Khei ‘năr âu ki, yua đơ̆ng ƀơm ưh kơ ‘lơ̆ng đơ̆ng dôm ‘măng ‘mi tih đak lơ̆p, hlôi pơm ăn lơ hiong răm kơtang găh bơngai păng mŭk tơmam hăm kon pơlei tơring Tŏk bŏk, Tây Nguyên, mă loi ‘noh jĭ dôm dêh char, pơlei tơm: Đắk Lắk, Lâm Đồng, Khánh Hoà, Gia Lai, Đà Nẵng. Bơ̆jang kiơ̆ athei đơ̆ng kơdră chĕp kơ̆l Đảng, Teh đak, Anih tơm vei lăng Kŏng an hlôi hơvơn hloh 195.000 ‘nu kang ƀô̆ khŭl lĭnh vang jang vei lăng sơđơ̆ng tơ̆ tơring; hloh 27.700 tong gre, kơmăy kơmŏk vang jang tơjră, hơmet pơ ‘lơ̆ng hiong răm đơ̆ng ‘mi kial, đak lơ̆p; pơgơ̆r dŏng tơgŭm dŏng sar bar 150.000 ‘nu, tơgŭm hloh 500 tấn tơmam păng 4,7 ti hlak jên dŏng tơgŭm kon pơlei tơ̆ dôm tơring đei hiong răm.

Tơ̆ lêh tơlĕch jang, kơdră chĕp kơ̆l Anih tơm vei lăng Kŏng an krao hơvơn đĭ đăng khŭl lĭnh hơnơ̆ng bơ̆jang ‘lơ̆ng, tơtom tơgŭm kon pơlei ưh kơ lê̆ pơngot, ưh kơ măh đak rơgoh, ưh kơ măh pơgang. Kŏng an rim tơring kơchăng dăr hơlen tơring krê hơmơt, tang găn pơm glăi iŏk yua ‘mi kial pơrăm păng hơtŏk loi dơ̆ng tơgŭm kon pơlei.