơi way n’hao êng săk mpeh lơh dơi Điện Biên Phủ lah êng n’hanh ăp rơh rdâng lơh tay mpŭng rlăng lăp tŭn jot lah nsum gay ndrel nsrôih lơn, rôih dăng lơn tâm rơh rdâk njêng neh dak bah tâm lơh tâm su, han dăng, ndrŏng uĕh. PGS.TS Nguyễn Đức Hòa, Nhih nti Đại học Sài Gòn, mpơl nău:

“Gâp mĭn lah, nkô̆ hôr khlay, ring tam bah nar têh khlay nê nha hôm jru hvi ngăn n’hanh he ân gĭt ntik n’hao tay. Lam ntŭr neh hŏ gĭt tât rup gui han dăng du rnoi nuĭh lơh dơi ta Điện Biên Phủ, ri lam ntŭr neh ân uănh saơ du neh dak Việt Nam hao têh dăng, ndrŏng kuâng đŏng. Kơt nê nău nkah mpeh han dăng bah Điện Biên Phủ mô dơi chuêl bah tâm nuih n’hâm ƀon lan Việt Nam n’hanh ƀon lan lam ntŭr neh.”

Bah năp nău tât rgoh n’gơ krit jêr bah lam ntŭr neh aƀaơ, ndăn dŏng blău mhe ăp nău tă ơm gĭt bah tâm lơh tâm su kăl e, Việt Nam hŏ nkra di ăp bôk nău kan tâm boh dak bah dih nsing ta nău rôih sŏng nău way, ngăch ngăr tâm trong tor luh n’hanh mbơh ngơi, mpư n’hao nuih n’hâm dêh bên tam tâm lơh n’hanh tâm rnglăp, rôih sŏng tâm dâl nău n’hanh tâm boh. Nơm geh kơt nê, mât nâp ntŭk gŭ rêh bah tâm lơh tâm su, đăp mpăn, mât njrăng nâp ƀư tơm n’hanh lam lĕ rngôch neh dak, nkre ntrŭt ntrôl tâm boh rhŏ dŏng an hun hao wăng sa – rêh jêng kon nuĭh./.