
Tĭng đề án glêh tam nhih pah kan, lôch n’glăp nsum đah n’gor Phú Yên, n’gor Dak Lak mhe geh rnoh hvi rlău 18.096 km², rnoh âk nuĭh rlău 3,3 rkeh nuĭh. Trong Quốc lộ 29 hăn bah tơm me cà phê jŭr tât nkual ƀon têh meng dak lêng bah n’gor Dak Lak mhe, jong rlău 200km, yơn lah du trong ngăn ngên nthoi Tây Nguyên-Nam Trung Bộ ma mô hao yôk jŭr sop nkuăch nkue. Aơ lah du nău dơh gay n’gor ntik n’hao rgum lĕ suan dăng tuch tăm- si gle- dak lêng n’hanh nău pơk hvi tay trong Quốc lộ 29 dơi năl lah n’gâng tơm gay ăp suan dăng mbra dơi ntik n’hao.
Nô Nguyễn Thế Tuấn ta nkual ƀon têh Buôn Ma Thuột, n’gor Dak Lak hŏ geh rlău 10 năm njŭn wơt năch pâl nđaih bah Dak Lak hăn ăp n’gor miền Trung kơt Đà Nẵng, Phú Yên, Khánh Hòa, Bình Định... nô Tuấn nkoch, bah Buôn Ma Thuột hăn Phú Yên hăn rlău trong Quốc lộ 29, tă lah njăr trong hăn dŭt ngăch, yor trong quốc lộ bol huêt yơn mô geh sop nkăp nkuăch nkue. Hôm aƀaơ, njăr trong hŏ jŭr djơh, trong hăn đah Dak Lak n’hanh Phú Yên lôch n’glăp nsum, lah nkô̆ nău mô jê̆.
“Ntơm nơh, hăn bah Buôn Ma Thuột - Phú Yên roh nklăp 3,5h dơm, aƀaơ hăn roh ân tât 5h mơ tât ntŭk. Tă bah trong jŭr khuch djơh, ŭch hăn ngăch mô dơi đŏng. Aơ lah du trong hăn ngăn ngên bah Buôn Ma Thuột hăn Tuy Hoà n’hanh rlơ̆ tay dơm. N’glăp nsum gay hun hao ma ntung trong hăn kơt nê ri jêr jŏt ngăn. Lah ŭch tâm mbluh soih tăch rgâl, hun hao lôch n’glăp nsum ri ân pơk hvi tay, nkra têh uĕh tay gung trong. ”

Wa Nguyễn Thị Thanh Thu lah ngoăy tâm nklăp 1.000 cán bộ, công chức dôl pah kan ta n’gor Phú Yên mbra hăn nkual ƀon têh Buôn Ma Thuột pah kan lôch n’glăp nsum. Wa Thu an gĭt, tâm rnôk hăn Dak Lak hop nchră trong n’glăp nsum, mpôl hên hŏ nchuăt ndeh dŭt mbrơi tă bah trong huêt, jŭr khuch djơh, ân der âk ndeh rdeng tao, ndeh rdeng lŭ choih n’hanh lĕ ma ndeh wah jâng bah kon se nti đŏng:
“Geh dŭt âk gâl trong jŭr khuch, sĭt hăn ji r’ah lam săk jăn. Bơi tât bar n’gor n’glăp nsum lăp kan ngăn, cán bộ Phú Yên hao Dak Lak pah kan mbra dŭt jêr jŏt an nău rsong hăn. Ăp pơh nklăp sĭt jay du tơ̆ dơm, rnôk hăn ôi nar ngoăy n’hanh kêng măng nar prăm sĭt. Yơn gung trong kơt aơ ri nklăp hăn bah kêng măng nar pơh gay ôi nar ngoăy mơ năn mông pah kan.”
Quốc lộ 29 lah ngoăy tâm ăp trong khlay nthoi nkual Duyên hải Nam Trung Bộ n’hanh Tây Nguyên; jong tât n’har bri Dak Lak – Campuchia đah lĕ rngôch rnoh jong nklăp 293 km. Yơn lah, đah rnoh di trong gưl IV mpeh yôk yang, 2 mbor ndeh, măt trong dĭ 5,4 mét n’hanh 7,5 mét jâng trong dơi ntuh kơl âk năm bah năp nơh, Quốc lộ 29 hŏ mô ban tĭng hun hao.
Wa Trương Công Thái, Groi kruanh UBND n’gor Dak Lak, an gĭt trong rƀŏng dôl dơi dăn đă lah ntuh kơl pơk nkra dĭ hvi tay ăp gâl ntơm bah Km31+300 (tâm chruh Quốc lộ 1, thị xã Đông Hòa, n’gor Phú Yên) tât bôk chruh Quốc lộ 14 (Km178+062, thị xã Buôn Hồ, n’gor Dak Lak), đah lĕ rngôch rnoh jong nklăp 147 km. Njăr trong nchrăp dơi n’hao têh hvi tĭng trong gưl III, đah rnoh ngăch weh ƀư 60-80 km/h, lah 4 mbor ndeh, wem trong hvi 20,5 m, rnoh ntuh kơl rlău 10.000 rmen prăk.
“Ta năp măt lah ân n’hao têh hvi tay, nkra uĕh tay gay rhŏ dŏng an nău rsong hăn dơh soih tâm rnôk cán bộ công chức hao pah kan nchrăp ntơm bah bôk 1/9 tât. Bar n’gor Phú Yên, Dak Lak hŏ ƀư siƀŭt rblang dăn njuăl Bộ Xây dựng, Tài chính gŭ mĭn tâm pă prăk ntop kơl an n’gor gay pơk têh hvi tay, nkra uĕh tay trong dja ân dŭt ơm.”

Wa Tạ Anh Tuấn – Kruanh UBND n’gor Phú Yên an lah, rnôk Quốc lộ 29 pơk hvi tay, nkra uĕh tay, mbra nta trong dơh an ăp nuĭh n’hanh ndeh rklư rsong hăn, tâm rsong tăch rgâl ndơ, rgop ntrŭt ntrôl hun hao wăng sa- rêh jêng kon nuĭh lôch n’glăp nsum. Yơn lah, mpeh jŏ jong, n’gor Dak Lak mhe ân rdâk njêng trong cao tốc njêng trong me Đông – Tây rƀŏng mpeh dak lêng, hun hao tĭng trong rƀŏng bah Trung ương. Nkô̆ nău dja hŏ dơi thường vụ Tỉnh ủy bar n’gor tâm ban ŭch n’hanh mbra dơi an ntuh kơl tĭng trong bah dih tâm trôm ngih dak (PPP) ntơm bah lvang năm 2025 – 2030 rgâl bah hôm tĭng dăp rgum bah Chính phủ bah kơi năm 2030. Wa Tạ Anh Tuấn mpơl nău mĭn:
“Đah nău ŭch geh aƀaơ ntoh tay lôch n’glăp nsum n’gor, tâm ban kơt trong rƀŏng hun hao luh mpeh dak lêng, ri nău rdâk njêng cao tốc dŭt khlay đŏng. Bar n’gor Phú Yên n’hanh Dak Lak mô lah jêh aơ tay lah n’gor mhe Dak Lak mbra mbơh, hao rblang dăn Chính phủ, Quốc hội ntrôl ngăch rdâk njêng dĭl tâm lvang năm 2025 – 2030.”
N’hao têh hvi trong Quốc lộ 29 n’hanh ƀư trong cao tốc nthoi “bri đah dak lêng” njêng njăr trong me an n’gor Dak Lak mhe, mô dơn lah nău ŭch geh jăch ndăn, ma hôm lah suan ntrôl têh jong an hun hao lôch n’glăp nsum. Du ntung trong têh mhe, ăp kôp mbra rgop hvi tâm ntêng lêng nkual, ntrŭt ntrôl hun hao wăng sa– rêh jêng kon nuĭh hun hao nâp dăng lơn an n’gor Dak Lak mhe lôch n’glăp nsum tâm ban kơt nkual Nam Trung Bộ-Tây Nguyên.
Viết bình luận